Daniẹl 8
8
Umian Ogho Kevbe Ẹwe Ne Daniẹl Miẹn
1Ọ ghi rre ukpo eha ne Bẹlsiaza rriọba, I keghi vbe miẹn umian ne ogieva. 2Vbe umian nii, I ghi wa ghe vbe udomwurri, I wa rre ẹvbo ne a gbe ekẹn gaa ọghe Susa vbe iyaẹvbo Ẹlam. Ọkpẹn Ẹzẹ Ulai ọ re I mudia yi. 3I ghi ghe ya ghe ogho ọkpa ne ọ mwẹ igho eva hiain hiain vbe ọkpẹn ẹzẹ nii, ọkpa keghi tan sẹẹ, ọ vbe ru ọghọgbọn sẹ nọkpa. 4I keghi bẹghe vbe ogho nii ya igho so emwi rrie odẹ ahọ, odẹ okuọ kevbe orrie. A ma miẹn aranmwẹ ọkpa ne ọ sẹtin rrọ ẹre ra ne ọ lẹ fe vbe obọ ẹtin ẹnrẹn. Vbene ọ khọnrẹn ọ re ọ wa gha ru, ọ na wa gha hio paipai.
5Ehe ne I na roro ẹe nii wẹ vbe a ya ọna kha, ẹwe ọkpa keghi mu ulẹ ke odẹ orrie rre, okhian kẹ ọre sẹrriọ wẹ owẹ ọ re i rhanmwẹ otọ. Igho ọkpa gbagbaagba keghi zọ ye ẹkpo aro ẹre. 6Ọ keghi bu ogho ne I bẹghe vbe ọ mudia ye ọkpẹn ẹzẹ ni gha dee. Ọna wa ya ẹtin ẹnrẹn hia vin bu ẹre. 7I kegha ghe ẹre vbe ọ dekun ogho nii. Ohu mu ẹẹn sẹrriọ wẹ ọ na hẹrhu ẹe, ọ na kpannọ ẹre igho eveva. Orhiọn ma gha rre ogho ni re ne ọ gha ya khẹ ọre. A keghi mu ẹẹn gbotọ, ọ na ye owẹ rrilo ẹe mu otọ, a ma vbe miẹn ọmwa rhọkpa ne ọ sẹtin miẹn rẹn fan.
8Ẹwe nii keghi vbe do kakabọ gha hio yọ, sokpan ọ ghi wa sẹ ẹghẹ ne ẹtin ẹnrẹn na kpọlọ sẹẹ, a keghi kpan ẹre igho fua. I gho enẹ ọvbehe keghi zọ ladian ye ihe ẹre, ọkpọkpa keghi nien ukpẹ da ehe ọvbehe. 9Igho ọkpa kherhe keghi vbe zọ ladian vbe uwu ọkpa vbe uwu igho enẹ na, ẹtin ẹnrẹn keghi nien obọ sẹ odẹ ekẹn kevbe ahọ kevbe ghe Otọe Eyan nii. 10Ọ wegbe sẹrriọ wẹ ọ keghi sẹtin gha gu ivbiyokuo ẹrinmwi gbinna, avbe orhọnmwẹ tobọ iran, ọ keghi munọ eso gbotọ vbọ, ọ na ye owẹ rrilo iran ginna otọ.
11Uhin ighe ọ ye vbe fa ovbiọba ọghe ivbiyokuo ẹrinmwi uan, ọ na dobọ ese ne a zọ gie ẹe ẹdẹgbegbe yi, ọ na mu Ọgua Osa rhia. 12Orukhọ ọ re emwa ghi ya gha ru vbe evba ye ihe ne iran gha na te gha zọ ese ne a mwa yọ ẹdẹgbegbe, a keghi mu iyayi ẹmwata fua. Igho nii ke wa gha miẹn ọ dunnaẹn vbe emwi ne ọ ru hia.
13I keghi vbe dẹghe odibosa ọkpa vbe ọ nọ ọvbehe wẹẹ, “Vbe avbe emwi ne a miẹn vbe umian na ra kpee sẹhẹ vbe otọe yi? Inu ẹghẹ ọ re orukhọ ẹwia ra rhie ihe izọ ese ẹdẹgbegbe la vbotọ? Inu ẹghẹ ọ re a ra ya owẹ rrilo ivbiyokuo ẹrinmwi kevbe Ọgua Osa la vbotọ?”
