Be ya a Roma 9
9
Ehwya è swa ara be ya a Esǝrela
1M jan nye anga ebi, abu ende e tsǝ́ekǝ̀n no a chu Kristi, m fe m anga fwafe ra, shwa ekam mam adi efka mo Engǝ́ Echanwenwen jan anga jan, fwa ena no ebi. 2Adi ebi, nya mam bgen no àywá ngge m no a tswa tsuruku ekǝnkǝn nya nwone e kpo ye nya anga ra, a chu be ya mbwe m be ya a Esǝrela. 3Ge è ma no mò ebwejwa a zǝn be, ma à bgó ara Ehwya ge e to m ebwe a chu ngge ge e du jan me e fwa m ende e ba Kristi anga ra, a chu be nwenjwa m ya a efi mo je no akan ángá, 4be ya a Esǝrela. Ehwya è swa be nè bwe be, be e nga mbǝgya mbwe. Gè fitú ara be egǝ̀n mbwe, gè fan ara efan ngge be, nè no ara be edon mbwe. Ba be ya e yi abu ba fen Ehwya adi efwa ebi ángá. Ba be ya Ehwya è sen ara vǝ embo ngge be ángá. 5Ba be ebi mo be ebǝ ata mo je ya è no ekpe ekpe ángá. Kristi adi zǝno enom mbwe abu nobǝ, è kpe efi no ngge be. No a fwa efwam, be nobǝ be e tàn Ehwya e no tì a chu binbin mo be mò ángá. Ge e no enò.
6M jan m nye anga jan Ehwya bwekǝ̀n a ti ye vǝ-esenm mbwe a gè sen ngge be ya a Esǝrela ángá ra ra. Ehwya chà bwe ye nó ra. Adia fwa ye binbin mo be ya be mbwa be a tswa efi mo be ya a Esǝrela, a be ya Ehwya è swa ara, jan be e no be nobǝ mbwe ángá ra. 7Adi fwa a be no be ebi mo Ebrayi ángá, tú ye jan ba mbǝgya mo Ebrayi adi ebi ra. Ehwya è jan Ebrayi jan, “A be ebi mo Eshaku kpwà ara a ba ká be abu be ebi mbo.” 8Ano ge no enò, fwa ye binbin mo mbǝgya a bè mbwà no Ebrayi, e no mbǝgya mo Ehwya ángá ra. Kpwà mbǝgya a Ehwya è sen ara vǝ ngge Ebrayi ángá, a be ya be ká be jan ba mbǝgya mo Ebrayi. 9Ena a mò a vǝ-esenm hon jan anga, “Abu atan enó adi je efwe, m twabǝ a bwa, Sariya a mbwa nwen ndedon.”
10Nwen ndedon hon ena a ebǝ je Eshaku. Atan a Eshaku fǝ́ Rebeka ángá, gè mbwa mbǝgya ngǝfen fà. 11Tea atan a bè chà mbwa be be ngǝfen hon ra, atan a bè chà bwe be mò e no esese, eno e ra mò esera ra, Ehwya è jan fwa ngge Rebeka. (Fwa hon ena tú jan, Ehwya swa nobǝ anga adi edgyan mbwe.) 12Gè jan ye jan, “Nwenfi a bwe nwenbwa mochi.” 13Ge no ebam adi zǝn efki a tswa Fwaebam jan, “Yakubu m̀ dgyan, tea Esuwa m̀ ze ye.”
14Ekǝnggwa mò a ja jan ángá a ano? Ehwya a ya amme? É yé, ge fwa didi ye enò ra. 15Adia gè jan Mosa jan,
“Ma dwafǝ mo ende a m dgyan
me e dwafǝ mbwe,
ngge ma di ashi mo ende a m dgyan
me e di ashi mbwe ángá.”
16Enona, ge fwa ye a chu mò a nobǝ dgyan eno e ra mò a ge bwe anga ra, tea a chu fǝedwam mo Ehwya. 17Ehwya è jan Firona a tswa Fwaebam jan, “M̀ dwa o tì evǝa me e ti o e tú echakpo mam adi mochi, a chu be mò a ma bwe ngge bo ángá, evǝa me e bwe binbin mo be nobǝ a tswa zǝnchaje be e yi ti mam.” 18Ano fwa hon no enò, Ehwya dwafǝ mo be ya ge dgyan ge e dwafǝ be, n du chu echam a chu be ya ge dgyan be e no ya chu echam ángá.
