Luk 6
6
Ẹmwẹ Ede Ikẹtin
(Matiu 12:1-8; Mak 2:23-28)
1Jesu kegha fian ugbo ọka irhuarhua gberra vbe Ẹdẹ Ikẹtin. Avbe erhuanegbe ẹre keghi bunnọ ititi eso, iran kegha ye obọ wiẹn rẹn hẹ re. 2Eso vbe uwu avbe Farisi keghi kha wẹẹ, “Vbọzẹ ne uwa na ru emwi ne uhi ima wẹ ne a ghẹ ru vbe Ẹdẹ Ikẹtin yi?”
3Jesu wanniẹn iran ẹmwẹ wẹẹ, “Wa ma he tie emwi ne Devid ru ẹkpo ne ohanmwẹ na gha gbe ẹe gbe emwa rẹn? 4Ọ keghi la uwu owa Osanobua, ọ na viọ ebrẹd ne a ya ye imuohan gie Osanobua, ọ na rriẹ ọe, ọ na vbe rhie ne emwa rẹn, avbe ohẹn ọkpa ọre uhi khare ne ọ gha rrie ọe.” 5Jesu keghi rhie tẹẹ wẹẹ, “Ovbi Ọmwa ọre ọ yan Ẹdẹ Ikẹtin.”
Okpia Ne Obọ Ẹre Sikuẹn
(Matiu 12:9-14; Mak 3:1-6)
6Vbe Ẹdẹ Ikẹtin ọvbehe, Jesu kegha rrie uwu Ọgua ediọn, ọ kegha ma emwa emwi, okpia ọkpa ne obọ ẹre sikuẹn kegha rre evba. 7Eso vbe uwu avbe iran ni ma emwa Uhi kevbe avbe Farisi kegha gualọ emwi ne iran gha ya gu Jesu gui, iran keghi rhunmwuda ọnii gha ba Jesu a deghẹ ọ gha sinmwi ọmwa vbe Ẹdẹ Ikẹtin. 8Sokpan Jesu rẹn emwi ne ọ rre iran ekhọe, ọ keghi tama ọmwa ne obọ ẹre sikuẹn ni wẹẹ, “Kpaegbe, do mudia ye odaro vbe edinran.” Okpia ni keghi kpaegbe, ọ na ya mudia ye evba. 9Jesu keghi tama iran wẹẹ, “I nọ uwa: De emwi ne uhi fan obọ ẹre ne ọmwa ne a gha ru vbe Ẹdẹ Ikẹtin yi, ne a ru iyọbọ ra ne a kuan ọmwa? Ne a miẹn ọmwa fan ra ne a gbe ẹe rua?” 10Ọ ghi ghe iran hia lẹga nẹ, ọ tama okpia ni wẹẹ, “Niẹn obọ ua,” Rẹn keghi gele ru vberriọ, obọ ẹre keghi do gha maa.
11Sokpan ohu mu iran hia, iran na ya gha si uma vbene iran gha ru Jesu hẹ.
Jesu Zẹ Iran Ne Uko Iweva
(Matiu 10:1-4; Mak 3:13-19)
12Ọ ghi sẹ ẹghẹ ni, Jesu keghi hin uhunmwu oke ne ọ ya na erhunmwu ghe Osanobua vbe evba. 13Ẹdẹ ghi gbe, ọ keghi tie avbe erhuanegbe ẹre rrie egbe, ọ keghi zẹ iweva vbọ, ọ na tie iran na avbe ukọ. 14Saimọn (ne irẹn vbe he ẹre Pita) kevbe Andru ne ọtiọnrẹn, Jems kevbe Jọn, Filip kevbe Batolomiu, 15Matiu kevbe Tọmọs, Jems, ne ovbi e Alfiọs kevbe Saimọn (ne oya-a-ya-sinmwi-ẹvbo-ọmwa.) 16Judas ne ovbi e Jems kevbe Judas Iskariọt ne ọ ghi khian ọgueva.
