Joẹl 3
3
Osanobua Gha Bu Ohiẹn Avbe Uhunmwu Ẹvbo
1E Nọyaẹnmwa khare wẹẹ,
“Ọ gha sẹ ẹghẹ nii, I gha gie agbọn dọlegbe maa e Juda kevbe Jerusalẹm.
2I gha si avbe uhunmwu ẹvbo hia si koko,
I ghi viọ iran gha die Iya Ibuohiẹn.
Evba nii ọ re I ra na bu ohiẹn iran vbe ekpa emwi ne iran ru emwa mwẹ re.
Iran zagha ivbi Izrẹl kua, lele ẹvbo ẹrrẹe,
iran keghi ghae Izrẹl ne otọe mwẹ.
3Iran yan uta ya gualọ ọmwa,
ne a gha viọ avbe oghunmwu na,
iran khiẹnnẹ emọ ikpia kevbe emọ ikhuo ọviẹn,
ne iran ya gha ha igho ne avbe igberagia,
kevbe ne iran ya gha da ayọn.
4“De emwi ne uwa ru imẹ re na yi, e Taia kevbe Saidọn; kevbe Filistia hia? Ọ mwẹ emwi ne uwa ra rria mwẹ ikhi ẹre ra? Adeghẹ erriọ nọ, I gha vbe ru uwa ẹre werriegbe ẹgiẹgiẹ. 5Wa viọ mwẹ esiliva kevbe igoru gha rrie, wa keghi viọ ẹfe mwẹ ọrhẹnrhẹn gha rrie aro ẹbọ uwa. 6Wa viọ ivbi e Juda kevbe Jerusalẹm, wa na viọ iran khian rrei, wa na ya khiẹnnẹ iran ne ivbi e Grik. 7Eban na nian, I ra ya viọ iran ke ehe ne uwa khiẹnnẹ iran kui gha dee. I gha vbe ru uwa emwi ne uwa ru iran re. 8I gha ru ẹe ne a vbe khiẹnnẹ ivbi uwa nikpia kevbe ne ikhuo gha rrie Juda. A gha khiẹnnẹ iran ne ivbi e Sabe, ne ẹvbo ne ọ rrei ẹsẹse. Mẹ ne Nọyaẹnmwa ta ẹe nẹ.
9“Wa ya ẹmwẹ na wewe,
ma avbe uhunmwu ẹvbo wẹẹ,
‘Wa mu egbe okuo;
wa si iyokuo uwa koko ne uwa khianmwu!
10Wa ya unu ẹguẹ uwa dunmwu umozo,
kevbe erọ ulema ọwua, asoro.
Te avbe emitan gha ye vbe gbinna.
11Wa zẹgiẹgiẹ larre,
wa ne avbe ẹvbo ni lẹga ena,
ne uwa do si koko ye iya nii.’ ”
E Nọyaẹnmwa, gie iyokuo ruẹ rre ne ọ do gu iran gbinna:
12“Te avbe uhunmwu ẹvbo gha mu egbe,
ne iran gha die Iya Ibuohiẹn.
Evba mẹ ne Nọyaẹnmwa ra na tota, ne I bu ohiẹn,
avbe ẹvbo ni lẹga eni hia.
13Ekhọe iran i zẹdẹ maa,
wa giagia iran gbe otọ,
vbe ne a giagia ọka ne a fian ẹn,
vbe ẹghẹ emwiorhọ.
Wa piẹnpiẹn iran, vbene a piẹnpiẹn alimo ayọn vbe okọ,
vbe ayọn rẹn te do ladian.”
14Arriaisẹn inu ne ọ khin, wa rre Iya Ibuohiẹn,
evba nii ọ re ẹdẹ e Nọyaẹnmwa gha na rre ban.
15Owẹn kevbe uki so ebiebi,
avbe orhọnmwẹ i ghi vbe baa.
Osanobua Gha Fiangbe Emwa Rẹn
16E Nọyaẹnmwa davan ke Oke Zaiọn rre,
urhu ẹre wa vannọ ke Jerusalẹm rre,
iso keghi mu rueghe.
sokpan, rẹn gha gbinna ne emwa rẹn.
17“Ẹghẹ nii u gha na rẹn Izrẹl,
ighe mẹ ọrọre Nọyaẹnmwa Osanobua ruẹ.
E Zaiọn ne oke mwẹ nọhuanrẹn, ọre I dia,
e Jerusalẹm gha khian ẹvbo nọhuanrẹn,
avbe erhunmwuyẹn i ghi khọn rẹn ẹdẹ.
18Vbe ẹghẹ ne a kha na
a gha kọ erhan azara gba oke nii hia,
emwa ghi vbe gha rre uhunmwu oke hia
amẹ gha wa gha rrọọ ẹsẹse ne otọe Juda hia.
ovbi ẹzẹ gha lẹ ke Ọgua Osa ladian,
ọ ghi gbe amẹ khakha Iya Akesia.
19“Igipt gha khian ato
kevbe Idọm ne ẹvbo, gha vbe khian itowa,
rhunmwuda, iran mu okuo ye e Juda,
iran keghi gbele emwa ni ma rẹn ọkpa ọma rẹn eva ni rrọọ.
20-21I gha rria ikhi ye ẹmwẹ emwa ne iran gbele ua na,
I i ra gie ẹe la ọmwa ne ọ rukhọ ban.
Sokpan e Juda kevbe Jerusalẹm gha khian ehe ne a yinrin ẹdẹdẹmwẹdẹ,
Mẹ ne Nọyaẹnmwa ghi di Oke Zaiọn ya.”
Currently Selected:
Joẹl 3: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
