Hozia 2
2
1Rhunmwuda ọnii, tie ivbi Izrẹl ne ihua “Ivbi Osanobua” kevbe “Ne Nọyaẹnmwa ho ẹmwẹ ọnrẹn.”
Goma Ne Ọmwoghẹ — Izrẹl Ne Ọmwoghẹ
2Wa ne ivbi mwẹ, wa gu iye uwa guan, a gha rhe miẹn wẹ, ẹ i ghi re ọvbokhan mwẹ, kevbe wẹ, mẹ i ghi vbe re ọdọ ẹre. Wa tama rẹn ne ọ dobọ ọghe kevbe ebabotu ne ọ gbe yi. 3Adeghẹ ọ ma dobọyi, I gha bannọ ọẹn ruan ye irhunmwuirhun, egbe ne ọ gha ye vbe ẹdẹ ne a biẹ ọe. I gha ru ẹe ne ọ khian otọe ne ọ kae kevbe ne ọ dihoi rua. Ohanmwẹ amẹ ghi gbẹe rua. 4-5Mẹ i ra tohan ivbi ẹre. Ivbi ebabotu ne awa lalọ ẹre aro ọ re iran khin. Rẹn tobọ ẹre khare wẹẹ, “I ra bu avbe ọse ne I zẹlẹe, iran ọ re ọ ya mẹ re, iran ọ re ọ ya mẹ da, iran ọre ọ viọ eto ohuan kevbe ukpọn eto ovbiohuẹ mẹ, ofigbọn oliv kevbe ayọn.”
6Rhunmwuda ọnii, I ra ya ẹti igban gba ogba ga ẹre. I ghi gbe ekẹn ya ran odẹ ọre. 7Ọ gha rhie ulẹ lele avbe esiọre, sokpan ẹ i ra vba iran. Ọ gha gualọ iran, sokpan ẹ i ra miẹn iran. Ẹghẹ nii, ọ ghi kha wẹẹ, “I ra do bu ọdọ mwẹ ne I ka rọnmwẹ. Ẹghẹ nii ọre agbọn na ma mwẹ sẹ ne I ghi ye na.”
8Rẹn I ra miẹnkue ighe mẹ ọ re ọ rhie ọka kevbe ayọn kevbe ofigbọn oliv ne ẹẹn, deba esiliva kevbe igoru hia ne ọ ya gho e Baal. 9Rhunmwuda ọnii ọ gha sẹ ẹghẹ emwiorhọ, I gha viọ ọka ne I te ya ru ẹre ẹse werriegbe, kevbe ayọn, I gha rhie ukpọn eto ohuan kevbe eto ovbiohuẹ ne I te viọ nẹẹn ne ọ gha rhuan. 10I gha sirra avbe ọse ne ọ zẹlẹe bannọ ọẹn ruan, ọmwa ọkpa ne ọ gha sẹtin wọlọ ẹe hin mwẹ obọ rre, ẹ i rrọọ. 11I gha dobọ ugie ne ọ do hia yi. Ugie ukpukpo kevbe ugie ukiuki ne ọ do deba, emwi ne ọ ru vbe Ẹdẹ Ikẹtin hia fẹẹrẹ, kevbe iko ugamwẹ ne ọ ko hia. 12I gha guọghọe rua ighe erhan ne ọ mọ ọmọ ne ọ ya ru ayọn, kevbe erhan ohọ hia, ne ọ khare ighe avbe esiọre ọ re ọ viọ ẹre ne irẹn, rhunmwuda iwinna ne ọ ye ne iran. I gha ya ogba azara ẹre kevbe erhan ohọ ẹre khian ẹgbo, aranmwẹ oha ghi rhia ẹre ua. 13I gha rria ẹre ikhi ye ẹghẹ ne ọ ya mianmian mwẹ, ọ na ya gha giẹn eturari ne Baal, ọ na silo ikpẹrọnmwọ ye egbe rhikhan lele avbe esiọre. E Nọyaẹnmwa taa ẹe nẹ.
Vbene Nọyaẹnmwa Ho Ẹmwẹ Emwa Rẹn Hẹ
14Rhunmwuda ọnii, I ra dọlegbe rhie ẹre la uwu ato, odọ niii ọ re I gha na rhẹrhọe ne I ye ẹmwẹ ahoẹmwọmwa giee werriegbe gha mwẹ aho ghe mwẹ. 15I gha mu ogba azara ne ọ kagha mwẹ dọlegbe nẹẹn, I ghi ya Iya orueghe khian Onurho idaehọ ne ẹẹn. Ọ gha zẹ yọmwẹ re vbe odọ niii zẹ vbene ọ ka gha ru ẹghẹ ne ọ na ye kherhe, ẹghẹ ne ọ na ke Igipt rre. 16Ẹghẹ nii ọ ghi dọlegbe gha tie mwẹ ọdọ ẹre, ẹ i ghi ra tie mwẹ e Baal ọghọe ọvbehe. 17Mẹ i ghi ra gie ẹe dọlegbe ye so unu ye eni e Baal ọvbehe.
18Ogha sẹ ẹghẹ nii, mẹ gha gu avbe aranmwoha hia kevbe avbe ahianmwẹ ta ẹe kugbe, ne iran ghẹ kuan emwa mwẹ ọvbehe. I gha vbe viọ emwi igbinna okuo hia hin otọe nii rre, umozo kevbe uhanbọ hia I ghi gie emwa mwẹ gha rrọọ vbe ọfumwegbe kevbe ne a i na mwẹ ẹbe.
19Izrẹl, mẹ gha ya uwẹ ru ọvbokhan mwẹ;
I gha mudia ẹse I ghi vbe gia mu ẹtin yan;
I gha mwẹ itohan kevbe aho ne ẹ i beghe ghe ruẹ,
I gha ya uwẹ khian ọghomwẹ ẹdẹdẹmwẹdẹ.
20I gha mu eyan mwẹ sẹ, I ghi ya uwẹ khian ọghomwẹ,
wẹ ghi vbe miẹn imẹ zẹ vbe Nọyaẹnmwa ruẹn.
21-22Ẹghẹ ni, mẹ gha họn erhunmwu ivbi Izrẹl ne emwa mwẹ.
I gha gie amẹ rhọ ye otọ,
otọe ghi vbe ma ọka, alimo kevbe oliv.
23I gha gbe emwa ẹkun sotọ vbe otọe nii,
I ghi vbe gie agbọn maa iran,
I gha ho ẹmwẹ emwa ne a te tie ẹre
“Na ma ho ẹmwẹ ọnrẹn,”
iran ne a te tae da wẹẹ,
“Iran-ire-emwa-mwẹ.”
I ghi kha wẹẹ,
“Emwa-mwẹ-wa-khin.”
Iran ghi vbe wanniẹn wẹẹ,
“Wẹ ọrọre Osanobua mwa.”
Currently Selected:
Hozia 2: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
