Malakai 3
3
1E Nọyaẹnmwa ne Oghodua zẹ wanniẹn wẹẹ, “I gha gie ukọ mwẹ ne ọ do dọlọ odẹ yi ye otọ khẹ mwẹ. Ẹghẹ nii, e Nọyaẹnmwa ne uwa mudia khẹ gha wa ya egbe ladian vbe udomwurri vbe uwu Ọgua Osa. Ukọ ne uwa rhie aro ye odẹ gha khẹ gha rre do mu ẹmwẹ ile mwẹ so.”
2Sokpan, de ọmwa ne egbe ẹre gha rrọ ẹdẹ ne ọ ra rre? De ọmwa ne ọ gha miẹn uhunmwu vbe ọ gha ya gbe ladian? Te irẹn ra ye vbe evbakhuẹ ne ọ wegbe, zẹ vbe erhẹn ne ọ kpe ematọn huan. 3Te irẹn ra do bu ohiẹn zẹ vbe ọmwa ne ọ kpe, kevbe ne ọ vbe ya esiliva khian ọgbọn. Zẹ vbene ogun ẹrọnmwọ kpe esiliva kevbe igoru, erriọ ukọ e Nọyaẹnmwa ra kpe avbe ohẹn huan ne iran miẹn ehe na gha viọ emwi ihaoko ne ọ kere gie Nọyaẹnmwa. 4Ẹghẹ nii emwi ihaoko ne ivbi e Jerusalẹm kevbe Juda, viọ gie Nọyaẹnmwa ghi gha yẹ ọre, zẹ vbene iran ka ye vbe ẹghẹ ne ọ gberra.
5E Nọyaẹnmwa ne Oghodua khare wẹẹ, “I gha ladian vbe uwu ẹbu uwa ne I do bu ohiẹn. I gha wa sẹ osẹe gbe iran ni ru e emaziki awan, iran ni ghẹ, iran ni sẹ osẹe ohoghe, iran ni gbe igho emwa ne iran ya winna rhu, iran ni mu avbe ẹgbẹe ru kevbe emọ ne ẹ i mwẹ erha, kevbe avbe erhunmwuyẹn, kevbe iran hia ne ẹ i da mẹ.”
A Ghae Ye Ihe Igbe Ne A Hae
6Mẹ ọrọre Nọyaẹnmwa, mẹ i vbe fiwerriẹ. Rhunmwuda ọnii wa ma he wa wirua fo, wa ne ivbi uniẹn e Jekọb. 7Zẹ vbene avbe erha uwa odede ru, ọre uwa vbe ru, ne uwa na fi iyeke gbe uhi mwẹ, wa ma vbe ya iran ru emwi. 8Wa dọlegbe bu mwẹ gha dee mẹ gha bu uwa gha dee. Sokpan wa nọ rẹn wẹẹ, “De emwi ne ima gha ru ya dọlegbe bu ruẹ gha dee?” I nọ uwa nian, “Ọ kere ne ọmwa gha mu Osanobua ru ra?” Wa rẹnrẹn wẹ ọ ma kei, sevba, wa gha mu mwẹ ru. Wa nọ rẹn wẹẹ, “Odẹ vbo?” Vbe ẹmwẹ a ghae ye ihe ighe kevbe imuohan. 9Te a fi uwa unu rhunmwuda, te uhunmwu ẹvbo na hia wa mu mwẹ ru. 10Wa viọ inu ne a ghae ye ihe igbe gele wa khin gha die Ọgua Osa, ne evbare miẹn ehe na kpọkua vbe evba. Wa ya ẹe danmwẹ mwẹ ghe, wa gha vbe miẹn wẹ I gha kie ewindo ẹrinmwi ye otọ, I ghi vbe rhurhẹ emwi ọmaa hia ku uwa gba erhan gba irri.
11Mẹ i ra kue ne ọkhọe rri uwa emwiokọ, alimo ayọn gha vbe vuọn uhunmwu erhan azara ọghe uwa. 12Eghẹ nii, emwa ẹvbo hia ghi gha tie uwa uhunmwu ne ọ maa rhunmwuda, ẹvbo uwa gha khian ehe ne ọ maa ne ọ gia yin.
Osanobua Wẹ Rẹn Gha Mwẹ Itohan
13E Nọyaẹnmwa khare wẹẹ, “Ẹ i re avbiẹ ẹmwẹ dan wa he talọ vbe ekpa mwẹ. Sokpan, wa keghi vbe nọ wẹẹ, ‘De ẹmwẹ ne ima tae vbe ekpa ruẹ?’ 14Wa khare wẹẹ, ‘Ẹi zẹdẹ mwẹ esa ne a gha ga Osanobua. De esa ne ọ khin ne a gha ru vbene ọ khare ra ne a gha rhie ma e Nọyaẹnmwa ne Oghodua wẹ ọ da mwa ne ima na ru emwi ne ima ru? 15Vbene ima ghi ghe ẹre na, iran ni tọn egbe mu ọ re ọ ghi rre uwu oghọghọ. Ẹire wẹ te agbọn wa ma emwa dan ọkpa, sokpan iran ghi ye uyinmwẹ dan iran danmwẹ Osanobua ghe ne egbe wọ ẹre, a i vbe ru iran emwirhọkpa.’ ”
16Ẹkpo nii, ọre iran ni muohan e Nọyaẹnmwa na gu egbe guan, e Nọyaẹnmwa keghi danmwehọ, ọ họn ẹmwẹ ne iran tae. A keghi sirra irẹn gbẹnnẹ ebe iran ye otọ ighe iran ni muohan e Nọyaẹnmwa, ne iran vbe ya ọghọ ne ẹẹn. 17E Nọyaẹnmwa ne Oghodua khare wẹẹ, “Iran ghi gha re emwa mwẹ, ẹdẹ ne I gha guan yọ iran ghi gha re emwi obọ mwẹ. Mẹ gha tohan iran zẹ vbene erha ọmọ tohan ọmọ ne ọ ga ẹe. 18Ẹghẹ nii, emwa ni gha dọlegbe miẹn alughaẹn ne ọ rre emwi ne ọ sunu vbe egbe ọmwata kevbe ọmwa dan. Vbe egbe ọmwa ne ọ ga mwẹ kevbe ọmwa ne ẹ i ga mwẹ.”
Currently Selected:
Malakai 3: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
