Daniẹl 12
12
Ẹghẹ Ufomwẹ
1Odibosa ne ọ yọ ukpọn eto ovbiohuẹ nii keghi kha wẹẹ, “Ọ ghẹ ghi sẹ ẹghẹ nii, e Maikẹl ne ọka odibosa ne ọ gbearoghe avbe emwa ruẹn gha yegbe ladian, ẹghẹ orueghe ghi rre, egbe ne ọ he khọrhiọn sẹẹ, ke ne a ya bu agbọn tua agbọn. Ọ gha sẹ ẹghẹ nii, avbe ivbi ẹvbo ruẹ ne a gbẹnnẹ eni ẹnrẹn ye ebe Osanobua, a gha miẹn iran fan. 2Nibun vbe uwu iran ni wulo nẹ, gha dọlegbe gha rre agbọn, eso gha wa gha rrọọ ẹdẹdẹmwẹdẹ, eso ghi gha re ne a faraa ẹdẹdẹmwẹdẹ. 3Iran ne ọkaolotu ni wan ni rrọọ ghi gha fi wainwain zẹ vbe iso. Avbe emwa ni vbe ma emwa re ne iran gha ru emwi ne ọ gbae, gha fi wainwain zẹ vbe avbe orhọnmwẹ ni rre iso.”
4Ọ keghi tama mwẹ wẹẹ, “Banbanna, e Daniẹl, gue ebe nii ne u gbae rhie hin rre ọ te ya sẹ ufomwẹ agbọn. Vbe uwu ẹghẹ na nian, emwa nibun gha wa mu ẹghẹ iran rhia, iran ghi gha hia ne iran rẹn otọ emwi ni sunu khian.”
5Ẹghẹ nii, I keghi ya bẹghe vbe arhin eva mudia ye ọkpẹn ẹzẹ ọkpa vbe obọ ọkpọkpa. 6Ọkpa vbe uwu iran keghi nọ odibosa ne ọ mudia ye odẹ uhunmwu ẹzẹ wẹẹ, “Vbe ọ gha kpee sẹhẹ avbe emwi ọyunnuan na hia ke do sẹ ufomwẹ?”
7Odibosa nii keghi viọ obọ da iso, ọ keghi ye eni Osanobua etẹbitẹ yan. I keghi họn vbe ọ khare wẹẹ, “Ukpo eha vbe ukhiọnmwẹ khian gha nọ. Emwi na hia gha sunu fo nẹ a ke dobọ emwa Osanobua ne a zẹ kpokpo yi.” 8I họọn ẹmwẹ ne ọ tae sokpan I ma rẹn emwi ne a yae kha. Rhunmwuda ọnii, I keghi nọ rẹn wẹẹ, “Sokpan, vbe ena hia ra ya sẹ ufomwẹ hẹ, enọwanrẹn?”
9Rẹn keghi wanniẹn wẹẹ, “E Daniẹl te u gha do rrie, rhunmwuda, avbe ẹmwẹ na, a ma ho ne ọmwarhọkpa rẹn ẹmwẹ na, a ma ho ne ọmwarhọkpa rẹn ọnrẹn, te a vbe rhie ẹre lẹre ufomwẹ te do rre. 10A gha ye emwa nibun khian nihuanrẹn. Iran ne emwa dan i ra rẹn otọ ẹre iran ghi ye gha ru emwi dan khian. Iran ni wan ọkpa ọ re ọ gha rẹn otọ ẹre.
11“Ke ẹghẹ ne a ya dobọ ese ẹdẹgbegbe yi, ọnii nọ wẹ ke ẹghẹ Ọkhọ Nọgborrirri gha dee, ikpẹdẹ ekigbesiyisẹn yan arria ehan (1,290) gha gberra. 12Afiangbe nọ ne iran ni gha mudia gbain ya sẹ ẹghẹ ne ikpẹdẹ, isẹnirrọvbe ikiọkhọe yan arria ehan (1,335) gha na gberra!
13“Wẹ nẹ Daniẹl mu uhunmwu ke ọe ya sẹ ufomwẹ. Ẹghẹ nii, u gha wu, sokpan u gha rhiọrre ne a san ruẹn ẹse vbe ẹdẹ okiekie.”
Currently Selected:
Daniẹl 12: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
