Matiu 1
1
Ebe Ẹgbẹe Jesu
(Luk 3:23-38)
1Ebe uniẹn Jesu Kristi ne ọ re ovbi Devid ne ọ vbe re ovbi Ebraham ọre ọna khin.
2Ebraham ọrọre erha Aizik. Aizik keghi vbe re erha Jekọb. Jekọb ọrọre erha Juda kevbe etiọnrẹn. 3Juda ọrọre erha Pẹrẹs kevbe Zẹra (a keghi tie eni iye iran Tema) Pẹrẹs ọrọre erha Hẹzrọn. Hẹzrọn keghi re erha Ram. 4Ram ọre ọ biẹ Aminadab, Aminadab na biẹ Nasiọn ne ọ biẹ Salmọn. 5Salmọn ọre ọ biẹ Boaz (a keghi tie iye ẹe Rehab.) Boaz ọre ọ biẹ Obẹd (a tie iye ẹe Rut) Obẹd ọre ọ biẹ Jese ne ọ biẹ Devid ne ọba. 6Devid ọre ọ biẹ Solomọn (iye ẹe ọre ọ kagha re amwẹ Uraia.) 7Solomọn ọre ọ biẹ Rehoboam, Rehoboam na biẹ Ahija ne ọ biẹ Asa. 8Asa keghi biẹ Jehosafat ne ọ biẹ Joran. Joran ọre ọ biẹ Uzia. 9Uzaia ọre ọ biẹ Ehaz. Ehaz keghi biẹ Hẹzekaia. 10Hẹzekaia ọre ọ biẹ Manasẹ ne ọ biẹ Amọn. Amọn keghi biẹ Josaia, 11Josaia ọre ọ biẹ Jekonaia kevbe etiọnrẹn, ẹghẹ ni ọre a na viọ ivbi Izrẹl gha rrie Babilọn.
12A ghi viọ iran gha rrie Babilọn nẹ, Jekonaia keghi biẹ Sieatiẹl ne ọ biẹ Zerubabẹl. 13Zerubabẹl ọre ọ biẹ Abiud ne ọ biẹ Eliaikim ne erha Azọ. 14Azọ keghi biẹ Zadọk ne ọ biẹ Akim. Akim ọre ọ biẹ Eliub. 15Eliub ọre ọ biẹ Eleaza ne ọ biẹ Maltọn ne erha Jekọb. 16Jekọb na ọre ọ biẹ Josẹf ne ọre ọdafẹn e Meri ne ọ biẹ Jesu ne Mẹzaia.
17Ke ẹghẹ Ebraham do sẹ egbe Devid kegha re orre iwenẹ. Vbe ke egbe Devid do sẹ ẹghẹ ne a na viọ ivbi Izrẹl gha rrie Babilọn, kevbe re orre iwenẹ, vbe ke ẹghẹ ni do sẹ ẹghẹ ne a na biẹ Mẹzaia kevbe gha re orre iwenẹ.
Ubiemwẹ Jesu Kristi
(Luk 2:1-7)
18Vbene a ya biẹ Jesu hẹ ọre ọna khin. Josẹf ọre a ya Meri ne iye Jesu na. Sokpan vba te rhie ẹre rrie, a keghi miẹn wẹ ọ hanmwa vbekpa ẹtin Orhiọn Ne Ọ Huanrẹn. 19Josẹf ne a yae na keghi re ọmẹhẹ, ọ ma ho ne ọ fa Meri ua ma emwa hia, ọ kegha gualọ odẹ vbene irẹn gha ya fẹko do sọrae hẹ. 20Vbene ọ wa ziro na vbekhọe, odibo ọghe Nọyaẹnmwa keghi rhiegbe ma rẹn vbe imina, ọ na tama rẹn wẹẹ, “Josẹf ne ovbi uniẹn Devid, ghẹ fian afianma ya rhie Meri ne amwẹ ọn la owa rhunmwuda ọmọ ne ọ hanmwa ni, ke obọ Orhiọn Ne Ọ Huanrẹn rre nọ. 21Rẹn gha vbe biẹ ọmọ okpia ọkpa. Wẹ ghi he ẹre Jesu, rhunmwuda rẹn ọre ọ gha fannọ emwa rẹn hin obọ orukhọ iran rre.”
22Avbe emwi na hia sunu ne ẹmwẹ ne Nọyaẹnmwa la unu akhasẹ ta miẹn ehe na sẹ wẹẹ, 23“Nene uvbi gha hanmwa, ọ gha vbe biẹ ọmọ okpia ọkpa, a ghi he ẹre Imanuẹl.” Emwi ne a ya ọnii kha ọrọre “Osanobua rrọọ yaba mwẹ.”
24Ugbẹn vbe Josẹf ghi rhiọrre, ọ keghi ru zẹ vbene odibo e Nọyaẹnmwa ni tama rẹn, ọ keghi ya rhie Meri la owa zẹ vbe amwẹ ọnrẹn. 25Sokpan iran ma miẹn egbe ọ te biẹ ọmọ okpia ni. Josẹf keghi he ẹre Jesu.
Currently Selected:
Matiu 1: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
