Emọs 5
5
Utiemwẹ Ye Afiekhọewerriẹ
1Wa ne ivbi Izrẹl wa danmwehọ
ihuan orinmwi ne I ra so yan uwa:
2Izrẹl ne uvbi de guọghọ ua,
ẹ i ghi kpaegbe vbe otọ ẹdẹ!
A he ẹe ye ehe ne ọ lovbiẹ yi vbe otọ.
A ma miẹn ọmwa ne ọ si ẹe kpaegbe.
3E Nọyaẹnmwa ne Udazi khare wẹẹ, “Ẹvbo ọkpa vbe Izrẹl ghi gie ivbiyokuo arriaisẹn ladian, sokpan, iyisẹn ọ re ọ ghi ra werriegbe rre vbọ; ẹvbo ọvbehe ghi vbe gie iyisẹn ladian, sokpan, igbe ọ re ọ ghi ra dọlegbe rre vbọ.”
4E Nọyaẹnmwa tama ivbi Izrẹl wẹẹ, “Wa bu mwẹ gha dee, wa gha di agbọn ya. 5Wa ghẹ yo ya ga vbe Biẹsiẹba. Wa ghẹ yo ya gualọ mwẹ vbe Bẹtẹl, e Bẹtẹl gha la ọrhiae rrie. Wa ghẹ ye Gilgal, a mu emwa ni rrọ uhunmwu da iwe nẹ.”
6Wa bu e Nọyaẹnmwa gha khian, wa gha di agbọn ya. Adeghẹ wa ma yo, ọ gha hẹ rhu ivbi Izrẹl zẹvbe erhẹn. Erhẹn nii gha giẹn iran an ighe iran ni rre Bẹtẹl, a i ra vbe miẹn ọmwa ne ọ gha sẹtin dọ ẹre yọ. 7Ọghe uwa fo nẹ, wa ni khiẹn ohiẹn bu, ni vbe mu emwa buzọ ẹre aro ua vbe emwi ne ọ wa khẹke iran!
8E Nọyaẹnmwa ọ re ọ yii avbe orhọnmwẹ,
iyọkhọkọ kevbe Agho.
Ọ ye ebiebi khian uwanmwẹ
kevbe avan khian asọn.
Ọ gha datie amẹ ni rre okun
ọ ghi hihiẹ ọe ku otọ.
E Nọyaẹnmwa ọrọre eni ẹnrẹn.
9Rẹn ọ re ọ zẹ ọkhọ rruan iran ni wegbe
kevbe emwi ne iran ya khẹ egbe.
10Wa ni khuiwu iran ni gbeta ye a i ta ẹmwata unu vbe iko, iran ghi rhie ẹmwata ne ọ rrọ ta. 11Wa wọ avbe ivbiogue uhunmwu, wa keghi vbe do iran ọka viọ. Rhunmwuda ọnii, wa i yin owa okuta ne mose mose ne uwa bọlọe, ra na uwa da ayọn ne ọ ke ugbo azara ne uwa gbe rre. 12I rẹn vbene orukhọ uwa khọrhiọn sẹ hẹ, kevbe vbene a i ghẹru ne uwa ru vbe bun hẹ. Wa ọ re ọ zẹ emwa ẹmwata owẹ, wa ọ re ọ rhie igho odieke, wa i gia bu ohiẹn ẹmwata ne ivbiogue vbe iko. 13Rhunmwuda ọnii, ọmwa wa hẹko hunwan ọ re ọ maa sẹ vbe egbe ẹghẹ dan vbenian!
14Wa rhie ekhọe yọ ne uwa gha ru emwi ne ọ gbae, ẹ i re emwi dan, ne uwa miẹn ehe na diagbọnya. Ẹghẹ nii ọ re Nọyaẹnmwa ne Oghodua gha na yaba uwa zẹ vbene uwa ta ẹe na ighe ọ yaba uwa.
15Wa gie emwi dan gha sọnnọ uwa, wa gie emwi esi gha yẹ uwa, ne uwa vbe miẹn wẹ ohiẹn ẹmwata ọkpa ọ re a bu vbe iko. Ughaghe, e Nọyaẹnmwa gha mwẹ itohan ghe iran ni ghi rre agbọn vbe ivbi ẹvbo na.
16Rhunmwuda ọnii, e Nọyaẹnmwa ne Udazi ne Oghodua khare wẹẹ, “Eve kevbe ugomwẹ akhiẹ gha rre ore ẹvbo nii. Uhin wẹ te a ra ya tie avbe ọgbugbo nii iran do deba iran ni miẹn igho viẹ eve orinmwi, gha khiẹ emwa ni wulo. 17Ugomwẹ gha rre uwu ogba azara hia. Emwi na hia sunu rhunmwuda, I dee ra do rri uwa oya.” Erriọ Nọyaẹnmwa khare.
18U miẹn vbe ọ gha ba so uwa hẹ wa ni rhie aro ye odẹ gha khẹ ẹdẹ e Nọyaẹnmwa. De emwi ne uwa ro ighe wa gha miẹn vbọ yi? Ẹdẹ ne ọ so ebiebi khian gha nọ ne uwa, ighe ẹ i re ẹdẹ uwanmwẹ.
19Te ọ ra yevbe ne ọmwa lẹ ne oduma, ọ na dekun akpakomiza! Ra ọmwa ne ọ lẹ la owa, ọ na rhie obọ yan ekẹn, ẹyẹn keghi sa a ẹe. 20Ebiebi ọ re ẹdẹ e Nọyaẹnmwa rhie dee ighe ẹ i re uwanmwẹ, ẹdẹ omẹ nọ, urramwẹ ẹdẹ i rrọ hiehiere.
21E Nọyaẹnmwa khare wẹẹ, “Ugie ugamwẹ ne uwa do hia wa sọnnọ mwẹ, I i ghi ho ne I bẹghe iran. 22Wa gha viọ emwi imuohan ne a giẹn uan, kevbe ọghe ọka gunmwẹ, mẹ i ghi miẹn uwa re. Mẹ i ghi rhan obọ miẹn avbe aranmwẹ ne uwa bẹre ne uwa ya gha ha oko gunmwẹ. 23Wa dobọ ihuan owogho ne uwa so yi; I i ghi ho ne I họn ẹmwẹ akpata ne uwa kpe. 24Ye ihe enena, wa gie ohiẹn ẹmwata gha lẹ vbe ẹzẹ, kevbe uyinmwẹ ẹmwata zẹ vbe ẹzẹ ne ẹ i ka.
25“Ivbi Izrẹl, I ma miẹn uwa ese ra emwi imuohan vbe ukpo iyeva nii ne I ya viọ uwa la uwu ato gberra. 26Sokpan, banbanna nian, rhunmwuda ne uwa na ya gha gho e Sakut ne ogie ẹbọ uwa, kevbe Kaiwan ne ẹbọ orhọnmwẹ uwa, te uwa ra hẹ avbe ẹbọ na vbe uhunmwu. 27Vbe ẹghẹ ne I gha na viọ uwa gha rrie iwe vbe odẹ vbe a gberra e Damaskọs nẹ.” Erriọ Nọyaẹnmwa ne a tie ẹre Osa ne Oghodua khare.
Currently Selected:
Emọs 5: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