14I keghi họn vbe odibosa nọkpa wanniẹn wẹẹ, “Ukpo igbe yan ikiọkhọe yan arriaisẹn (1,150) nọ vbene ẹghẹ ne a i ra vbe zọ ese owiẹ kevbe ọghe ota. Vbe iyekọnii, a ghi do dọlọ rhie Ọgua Osa ye ihe ẹre.”
E Gebriẹl Ne Odibosa Rhaan Otọ Umian Nii
15Ehe ne I na hia ne I rẹn emwi ne a ya umian na kha, I ghi ghe ọmwa ọkpa wa mudia yọmwẹ odaro vbe udomwurri. 16I keghi vbe họn urhu kevbe obọ nọkpa Ẹzẹ Ulai rre wẹẹ, “Gebriẹl, rhan otọ emwi ne a ya emwi ne ọ miẹn ma rẹn.”
17E Gebriẹl keghi rre, ọ na mudia ke mwẹ. Ohan mu mwẹ sẹrriọ wẹ I na wa de gbotọ.
Rẹn keghi tama mwẹ wẹẹ, “Ovbi ọmwa, rẹn emwi ne a yae kha. Umian na, ẹmwẹ ufomwẹ agbọn ọ re ọ de mu.” 18Ugbẹn vbe ọ ghi guan, I keghi de gbotọ vbe ne I ma na ghi rẹn emwi ne a ru vbe agbọn, sokpan, rẹn keghi mu mwẹ, ọ keghi mu mwẹ mudia. 19Ọ wẹẹ, “Te I rhie ma ruẹn na emwi ne ọ ra lae rre ighe ohu ne ọ mu Osanobua. Umian ẹghẹ ufomwẹ agbọn ọ re ọ de mu.
20“Ogho ne u miẹn ne ọ mwẹ igho eva nii, mudia ye ihe avbe arriọba e Midia kevbe Pẹsia. 21Ẹwe ne ọ rrọ mudia ye ihe arriọba e Gris, igho ne bọzi ne ọ rre ẹkpo aro ẹre eveva keghi mudia ye ihe ọba ne okaro vbọ. 22Igho enẹ ne ọ ghi zọ vbe a kpan igho nokaro fuan nẹ, mudia ye ihe avbe arriọba enẹ ne otọe arriọba ni ra ghae egbe yi, ne ẹ i ghi ra wegbe vba arriọba ne okaro.
23“Ọ ghẹ ghi gha bu ẹghẹ ufomwẹ avbe arriọba na, ighe te emwi dan ne a ru ghi gua iran obọ ro sẹ vberriọ wẹ ẹ i ghi mwẹ a ma rri iran oya, ọba ne ọ zevbudu ne ekhọe dan kevbe ọrẹrẹ ọmwa ghi do rriọba. 24Rẹn gha wa wegbe sokpan, ẹ i re vbekpa ẹtin obọ ẹre. Ọ gha wa rhia emwi nibun ọghe ọhanabe, emwi hia ne ọ ru ghi wa vbe gha dinnodẹ ne ẹẹn. Ọ gha si ọfuan ye emwa ni mwẹ ẹtin nibun egbe, kevbe avbe emwa Osanobua. 25Rhunmwuda ighe ọmwa ero nọ, emwi ero ne ọ ru hia ghi wa gha dunna ne ẹẹn. Rẹn gha wa gha ye emwi ne irẹn khin hio, ọ ghi vbe fuẹn emwa nibun uan vbe a ma ro a ma kọ, uhin ighe te ọ ra yagha Ọba ne ọ kpọlọ Sẹehia fẹẹrẹ sokpan, a gha fuẹn ọnrẹn uan vbe ne a i na lo ẹtin ọmwa nagbọn hiehiere. 26Avbe umian ne ọ dekan ẹmwẹ ese ota vbe owiẹ, ne a vbe rhaan otọ ẹre ma ruẹn nẹ, ọ gha sunu. Sokpan he gie ẹe gha rre ẹko ruẹ ọkpa rhunmwuda ọ gha kpee ẹsẹse ọ ke do sunu.”
27Egbe hia keghi guọghọ mwẹ yotọ, I na ya ikpẹdẹ ihinrọn khuọnmwi. Ẹre I na kpaegbe, I na gha rrie ehe ne iwinna ne ọba mu mẹ ye. Sokpan, umian nii sunsun yọmwẹ aro, I ma vbe rẹn emwi ne a yae kha.
Currently Selected:
Daniẹl 8: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
