Ezikiẹl 45
45
Ako Ọghe Nọyaẹnmwa Vbe Otọe Nii
1A ghẹ ghi ghae otọe nii nẹ wẹ ne a mu ne dọmwadẹ ẹwae vbọ, a ghi ya ọkpa vbọ fi ohan ne Nọyaẹnmwa. Ọ ghi gha re ibiriki igbe vbe utanmwẹ kevbe ibiriki erẹnrẹn vbe uvbẹmwẹ. Ehe ne ọ sẹe ehe ne ọ rhanmwẹ hia ghi wa gha re nọhuanrẹn. 2Ako ne a kha na ọ re otọe ne ọ re umwọmwẹ vbe igienenẹ ọghe Ọgua Osa ra gha ye, ọ ghi gha re ibata iyeva yan uri enẹ (840) vbe igienenẹ ehe ne emwirhọkpa i ye ne ọ re ibata enẹ yan iyenẹ (84) vbe uvbẹmwẹ ghi wa lẹga ẹre khinkhian. 3A gha fian ehe ne a kha na ye ihe eva, ọnii nọ wẹ ibiriki igbe vbe utanmwẹ kevbe ibiriki enẹ vbe uvbẹmwẹ, a ghi rhie ọnii ye otọ, ọ gha gua Ọgua Osa, ehe ne ọ re ne ọ huan sẹẹ vbe uwu ehia. 4Ọ ghi gha re ehe ne ọ huanrẹn vbe otọe ẹvbo nii, ne a ghae ye otọ ne avbe ohẹn ni taemwi ne Nọyaẹnmwa vbe uwu Ọgua Osa. Evba nii ọ re owa iran ra gha ye deba ehe ne a rhie yotọ ne Ọgua Osa. 5Obọ ne ọ ghi dekẹe ghi gha re ne a mu ne avbe Livai, iran ni taemwi vbe Ọgua Osa. Adesẹ ore ẹvbo ghi gha rre evba nii ne iran gha dia. 6Ehe ne ọ ghi diake ehe nọhuanrẹn nii, a ghi fian ako ọvbehe ne ọ re ibiriki igbe vbe utanmwẹ kevbe ibiriki eva vbe uvbẹmwẹ ye otọ, ne a bu ẹvbo yi. Ehe ne ọmwaikọmwa ne ọ ghi re ovbi Izrẹl nẹ sẹtin yin.
Otọe Ovbiọba
7A ghi vbe ghae otọ khẹ ovbiọba ne ọ rre asẹ. Ọ ghi ke ehe ne uwu lae vbe odẹ orrie kpao laghe odẹ orrie ya sẹ okun e Meditẹrrenian, kevbe ke ehe ne uwu lae vbe odẹ ahọ ya sẹ ehe ne otọe nii sẹe vbe odẹ ahọ vbe ne a gha na miẹn wẹ utanmwẹ ọkpa ọ re ọ rre ọna kevbe ọkpa vbe uwu e na ghae ne ẹwae ivbi Izrẹl. 8Ako na ghi gha re ne a ghae ne ovbiọba ne ọ khaemwisẹ vbe Izrẹl ne ọ ghẹ ghi gha zẹ avbe emwa kpokpo ọvbehe, sokpan, ọ ghi gie ni dekẹe gha re ọghe avbe ẹwae ivbi Izrẹl.
Ilele Ne Ọ Kan Ovbiọba
9E Nọyaẹnmwa ne Udazi khare wẹẹ, “Ọ kpẹre ne uwa kegha ru orukhọ, wa ne nikhaemwisẹ vbe Izrẹl! Wa dobọ ọkhọ kevbe a zẹ emwa kpokpo uwa yi. Wa ru emwi ne ọ gbae kevbe ne ọ hẹnhẹn. Wa ghẹghi dọlegbe khulo emwa mwẹ hin otọ iran rre. Mẹ ne Nọyaẹnmwa ne Osanobua, ọ re ọ taa ẹmwẹ na ma uwa.
10“Wa gie emwa hia gha lo emwi ne a ya mwa vbene emwi khua sẹhẹ kevbe vbene ọ bun sẹhẹ ne a i ru ero yi:
11“Adanna ne a ya mwa emwi ne ọ kae, a ghi gie ẹe gha re umwọmwẹ ba ekuogho ne a ya mwa emwi ni yevbe amẹ. Emwi ne a ya ehia taa ọrọre izagodo. Vbene ehia gha na defi ọreghe:
“Ọduẹki ọkpa ghigha re ukpuago igbe ne ọ vbe re ekuiyẹ nọkhua igbe.
12“Omwa avbe emwi ni khua ghi gha re:
Egẹrra ugie ghi gha re esikẹl ọkpa,
Esikẹl iyeha ghi gha re emina ọkpa.
