Jona 1
1
E Jona Hẹẹ Uhunmwu Ye Nọyaẹnmwa Obọ
1Ẹdẹ ọkpa, e Nọyaẹnmwa keghi tama e Jona ne ovbi Amitai. 2Ọ wẹẹ, “Gha rrie Ninevi, okpẹvbo nọkhua nii, ne u ya ta ku ọre, I rẹn vbene emwa rẹn mwẹ ekhọe dan hẹ.” 3Sokpan, e Jona keghi mu uhunmwu da ehe ọvbehe ne ọ miẹn ehe na lẹ hin ehe ne Nọyaẹnmwa ye rre. Rẹn keghi gha rrie Jopa, ọ keghi miẹn okọ ne ọ ke evba rrie Spen. Rẹn keghi ha osa, ọ na la okọ ne ọ lele emwa ni gua ẹe gha rrie Spen, ehe ne ọ gha na wa kpa hin ehe ne Nọyaẹnmwa ye rre. 4Sokpan, e Nọyaẹnmwa keghi gie okpẹhoho la okun, ẹhoho nii wegbe sẹrriọ wẹ te okọ ghi ra yannọ kua. 5Ohan keghi kakabọ mu avbe oziguẹ dọmwadẹ ọghe ọe kegha tu tie ẹbọ ne ọ biẹ ọe ne ọ bu irẹn rre. Iran keghi gha filo ihẹ ne okọ mu ku ẹzẹ ne a ghẹ gie okọ ni. Ẹghẹ ne a kha na, e Jona keghi wa gha rrie otọ okọ, ọ ke ya lovbiẹ ye otọ owa okọ, ọ na vbiẹ ua.
6Ọka oziguẹ keghi miẹn ọẹn vbe evba, ọ tama rẹn wẹẹ, “Vbe u a ru yi, te uwẹ vbiẹ? Kpaegbe, ne u tu tie Osanobua ruẹ wẹ ne ọ bu rre. U ghaghe ohan mwa gha to ẹe, ọ ghi gie ima miẹn uhunmwu.”
7Avbe oziguẹ keghi kha wẹẹ “Wa gie ima do yan uta yọ, ne a miẹn ehe na rẹn ọmwa ne ọ si emwi na ne ima hia na rhie uhunmwu mwẹ atataobọ na.” Iran keghi ru ẹe vberriọ, uta keghi mu e Jona. 8Iran keghi rhunmwuda ọnii tama rẹn wẹẹ. “Banbanna nian, tama ima, De ovbi ẹvbo ne uwẹ khin?”
9E Jona keghi wanniẹn tama iran wẹẹ, “Ovbi e Hibru mẹ khin. E Nọyaẹnmwa, Osanobua ne ọ yi otọe kevbe okun, ọre imẹ ga.” 10E Jona keghi tama iran wẹ te irẹn ho ne irẹn lẹ hin ehe ne Nọyaẹnmwa ye rre. Ohan keghi mu avbe oziguẹ, iran keghi tama rẹn wẹẹ, “Emwi ne ọ mu ohan ọre u ru na.” 11Ẹhoho keghi dọlegbe gha tua yọ, rhunmwuda ọnii, avbe oziguẹ nọ rẹn wẹẹ, “Vbe ima gha ruẹ hẹ yi ne ẹhoho miẹn ehe na dobọyi?” 12E Jona keghi tama iran, wẹẹ, “Wa fi mwẹ fi uwu ẹzẹ, ọ gha hunwan hiii, Mẹ rẹnrẹn wẹ mẹ ọ re ọ si ẹe ne ẹhoho nọkhua na na dekun uwa.”
13Sokpan, avbe oziguẹ keghi te gha ho ne iran gua okọ la eghute, iran keghi ya ẹtin iran hia gha gua ẹe. Sokpan, okpẹhoho ni keghi wa dọlegbe gha hoho yọ, iran ma sẹtin gua sẹ ehe rhọkpa. 14Iran keghi rhunmwuda ọnii tu tie Nọyaẹnmwa wẹẹ, “E Nọyaẹnmwa, ma rinmwian an, ghẹ gbele ima an ba ẹmwẹ ne ima ra na gbe okpia na an. Wẹ ne Nọyaẹnmwa ọre ọ si emwi na hia; wẹ ọre ọ ru ẹe.” 15Iran keghi tọn e Jona mu, iran na fi ẹe fi ẹzẹ, ọ keghi wa hunmwan hii vbe ọwarọkpa ni. 16Ohan emwi na keghi mu avbe oziguẹ sẹrriọ wẹ, iran na zọ ẹse ghe Nọyaẹnmwa, iran na vbe yan wẹ iran gha vbe gha ga ẹe. 17E Nọyaẹnmwa keghi gie ehẹn nọkhua, ọ na mi e Jona re, ọ keghi gha rre uwu ehẹn ni vbe avan eha kevbe asọn eha.
Currently Selected:
Jona 1: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