Jesu Ma Emwa Emwi, Ọ Kevbe Sinmwi Emwa
(Matiu 4:23-25)
17Jesu keghi deba iran tuorre vbe uhunmwu oke, ọ keghi mudia ye ehe ne ọ rriẹe deba enibun vbe uwu avbe erhuanegbe ẹre. Emwa ni bun keghi rre evba, iran ni ke Judia rre kevbe Jerusalẹm, kevbe avbe eghute Taia kevbe Saidọn. 18Iran rre do danmwehọ ẹre kevbe ne ọ vbe mu iran egbe rran hin emianmwẹ iran rre, iran ne orhiọn esu zẹ kpokpo kevbe rre, a keghi vbe sinmwi iran. 19Emwa hia keghi gha ho ne iran ye obọ kan rẹn rhunmwuda ẹtin kegha ke egbe ẹre ladian, ọ na gha sinmwi iran hia.
Ọyẹnmwẹ Kevbe Akhiẹ
(Matiu 5:1-12)
20Jesu keghi ghe avbe erhuanegbe ẹre, ọ wẹẹ:
“Ọ maa ne uwa ne ivbiogue:
Wa ọ yan Arriọba Osanobua.
21Ọ maa ne uwa ne ohanmwẹ gbe nian:
Ẹko gha vuọn uwa.
Ọ maa ne uwa ni viẹ nian:
wa gha giẹ.
22“Ọ maa ne uwa vbe emwa a gha khuiwu uwa, vbe iran a vbe kan uwa fua, iran na vbe gha zan uwa kha ighẹ emwa dan wa khin rhunmwuda Ovbi Ọmwa. 23Ọ gha ye rriọ, wa gha ghọghọ, wa gha kuu ne uwa gha ghọghọ, rhunmwuda, ere nọkhua rre otọ khẹ uwa vbe ẹrinmwi rhunmwuda erriọ zẹẹ avbe erha iran ru avbe akhasẹ.
24“Sokpan ọ sẹ uwa ni fe;
wa rri orhiẹnrhiẹn ẹdẹ agbọn uwa fo nẹ.
25Ọ sẹ uwa ne ẹko vuọẹn nian:
Ohanmwẹ gha gbe uwa
ọ sẹ uwa ni giẹ nian:
Wa gha khiẹ, wa gha viẹ.
26“Ọ sẹ uwa vbe emwa hia gha tian uwa, rhunmwuda erriọ avbe erha iran ka vbe tian avbe akhasẹ ohoghe.
Ne A Gha Ho Ẹmwẹ Iran Ne Eghian
(Matiu 5:38-48; 7:12a)
27“Sokpan mẹ tama uwa ni danmwehọ mwẹ, wa gha ho ẹmwẹ eghian uwa, wa gha ru iran ni khuiwu uwa ẹse. 28Wa gha na erhunmwu ne iran ni tie ihẹn ne uwa, ne uwa vbe gha ho ọ maa ghe iran ni ru uwa khọ. 29Ọmwa gha gbe ubi ye uẹ irho vbe obọ ọkpa, gie ẹe vbe gbe ye nọkpa. Deghẹ ọmwa rhie ruẹ ẹwu ọ ke odukhunmwu, gie ẹe wa vbe rhie ọ kotọ bare. 30Ọmwa ne ọ rhirhi nọ ruẹn emwi, rhie nẹ, ọmwa gha rhie ruẹ emwi ghẹ ya dọlegbe miẹn ẹre re. 31U ghi gha ru ne emwa ọvbehe vbene uwẹ ho ne iran vbe gha ru ne uwẹ.
32“A deghẹ iran ni ho ẹmwẹ ruẹn ọkpa ọre uwẹ vbe ho ẹmwẹ ọnrẹn, vbọzẹ ne u gha na ye aro ye afiangbe. Avbe emwa orukhọ vbe ho ẹmwẹ ni ho ẹmwẹ iran. 33A deghẹ iran ni ru uwẹ ẹse ọkpa wẹ vbe ru ẹse na, vbọzẹ ne u gha na ye aro ye afiangbe? Erriọ emwa orukhọ vbe ru! 34Deghẹ iran ne u yayi ighẹ ọ gha sẹtin rhie werriegbe guẹ ọkpa ọre u rhie nẹ mọmọ, vbọzẹ nu u gha na ye aro ye afiangbe. Emwa orukhọ vbe rhie ne emwa orukhọ nọ gha rhie ẹre gba werriegbe gie ẹe mọmọ. 35Ẹ i re rriọ! Gha ho ẹmwẹ eghian ruẹn, vbe gha ru iran ẹse, rhie ne emwa mọmọ, ghẹ ghi vbe rhie aro ye odẹ khẹ emwi rhọkpa. A gha san ruẹn ẹse nọkhua, u ghi vbe gha re ovbi Osanobua Ne Ọ Yo Sẹ, rhunmwuda te irẹn maa ne emwa ẹse oghodan kevbe emwa dan. 36Wa gha mwẹ itohan zẹ vbene erha uwa vbe mwẹ itohan.
