Daniẹl 2
2
Imina Ne Nebukiadneza Minaẹn
1Ọ ghi rre ukpo eva ne Nebukiadneza rriọba, ọ keghi mina. Ohan ẹnrẹn muẹn sẹrriọ wẹ ọ ma miẹn ovbe. 2Ọ keghi rhunmwuda ọnii gie ne a tie avbe ọbiro, ebo edunna, oso kevbe azẹn ne iran gha de do rhan otọ imina nii ma irẹn. Iran ghi rre do mudia ye odaro ọba. 3Ọ tama iran wẹẹ, “Ohan imina ne I minaẹn wa mu mwẹ, I ho ne I rẹn otọ ẹre.”
4Iran keghi ya ẹvbo Aremia tama rẹn wẹẹ, “Ọba gha tọ, ọ kpẹre, ta imina ne u minaẹn ma ima, ma gha rhan otọ ẹre ma ruẹn.”
5Ọba keghi wanniẹn tama iran wẹẹ, “Vbene I tae ọrọre wẹ ne uwa tama mwẹ imina ne I minaẹn kevbe ne uwa rhan otọe ẹre ma mwẹ. Adeghẹ wa ma sẹtin, te I ra yannọ uwa obọ vbe owẹ hẹ kua, I ghi ya owa uwa hia khian itowa. 6Sokpan, a deghẹ wa sẹtin ta imina nii kevbe emwi ne a yae kha ma mwẹ, I gha ya emwi ọhẹ kevbe uyi nọkhua san uwa ẹse. Banbanna nian, wa ta imina nii kevbe emwi ne a yae kha ma mwẹ.”
7Iran keghi dọlegbe zẹ wanniẹn ọba wẹẹ, “Adeghẹ u ta imina ni ma ima Umogun, ma gha rhan otọ emwi ne a yae kha ma ruẹn.” 8Ọba ghi họn ẹmwẹ na, ọ keghi van okan ya tae wẹẹ, “Erriọ I kha re, te uwa ya ena si ẹmwẹ na tan vbotọ rhunmwuda wa miẹn ọẹn nẹ wẹ, 9te I ra wa ya abọkpa rri uwa hia oya adeghẹ wa ma sẹtin ta imina na ma mwẹ. Te uwa wẹ ne uwa gha ta ohoghe ma mwẹ rhunmwuda, ọ gha kpee kherhe wan, emwi hia gha fiwerriẹ. Wa ta nene imina ma mwẹ, ẹghẹ nii, I ghi rẹn wẹ wa gha vbe sẹtin ta emwi ne a yae kha ma mwẹ.”
10Iran ni gu ẹe zẹ iro keghi tama rẹn wẹẹ, “Orhiọnkpa i rre agbọn na ne ọ gha sẹtin ta emwi ne u ho ne u rẹn na ma ruẹn Umogun. Ọba ọkpa i rrọ ya sẹ egbe ne ọ ghi kpọlọ sẹ kevbe ne ọ ghi mwẹ ẹtin sẹ, ne ọ he nọ egbe ẹmwẹ vberriọ vbe obọ ọbiro ẹre, kevbe ebo edunna kevbe avbe azẹn. 11Emwi ne u nọ na Umogun, wegbe sẹrriọ wẹ ọmwa ọkpa ne ọ gha sẹtin ru ẹe nuẹn ẹ i rrọ, sokpan a ma wẹ avbe ẹbọ, sokpan, iran i gu emwa nagbọn di ihọkpa ya.”
12Rhunmwuda emwi na, ohu nọkhua keghi mu ọba, ọ na wẹ ne a giagia iran hia ni gu ẹe zẹ iro uhunmwu kua vbe Babilọn. 13A keghi rhunmwuda ọnii tae wẹ ne a gbele iran hia a, ya sẹ egbe Daniẹl, kevbe avbe esiọre.
Osanobua Rhie Imina Ni Ma E Daniẹl
14Ẹre Daniẹl na bu Ariọk ne ọ re ọkaolotu iran ne ọba ya khẹ egbe, ne a vbe tama wẹ ne ọ gbele iran hia gha khian. Ọ ghi hẹko mwamwa vbene irẹn gha guan hẹ nẹ. 15Ọ keghi nọ Ariọk emwi ne ọ ya ọba gie uhunmwu ne ọ wegbe vberriọ. Ẹre Ariọk na tama e Daniẹl, emwi ne ọ sunu.
16Ọwarọkpa nii, e Daniẹl keghi bu ọba gha khian, ọ keghi nọ rẹn wẹ ne ọ ye rhie ẹghẹ ne irẹn, ighe rẹn gha ta ma ọba emwi ne a ya nene imina kha. 17Ẹre Daniẹl na gha rrie owa, ọ na ya tama avbe ihua ẹre ighe Hananaia, e Misiaẹl kevbe Azaraia, emwi ne ọ sunu. 18Ọ na tama iran wẹ ne iran na erhunmwu ghe ọba ẹrinmwi ne ọ tohan iran, ne ọ vbe rhan otọ oro nii ma iran, ne a ghẹ miẹn ehe na gbele iran an ba avbe iguọbaziro nekpa vbe Babilọn. 19Vbe Asọn nii zẹẹ, a keghi ta imina nii ma e Daniẹl vbe aro umian, rẹn keghi rho Osanobua ẹrinmwi:
20“Osanobua wan, ọ vbe mwẹ ẹtin!
