Emọs 2
2
E Moab
1E Nọyaẹnmwa khare wẹẹ, “Te ivbi e Moab wa gha ru orukhọ yan egbe yan egbe, rhunmwuda ọnii, I gha wa rria iran ikhi ye emwi na. Iran wa ye ugboloko avbe Idọm khian ne a ma ya ọghọ na, vbe ekpa ne iran na giẹn iran vbe erhẹn ya khian emuẹn. 2I gha rhu erhẹn ye otọe Moab, I ghi vbe giẹn odin e Keriọt. Uwu owogho okuo, ọre ivbi e Moab ra wulo yi, ehe ne ivbiyokuo na goo, avbe okpe vbe tu. 3I gha gbe ogie Moab kevbe ọkaolotu otọe nii hia.”
E Juda
4E Nọyaẹnmwa khare wẹẹ, “Te ivbi e Juda wa gha ru orukhọ yan egbe yan egbe, rhunmwuda ọnii, I gha wa rri iran oya ye emwi na. Iran zan iruẹmwi mwẹ, iran ma vbe ya iyi mwẹ ru emwi. Ẹbọ ohoghe ne avbe erha iran ghoro, vbe dee iran odẹ nẹ, 5rhunmwuda ọnii, I gha rhu erhẹn ye Juda I ghi vbe giẹn avbe odin e Jerusalẹm ruan.”
Vbene Osanobua Buu ohiẹn Izrẹl Hẹ
6E Nọyaẹnmwa khare wẹẹ, “Te ivbi Izrẹl wa gha ru orukhọ yan egbe yan egbe, rhunmwuda ọnii, I gha wa rria iran ikhi ye emwi na. Iran khiẹnnẹ iran eviẹn ighẹ emwa ẹmwata ni ma sẹtin ha osa ne iran re, avbe ivbiogue ne ẹ i ra miẹn igho ya ha osa ibata e esanda. 7Iran ye owẹ rrilo ovbiogue kevbe ne ẹ i mwẹ ginna otọ, iran keghi vbe sua ovbiogue hin urodẹ rre. Ọmọ kevbe erha ẹe ghi gha gu ọmọ okhuo ọviẹn ọkpa ru emwi, iran na la ekpa ọnii ya iruẹn ye eni mwẹ nọhuanrẹn. 8Vbe owa ugamwẹ hia, ukpọn ne emwa miẹn ivbiogue re dayi rhunmwuda osa, ọ re iran ya vbiẹ. Uwu Ọgua Osa Osanobua iran, ọre iran na da ayọn ne iran miẹn emwa ni rri iran osa ẹre.
9“Vberriọ, rhunmwuda uwa, wa ne emwa mwẹ, ọ re I na fuẹn iran an fẹẹrẹ ighẹ ivbi Amọri, emwa ni zogọ zẹ vbe erhan isida, iran keghi vbe wegbe zẹ vbe okan. 10I viọ uwa ke Igipt ladian, I na su uwa la ato gberra vbe ukpo iyeva, I na mu otọ ivbi Amọri ne uwa, ne ọ gha re ọwua. 11I hannọ eso vbe ivbi uwa zẹ, ne iran gha re akhasẹ, kevbe eso vbe avbe igbama uwa, ne iran do gha re Nazarait. Ohoghe nọ ra ivbi Izrẹl? Mẹ ne Nọyaẹnmwa guan nẹ. 12Sokpan, wa kegha ya ayọn ne Nazarait da, wa na wẹ ne avbe akhasẹ ghẹ ta uhunmwu ne I gie iran re ma uwa. 13Banbanna nian, te I ra piẹnpiẹn uwa mu otọ zẹ vbe okotọ ne a ya kun ọka. 14Ya sẹ egbe iran ni guara rhulẹ, ọkpa ne ọ ra miẹn uhunmwu i rrọọ, ẹtin gha fo iran ni wegbe avbe ivbiyokuo i ra vbe sẹtin sinmwi uhunmwu iran ye agbọn. 15Iran ni fi uhanbọ i ra sẹtin rrọ emwi rhọkpa, iran ni kakabọ rhulẹ i ra sẹtin lẹ fe, iran ni hin ẹsin i vbe miẹn uhunmwu rhie ladian. 16Vbe ẹdẹ ne ẹdẹrriọ, ovbiyokuo ne ọ ghi wegbe sẹ, gha viọ emwi igbinna rẹn kua, ọ ghi gbe owẹ ye ulẹ.” E Nọyaẹnmwa taa ẹe nẹ.
Currently Selected:
Emọs 2: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