Ohiẹn Ẹrrẹe
(Matiu 7:1-5)
37“Wa ghẹ bu ohiẹn ẹrrẹe, Osanobua i ra vbe bu ọghe uwa, ghẹ bu abe gbe ẹrrẹe, Osanobua i ra vbe bu gbe uwa, yabọ emwa ọvbehe, Osanobua gha vbe yabọ uwa. 38Rhie ne emwa ọvbehe, Osanobua gha vbe rhie ne uwa, omwa ne ọ vuọẹn, iyobọ ne wọrhọ, a ghi gha kun ẹnrẹn yuẹ obọ vbene u gha sẹtin mu sẹ. Omwa ne u ya mwa ne ẹrrẹe ọre Osanobua ra vbe ya mwa nuẹn.”
39Jesu keghi kpa itan na ma iran, “Arhuaro i sẹtin rhie arhuaro la odẹ, ọ gha ye rriọ, iran eva gha dele ye uye. 40Ọmwa ne ọ ruẹ emwi i sẹtin kpọlọ sẹ ne ọ ma ẹre emwi, sokpan ọmwa ne ọ ruẹ emwi gha ghi guẹ nẹ, ọ ghi do ye vbe ne ọ ma ẹre emwi.
41“Vbọzẹ ne u na ghe iku erhan ne ọ rre aro ọtuẹn vbe u ma zẹ ye ẹmwẹ ike erhan ne ọ rre uwẹ aro? 42Vbọzẹ ne u gha na tama ọtuẹn wẹ, ‘Ọtẹn mwẹ, gunmwẹ rhie iku erhan nii hin ruẹn aro rre,’ ugbẹn vbe uwẹ ma bẹghe ike erhan ne ọ rre uwẹ aro? Ọmwa ẹkẹ vbe ero, ka mu ike erhan hin aro ruẹ rre nẹ, ẹghẹ nii ọre u gha na bẹghe odẹ ya rhie iku erhan ne ọ rre ọtuẹn aro hin rre.
Erhan Kevbe Ọmọ Rẹn
(Matiu 7:16-20; 12:33-35)
43“Erhan esi, ẹ mọ ọmọ dan, erhan dan i vbe mọ ọmọ esi. 44Ọmọ erhan ọre a ya rẹn erhan. Ọkhuẹnkhuẹn i mọ ohọ, ogigban i mọ azara. 45Aza emwi esi ne Ọ rre ọmwa esi ẹko, ọre ọ ke viọ emwi esi ladian, aza emwi dan ne ọ rre ọmwa dan ẹko, ọre ọ ke viọ emwi dan ladian. Rhunmwuda emwi ne ọ re ọmwa ekhọe ọre unu ẹnrẹn ta ladian.
Iran Ni Bọ Owa Eva
(Matiu 7:24-27)
46“Vbọzẹ ne uwa na tie mwẹ, ‘Nọyaẹnmwa, Nọyaẹnmwa’ ugbẹn vbe uwa i ru vbene I wẹ ne uwa gha ru? 47Ọmwaikọmwa ne ọ bu mwẹ rre, ọ na danmwehọ mwẹ, ọ na vbe ye ẹmwẹ mwẹ ru emwi, I gha ta emwi ne ọ khọ ma uwa. 48Ọ yevbe okpia ne ọ bọ owa, ọ gbe olu ẹre dinmwi, ọ na gbe ẹyotọ ẹre yan okuta. Ẹzẹ keghi ro vẹ la oke, vbene ọ bi owa ni sẹ, ọ ma rueghe rhunmwuda a bọ ẹe ẹse. 49Sokpan ọmwa ne ọ họn ẹmwẹ mwẹ ne ọ ma ya ẹe ru emwi, ọ ye vbe ọmwa ne ọ bọ owa vbe ne ọ ma na gbe ẹyotọ, ugbẹn vbe ulẹmwẹ amẹ dekun owa ni, vbe ọwarọkpa, ọ keghi wa de rẹnkhẹn uan! U miẹn vbe ọ guọghọ ua hẹẹ!”
Currently Selected:
Luk 6: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
