Ẹksọdọs 11
11
E Mosis Ta ẹe Ighẹ Emọ Ọdiọn Gha Wulo
1E Nọyaẹnmwa keghi tama e Mosis wẹẹ, “Oya ọkpa kẹkan ọre I ghi ra rri ọba Igipt kevbe ivbi Igipt re. Iyeke ọnii, ọ gha gie uwa kpao. Vbe ne ẹmwata ẹghẹ ne ọ gha na gie uwa kpao, te ọ ra khulo uwa ladian mwa. 2Tama ivbi Izrẹl ne dọmwadẹ ọghọe nọ emwi vbe obọ ogieva ẹre, emwi itegbe ọghe igoru kevbe esiliva.” 3E Nọyaẹnmwa keghi ya ivbi Igipt gha zama ivbi Izrẹl vbe ẹmwata, avbe ekhaẹmwẹ kevbe emwa nii keghi wa gha ghe Mosis gẹdẹgbẹẹ.
4E Mosis keghi tama ọba wẹẹ, “Vbe nian e Nọyaẹnmwa khare, ‘Ẹdẹ gha ye egbe rrie ogiasọn, I gha la uwu ẹvbo Igipt. 5Emọ ọdiọn nii re ikpia hia vbe Igipt gha wulo, kevbe ovbi ọba Igipt ne okpia ne ọdiọn ne ọ ra rriọba lele ẹe, ya sẹ egbe ọmọ ọdiọn ne okpia ọghe okhuo ọviọnmwa ne ọ lọ emwi vbe olọ. Emọ ne avbe ẹmila ka biẹlẹ gha wulo. 6Urhu eve ne ọ la gha gba otọ Igipt, egbe ne ọ ma he ka sunu ẹdẹ ra a ma wẹ a gha ye vbe họn egbe ọre ọvbehe. 7Sokpan vbe ehe ne avbe ivbi Izrẹl ye, ekita i ra gbọ ọmwa ra emwirri rhọkpa vbọ, ne uwa miẹn ehe na rẹn wẹ e Nọyaẹnmwa rhie alughaẹn ye ẹkpo ivbi Igipt kevbe ivbi Izrẹl.’ ” 8E Mosis keghi kha wẹẹ, “Ẹghẹ nii avbe ekhaẹmwẹ ruẹn na ghi bu mwẹ gha dee, iran ghi ya uhunmwu rhanmwẹ otọ mẹ wẹẹ, ‘Gha khian ke uwẹ kevbe emwa ruẹn. Iyeke ọnii, I ghi kpao.’ ” Ẹre Mosis na guọnmwẹ egbe kpao sẹ ọba Igipt rae.
9E Nọyaẹnmwa keghi kha ma e wẹẹ, “Ọba i ra danmwẹ ehọ ruẹ, ne I miẹn ehe na ye winna iwinna ọyunnuan mwẹ vbe otọe Igipt.” 10E Mosis kevbe Errọn keghi winna iwinna ọyunnuan na hia ye ọba Igipt aro, sokpan E Nọyaẹnmwa keghi ya ẹe yin ehọ, ọ ma gie ivbi Izrẹl kpao hin ẹvbo ẹre rre.
Currently Selected:
Ẹksọdọs 11: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
