Hozia 6
6
Afiwerriẹ Ne Ọ Ma Sẹ Otọ Ẹko
1Emwa ni khare wẹẹ, “Wa gie ima werriegbe bu e Nọyaẹnmwa. Ọ ru ima emwi nẹ, sokpan ẹ i mwẹ ọ ma mu ima egbe rran, ọ kuan ima nẹ, sokpan ọ gha gbalọ ima ẹwẹn ra u ma ro vberriọ? 2Vbe ọ te ya sẹ ikpẹdẹ eva ra eha, ọ ghi gua ima kpao, ma ghi ya gha rre ehe ne irẹn ye. 3Wa gie ima ziga ne a rẹn e Nọyaẹnmwa. Vbe ne a i na gbe awẹawẹ, ọ gha bu ima rre zẹ vbe ne ẹ i mwẹ ẹdẹ ma gbe, zẹ vbene ẹ i mwẹ amẹ orhọ ma rhọ ye otọ.”
4Sokpan, e Nọyaẹnmwa khare wẹẹ, “Izrẹl kevbe Juda, vbe I a ra ya uwa ru? Ahoẹmwọmwa uwa ghe mwẹ, vbene a zẹgiẹgiẹ ho evbu owiẹ bẹkun, te ọ yevbe evbu ne a zẹgiẹgiẹ ho kẹbun vbe owiẹ. 5Ọnii ọ si ẹe ne I na gie avbe akhasẹ mwẹ bu uwa gha dee, ne iran do gu uwa guan vbekpa ibuohiẹn kevbe ọfuan. I ma vbe rhie emwi ne I ho vbe obọ uwa lẹre, te I wa taa ẹe ladian gboo. 6Ahoẹmwọmwa ne ẹ i beghe ọghe uwa ọ re I ho ighẹ ẹ i re aranmwẹ ne uwa ya zọ ẹse. Emwa mwẹ rẹn mwẹ, ọ re ọ yẹ mwẹ sẹ ne iran giẹn emwi ya zọ ese ghe mwẹ.
7“Sokpan ọwarọkpa vbe iran ghi la otọ Adam nẹ, iran keghi wa rra iyi ne ima gba yi ne egbe. 8Ẹvbo ne ọ vuọn ne emwa dan kevbe avbe izigha ọ re Giliad khin. 9Avbe ohẹn ni rrọ yevbe otu ikpata ni ya gha gba khẹ ọmwa vbe odẹ. Uhin ighẹ te iran ye do izigha vbe odẹ ne a la yo e Siẹkẹm ne ehe nọhuanrẹn. Avbe emwi dan ne iran ru na hia, te iran wa yan ru ẹe. 10Aro mwẹ miẹn emwi ne ọ ye izegbe zẹ ọmwa vbe Izrẹl. Emwa mwẹ mu awua ye egbe iran vbe ne iran na gha ru ẹbọ.
11“Zẹ vbe ọghe uwa ne ivbi Izrẹl, I rhie ẹghẹ yotọ nẹ ne I gha ya rri uwa oya ye emwi ne uwa ru na.
Currently Selected:
Hozia 6: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