19Ano ge è ma no enò, ehwyà ende akan a engga mo nye a ká m eka jan, “Ano Ehwya bwe mò anga enò, ano bwe a ge, ge chà tso je efya anga? Ara kǝn ara ge e jan e ngga ye jan ge e bwe ye mò a ge nda anga ge e bwe ángá ra?” 20Shushwa m, a bo wa ara, a we ká Ehwya eka? Nobǝ kukwa kpwà ara. “Chú mò a be mmò emmòm, a ká ende è mmò ye ángá eka jan, ‘Ano bwe a ge o mmò m no enó?’ ” 21Chú ya hwa embwem fwa ye ngge echakpo a chu mo bi embya akan, a ge ti a mbwe hwa, mo ekpengga mo esǝ, eno e ra ge e ti bi embya hon ti e mbwe hwa mo mochi mo nogwa nogwa ra?
22Eni fwa ye abu ge no ngge Ehwya ra? Ano Ehwya dgyan ge e tú engo mbwe, ngge be nobǝ be e yi edgwa mbwe tea di jan ge e bon-ekǝ̀n a chu be nobǝ ya e no ara kenm be e fo ju a chu engo hon. Chú ge fwa ye ngge echakpo a ge e bwe nó ra? A chu be ya e no ara kenm be e tkò be ángá, ge fwa ye ngge echakpo a ge e bon-ekǝ̀n a chu be ra? 23Gè bwe enò evǝa ge e tú edgwa mbwe. Edgwa hon nwone a gè fitu je, a je ya a gè dwa ara fǝ mo je, a je ya a gè bwese nyi ara ekpe ekpe, evǝa je e cha edgwa a zǝn ye ángá. 24Tú anga èé a je, ya a gè fǝ ara je dwa ángá, fwa ye a zǝn be ya a Yahuda kpwà ara ra, tea a zǝn be ya e fwa be ya a Yahuda ra gaten. 25A chu be ya e fwa be ya a Yahuda ra, Ehwya jan anga a tswa Afketa mo Hosiya jan,
“Ma fǝ́ be ya è fwa be be nobǝ mam ra,
jan, ‘ba be nobǝ mam’,
ngge ma fǝ́ be ya m̀ dgyan m ra, jan,
‘ba be ya m dgyan anga.’ ”
26Ngge,
“Adi zǝn nwone a Ehwya è jan be jan,
‘Nye fwa nye be nobǝ mam ra,’
ba jan be a zǝn jan,
‘ba mbǝgya mo Ehwya e no angǝ ángá.’ ”
27Efojan Eshaya è jan fwa a tswa dwa etàn a chu be ya a Esǝrela jan,
“Bi adia mbǝgya mo ya a Esǝrela fí
no abu fwen akwabǝ a tswa sǝn ángá,
ya a be ti a vǝ́ be ángá fwa be embo ra.
28Adia a dgyen ye fon ra,
Ehwya a kpèn be nobǝ a tswa
zǝnchaje ena kǝ́n.
Ga gwa ye mò akan ra.”
29Ge no tén abu efojan Eshaya è jan ekwafya jan,
“Ano Etsodwe e no Ebubin a chu
binbin mo be nobǝ ángá,
éè chà kpu be ya ehwyà mo je nyi
ye a buetkwa ra,
jà a no abu eten Sodoma,
jà a no je angǝ ra,
jà a no abu eten Gomora.”
Ebgó mo Bulu a chu be ya a Esǝrela
30Ekǝnggwa mò a ja jan ángá a ano? Be ya e fwa be ya a Esǝrela ra, ya è ba be efwa mo mò esese chafya mo Ehwya ra, be nga ara ya esese mbwe chafya mo Ehwya a chu chaebi a be no ngge nó a chu ye ángá. 31Tea be ya a Esǝrela ya è tkyan be e no esese ngge Ehwya a chu ebam mo edon ángá, bè ben be nó ra. 32Mò e bwe bè ben be nó ra a ano? Bè ben be nó ra adia bè ka anga jan ba ben nó a chu mò esese a bè bwe ángá, fwa ye a chu shwa enyim a chu Ehwya ra. Bè tswa fù a chu ten hon e du be nobǝ be tswa fù anga. 33Ge no ebam adi Afketa mo Ehwya jan,
“Di, m nyi ten akan no a Siyona,
ten e du be nobǝ tswa fù ángá,
ten ekeke nwone e du be nobǝ
a kpo kpì ángá.
Tea ende e tsǝ́ekǝ̀n a chu ye,
ba no a didi be ye ebgenju ra.”
Currently Selected:
Be ya a Roma 9: ICH
Highlight
Copy
Compare
Share
Want to have your highlights saved across all your devices? Sign up or sign in
© 2024 Luke Initiative for Scripture Translation
