Be ya a Roma 2

Ehwya cha ebgan sǝ́ ye be nobǝ adi kǝ́n ekpènm mbwe ra

1Enona, o janvǝ́ a ti mbo chu o ra, a bo ende e kpèn nobǝ efki kǝ́n anga, adia abu atan engǝ ra, a o kpèn nobǝ kǝ́n anga, o kpèn anga chu o kǝ́n adia a bo e chu o bwe tén be mò hon anga. 2Je yi jan kǝ́n ekpènm mo Ehwya a chu be ya e bwe yishwa be mò ena anga, no a chu ebi. 3A bo nobǝ kukwa, o kpèn be nobǝ kǝ́n anga, tea o bwe mò hon anga èé bo, o ka anga, o tse a ga adi kǝ́n ekpènm mo Ehwya? 4Ano bwe a ge o dipin esese echa mo Ehwya è bwe anga, fǝzǝn edifǝm mbwe ngge ekǝ̀n-ebonm mbwe? O yi mbo jan Ehwya tú o esese ena anga evǝa we bwa e twa etwa ra?

5Tea a chu chu echam mbo ngge adia o dgyan mbo we gwa mò e no esera ra ángá, o tefǝn ten-ekǝnm nyi chu o anga mo nò engo mo Ehwya, atan a ba fi a jan kǝ́n ekpènm mbwe adi ebi ángá. 6Ehwya a no egwa egwa buhwen e de a fǝ ngge mò a gè bwe ángá. 7A zǝn be ya è chungǝ́ nè tkunda egǝ̀n, edgwa ngge zǝno e no a fwa efwam a zǝn Ehwya adi esese ebwem, Ehwya a no be nya e no a fwa efwam ángá. 8Tea be ya è dgyan kpwà chu be, ya è se ebi n ba ebgen anga, Ehwya a kpwa be ngge engo ngge tsuruku efkum mbwe. 9Ekan ngge zǝno ekǝnkǝn nya a bwa a chu egwa egwa e bwe ebgen anga. Ge kwafya a bwa a chu be ya a Yahuda, kǝnggwa a chu be ya e fwa be ya a Yahuda ra. 10Tea Ehwya a no ya e bwe mò esese anga egǝ̀n, edgwa ngge adgye. Ge kwafya a bwe nó a chu be ya a Yahuda, kǝnggwa a chu be ya e fwa be ya a Yahuda ra. 11Adia Ehwya kpèn ye be nobǝ kǝ́n anga a tswa ebgan echasǝm ra.

12Binbin mo be ya è bwe ebgen, ya è yi be edon mo Mosa ra, ba tkò be be adi edon mo Mosa ra, ngge binbin mo be ya edon hon bin be no, bwe ebgen, ba kpèn be kǝ́n abu edon hon jan anga. 13Fwa ye be ya e fo edon anga, a no esese chafya mo Ehwya ra, tea be ya e tse edon hon anga. Ba ya a Ehwya a jan be fwa be ngge ebgen ra. 14(Eshwen, ano be ya e fwa be ya a Yahuda ra, ya a edon hon dwatì no ye a chu be ra a be e chu be, be bwe mò a edon hon dgyan anga, eni tú anga jan ba edon hon e chu be. 15Adia fukèn mo be tú jan mò a edon dgyan be nobǝ be e bwe ángá no ebam a tsuruku mo be. Fwa ekam evǝnvǝn a tsuruku mo be jan tén be mò akan anga jan be yi edon hon. Fwa ekam mo be jantu be atan a be bwe ara ebgen ngge atan a be bwe mò esese anga.) 16Ena a Fwa Esese a m du edgon mo nó anga, jan nò akan nyabwa atan a Ehwya a kpèn egwa egwa kǝ́n adi efka mo Yeso Kristi, a chu binbin mo be mò e no engǝ̀tonton a tsuruku mo be ángá.

Be ya a Yahuda ngge edon hon

17Asuswana ano o jan wa ya a Yahuda, ngge o tsǝ́ekǝ̀n no a chu edon hon ngge o séfǝ́ a chu zǝno mbo ngge Ehwya, 18ano o yi mò a Ehwya dgyan anga, ngge o yi mò e no esese adia bè tú ara o edon mbwe, 19ano o cha ara dwa jan wa ende e vǝ ya fǝzǝn ebwibwi etsǝ́n anga ngge o no enggasansan a zǝn be ya e no a tswafǝ anga, 20o ka jan o tú be hwen fwa anga, etumo mo be ya e ka shwa abu mbǝgya. O no ngge dwa echam a tsuruku mbo jan edon mo Ehwya no gu o eyiyi ngge ebi. 21A bo hon nwene e tú be nobǝ mò anga, wa tú mbo chu o ra? A bo hon nwene e tú be nobǝ be e zǝ́ be ju ra, ano bwe a ge o zǝ́ ju anga? 22A bo hon nwene e jan be nobǝ be e bwe be sen-eten ra, ano bwe a ge o bwe sen-eten anga? A bo hon nwene e dipin sen anga, ano bwe a ge o zǝ́ be mò a tswa be musen anga? 23A bo hon nwene e séfǝ́ anga a chu edon, atan a o ba mbo edon hon ra, o du mbo anga be nobǝ be e di e pin Ehwya ra? 24Abu ge no ebam adi be Fwaebam. “Be ya e fwa be ya a Yahuda ra, janpin Ehwya anga, a chu nye be ya a Yahuda.”

25Eshwen, tkyà etsenm no ngge ebwejwa ano o tse edon hon, tea ano o tse mbo edon hon ra, o no abu be chà tsen didi be tkyà mbo ra. 26Ano be ya be chà tsen be be tkyà ra, ba mò a edon mo Ehwya jan anga, Ehwya a ti ye be abu be ya a be tsen ara be tkyà ra? 27Enona, ende e fwa ye ya a Yahuda ra, a be chà tsen be ye tkyà adi ekǝnjuju ra, tea ge ba se edon hon anga, ga kpèn o kǝ́n, a bo ya a Yahuda a bè tsen ara o tkyà ngge o no ngge edon, tea o tse mbo ye ra ángá.

28O fwa mbo ya a Yahuda adi ebi, adia be ya è mbwa o ángá, a ya a Yahuda eno e ra adia bè tsen ara o tkyà adi ekǝnjuju ángá ra. 29É yé, nobǝ no ya a Yahuda adi ebi, ano tsuruku mbwe no esese chafya mo Ehwya ngge tkyà etsenm adi ebi fwa ye adi etsem mo edon kpwà ara ra, tea tsuruku etwafwem a Engǝ́ mo Ehwya ti bwa anga a ge ángá. Adia yishwa nobǝ ena Ehwya a tàn ye a ge, fwa ye nobǝ ra.

Currently Selected:

Be ya a Roma 2: ICH

Highlight

Copy

Compare