13-15“Vbenian ọre uwa gha ya gha ru imuohan
Ọka: a ghi gha emwiorhọ hia ye ihe iyeha, a ghi ya obọkpa vbọ mu ohan.
Ọka irhuarhua: obọkpa vbe uwu iyeha ọghe emwiorhọ.
Ofigbọn oliv: obọkpa vbe uwu iyisẹn ne a miẹn vbe erhan uwa hia.
(A ghi ya ekuogho mwa rẹn: ekuogho igbe ne ọ vbe re ukhiọnmwẹ izagodo ọkpa.)
Ohuan: Ohuan ọkpa ọre a gha mu vbe uwu ohuan uri vbe ogba ohuan ivbi Izrẹl:
“Wa ghi do gha ya ọka mu ohan, kevbe aranmwẹ ne a gha wa gien ikun ẹnrẹn, kevbe aranmwẹ ne a ya si isara, ne a miẹn ehe na ya orukhọ uwa bọ uwa. Mẹ ne Nọyaẹnmwa ne Udazi ọ re ọ giee vberriọ.
16“Emwa hia ni rre otọ na ọ re ọ gha viọ avbe emwi imuohan na gie ovbiọba ne ọ rre asẹ vbe Izrẹl. 17Iwinna irẹn nọ ne ọ mu aranmwẹ ne a ra gien uan rre, kevbe ọka imuohan kevbe ayọn ne a ya mu ohan ọghe otọe Izrẹl hia vbe ẹghẹ Emwiukpo Uki Ọgbọn kevbe Ẹdẹ Ikẹtin kevbe avbe emwiukpo ni ghi dekẹe. Rẹn ọ re ọ gha mu emwi imuohan ọghe orukhọ rre, kevbe ọghe ọka, emwi imuohan ne a ra wa gien ikun ẹnrẹn, kevbe emwi izọese ọghe isara, ne a ya kpe orukhọ ivbi Izrẹl kua.”
Avbe Emwiukpo
(Ẹksọdọs 12:1-20; Levitikọs 23:33-43)
18E Nọyaẹnmwa ne Udazi khare wẹẹ, “Vbe ikpẹdẹ ne okaro, vbe uki ne okaro, wa ghi gbe ẹkhuia ẹmila ne ẹ i mwẹ okan ya zọ ese ne a ya họnmwẹ Ọgua Osa. 19Ohẹn ghi rhie vbe esagiẹn emwi ne a ya zọ ese ye orukhọ na, ọ ghi sa ẹe ku onurho Ọgua Osa, kevbe igienenẹ ọghe Ogiukpo, kevbe onurho ne a la lao ikun ne ọ ke uwu ẹre. 20Ọ gha ghi sẹ ikpẹdẹ ne ogihinrọn ọghe uki nii, a ghi vbe rhunmwuda emwa ni ru orukhọ ne ọ han ne ẹẹn ru ra ọghe a ma rẹn, ru ẹe vberriọ. Odẹ vbenian, a gha sẹtin ya Ọgua Osa khian ne ẹ i mwẹ awua.
21“Vbe ikpẹdẹ ne ogiwenẹ vbe uki ne okaro, wa ghi suẹn Emwiukpo Alagberra. Vbe uwu ikpẹdẹ ihinrọn, emwa hia ghi gha rri ebrẹd ne a ma ya eyist le. 22Vbe ikpẹdẹ ne okaro ọghe emwiukpo nii, ovbiọba ne ọ rre ase ghi ya ẹkhuia ẹmila zọ ese ye orukhọ egbe ẹre, kevbe ọghe avbe emwa nii hia. 23Vbe uwu ikpẹdẹ ihinrọn ne emwiukpo nii gha ya vbe otọ, ọ ghi gha ya ẹkhuia ẹmila ne ẹ i mwẹ okan ihinrọn zọ ese ẹdẹgbegbe ghe Nọyaẹnmwa, a ghi wa gha gien ikun ẹnrẹn ohoho. Ọ ghi vbe gha ya ovbukhọ ọkpọkpa zọ ese ye orukhọ ẹdẹgbegbe. 24Ukhiọnmwẹ ọduẹki ọkpa ọghe ọka kevbe ekuiyẹ nọkhua eha ọghe ofigbọn oliv, ọre ọ ra gha deba dọmwadẹ ẹkhuia ẹmila kevbe ogho ọkpọkpa ne a ya zọ ese.
25“Ọ gha vbe sẹ ẹghẹ Emwiukpo Irhu, ne ọ suẹn vbe ikpẹdẹ ekesugie ọghe uki ne ogihinrọn, egbe ese ne a zọ ye orukhọ, egbe emwi imuohan ne a gien ikun ẹnrẹn ohoho, kevbe vbene ọka kevbe ofigbọn oliv ne ọ rrọ sẹe, ọre ovbiọba ne ọ rre asẹ gha vbe ya gha ru emwi ẹdẹgbegbe.”
Currently Selected:
Ezikiẹl 45: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