Wa rho ẹre ẹdẹ kevbe ẹdẹdẹmwẹdẹ.
21Rẹn ọ re ọ kha yan ẹghẹ kevbe ukpo;
rẹn ọ re ọ ma ọba, rẹn ọ vbe ya iran owẹ yotọ,
rẹn ọ re ọ rhie ẹwaẹn kevbe irẹnmwi ne ọmwa.
22Ọ rhie emwi ni dinmwi kevbe ni re ọghe oro ma emwa
ọ rẹn emwi ne a rhie lẹre ye uwu ebiebi,
uwanmwẹ ọre ọ lẹga rẹn tobọ irẹn.
23I rho ruẹ, I ya ọghọ nuẹn
Osanobua enikaro mwẹ
u rhie ẹwaẹn kevbe ẹtin mẹ nẹ
u họn erhunmwu mwẹ nẹ
u na vbe tama ima, emwi ne a gha tama ọba.”
E Daniẹl Taa Imina, Ọ Keghi Vbe Rhaan Otọ Ẹre Ma Ọba
24Ẹre Daniẹl na bu Ariọk, ọmwa ne ọ ba gie wẹ ne ọ giagia avbe eguọbaziro uhunmwu kua. Ọ tama rẹn wẹẹ, “Ghẹ gbele iran an. Rhie mwẹ bu ọba, I gha tama rẹn emwi ne a ya imina rẹn kha.”
25Vbe ọwarọkpa nii, Ariọk keghi rhie Daniẹl bu Nebukiadneza gha dee. Ọ tama ọba wẹẹ, “I miẹn ọkpa ne ọ gha sẹtin ta emwi ne a ya imina ruẹn kha vbe uwu avbe ivbi e Ju ni rre iwe, Umogun.” 26Ọba keghi tama e Daniẹl (rẹn ọ re a vbe tie ẹre Bẹtẹsiaza) wẹẹ, “U gha sẹtin tama mwẹ imina ne I minaẹn kevbe emwi ne a yae kha ra?”
27E Daniẹl keghi wanniẹn wẹẹ, “U gha tọ u kpẹre, Umogun, azẹn ọkpa i rrọọ, ra ọbo edunna, ra ọbiro ra iwe uki, ne ọ gha sẹtin ta ọnii ma ruẹn. 28Sokpan, Osanobua ọkpa ne ọ rhie emwi oro ma emwa rre ẹrinmwi. Rẹn tama ruẹn nẹ emwi ne ọ ra do sunu ẹdẹnakhuẹ. Umogun. Banbanna nian, I ra ta imina nii nu u miẹn vbe u vbiẹ ma ruẹn.
29“Ugbẹn vbe u ghi vbiẹ, Umogun, u keghi mina vbekpa ẹdẹnakhuẹ, Osanobua ne ọ rhie emwi oro ma emwa, keghi rhie ma ruẹn emwi ne ọ ra do sunu.
30“Wanwanna nian, a rhie emwi oro na ma mwẹ, ẹ i re wẹ rhunmwuda ighe I wan sẹ emwa nekpa, sokpan rhunmwuda ne u miẹn ehe na rẹn emwi ne a ya imina ruẹn kha, Umogun, kevbe ne u rẹn emwi ne a ya iro ne a mu guẹ kha.
31“Ugbẹn vbe u ghi rre imina, Umogun, u keghi miẹn ọmwa ne a maẹn ọkpa gẹdẹgbẹẹ, ọ keghi mudia ye odaro ruẹ ọ fi wainwain, ọ mose, ọ keghi vbe mu ọmwa ohan vbe a gha ghe ẹre. 32Igoru ne ọ ghi mose sẹ ọ re a ya maa uhunmwu ẹnrẹn, a keghi ya esiliva maa ẹwẹe, kevbe avbe obọ ẹre, ẹkun kevbe ikebe ẹre, a keghi ya oze maa enii, 33a ya ematọn maa avbe erhan owẹ ọre, avbe atataowẹ ọre, a keghi ye azẹguagua ematọn kevbe obuẹ maẹn. 34Ugbẹn vbe u ghi wa ghe ẹre, okuta nọkhua ọkpa keghi kpẹngiẹn vbe uhunmwu oke ne ọ yo, vbene ọmwarhọkpa ma na vbe ya obọ kan rẹn, ọ keghi degbe atataowẹ ọmwa ne a maẹn na ne ọ re azẹguagua ematọn kevbe ekẹn, ọ keghi rẹnkhẹẹn ọẹn ruan. 35Vbe ọwarọkpa nii, ematọn ne ọ rrọọ, kevbe obuẹ, kevbe oze kevbe esiliva kevbe igoru na wa rẹnkhẹẹn uan, ọ yevbe ebubẹ vbe ehe ne a na dunmwu ọka vbe ẹghẹ okhuakhua, ẹhoho keghi kpolo ehia gha rrie, a na wa ho ehia bẹkun. Sokpan, okuta ne ọ rrọọ keghi do digba khian oke nọkhua, ne ọ wa gba otọe agbọn hia.
36“Nene imina ọ re ọnii khin. Banbanna nian, I ra ta emwi ne a ya ẹe kha ma ruẹn, Umogun. 37U gha tọ u kpẹre, Umogun, wẹ ọrọre ne ọ ghi kpọlọsẹ vbe uwu avbe ọha hia. Osanobua ne ọ rre ẹrinmwi ọ re ọ ma uwẹ ọgbaisi, ọ keghi rhie ẹtin kevbe iwegbe kevbe uyi nuẹn. 38Ọ ya uwẹ ru ne ọ khaemwisẹ yan ehe ne agbọn sẹe ehe ne ọ rhanmwẹ nẹ, ne ọ khaemwisẹ yan avbe aranmwẹ kevbe ahianmwẹ. Wẹ ọrọre uhunmwu ne ọ re igoru ne ọ rrọọ. 39Wẹ gha ghi vbe ru ọwuẹ gberra nẹ, arriọba ọvbehe gha vbe guakpao sokpan ẹ i ra kpọlọ vba ọwuẹ, vbe iyekọni, arriọba ogieha ne ọ gha vbe gha re ọghe oze, ọ gha vbe khaemwisẹ yan otọe agbọn hia.
40“Vbe iyekọnii, arriọba ogienẹ gha vbe guakpao, ọ gha wegbe zẹ vbe ematọn, ne ọ dunmwu, kevbe ne ọ rẹnkhẹn emwi hia a. Erriọ rẹn gha rẹnkhẹn, ọ gha vbe dunmwu avbe arriọba ni ka rrọ hia a. 41U vbe miẹn wẹ owẹ ọre kevbe ikpinhianwẹ ẹre kegha re azẹguagua ekẹn kevbe ematọn. Ọnii rhie ma wẹ, arriọba ne ọ gha wannọ egbe nọ. Ọ gha vbe mwẹ ẹtin eso ne ọ gha ye vbe ọghe ematọn, rhunmwuda a ya ematọn gua obuẹ nii. 42Avbe ikpinhianwẹ ọre ne obọ ọkpa na re ematọn, obọkpa re obuẹ, rhie ma wẹ ihe eso vbe arriọba nii gha wegbe, ihe eso vbọ i ra wegbe. 43U vbe miẹn wẹ a ya obuẹ gua ematọn nii. Ọnọna rhiema wẹ, avbe iran ni khaemwisẹ vbe otọe nii gha hia ne iran ku ẹgbẹe iran gbe vbekpa ne iran gha na gha ya ọmọ ne egbe rhie rọnmwẹ, sokpan ẹ i ra gba ne iran zẹ vbene obuẹ kevbe ematọn i sẹtin khian ọkpa.
44“Vbe ẹghẹ avbe nikhaemwisẹ na, Osanobua ẹrinmwi gha mu arriọba ne ẹ i ra fo vbotọ gbọ. A i ra vbe sẹtin khọn rẹn ẹdẹ, sokpan, rẹn gha fuẹn avbe arriọba nii fẹẹrẹ, rẹn ghi gha rrọ ẹdẹdẹmwẹdẹ. 45Wẹ miẹn vbene okuta ọkpa kpẹngiẹn vbe uhunmwu oke ne ọ yo ọkpa hẹ vbene ọmwa rhọkpa ma na ya obọ kan rẹn, kevbe vbene ọ dekun ọmwa ne a ya ematọn oze, obuẹ, esiliva kevbe igoru ma nii. Te Osanobua Nọkhua tama ruẹ emwi ne ọ gha sunu ẹdẹ nakhuẹ, Umogun. I tama ruẹn nẹ nian, emwi ne u mina miẹn zẹẹ, I vbe ta emwi ne a gele yae kha ma ruẹn nẹ.”
Ọba Saan E Daniẹl Ẹse
46E Nebukiadneza ne Ọba keghi ghughẹ ya uhunmwu rhanmwẹ otọ, ọ na wẹ, ne a zọ ese kevbe ne a vbe yo imuohan gie Daniẹl. 47Ọba keghi kha wẹẹ, “Osanobua ruẹ ọrọre ne ọ kpọlọ sẹ ẹbọ hia, e Nọyaẹnmwa avbe eniyaẹnmwa kevbe ne ọ we oro ua ma emwa.” 48Ọ keghi rhie Daniẹl ye ukpo ne ọ yo, ọ keghi ya emwi nibun hia zẹ ọhẹ ne ẹẹn, ọ mu otọe Babilọn ne ẹẹn gha gbearoghe, ọ keghi ya ẹe ru ọkaolotu avbe iguọbaziro hia. 49Zẹ vbene Daniẹl nọ rẹn, ọba keghi mu e Babilọn ne Siedrak Mesiak kevbe Abẹdnigo gha gbearoghe. Sokpan e Daniẹl kegha rre ẹguae Ọba.
Currently Selected:
Daniẹl 2: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
