Be ya a Roma 16

Bulu bi be ya a Roma fwa

1M dgyan anga nye e yi jan nwenjin je Fibi, a ndegwa ebi, dikon mo be ya aduwa a Kankiriya. 2M bgó nye anga jan nye e cha ye adi ti mo Etsodwe, adi efwa yishwa a be ya ekǝ̀n-etsǝ́m a bwe ángá. Nye e bwe e jwa ye adi egwa egwa mo efwa a ga nda a zǝn nye ángá, adia a ge e chu ye, gè bwejwa ben ara be nobǝ embo, tangge me.

3Nye e bi m Biskila ngge don ye Akila fwa, be no be ya emmeken mam adi mochi mo Kristi Yeso. 4Bè du chu be abu ba fǝ a chu m. M chwano m be anga a me tete ra, binbin mo be ya ekǝ̀n-etsǝ́m ya e fwa be ya a Esǝrela ra, chwano be anga gaten.

5Nye e bi m be ya ekǝ̀n-etsǝ́m ya e fǝnchu anga a mbwe be ángá fwa gaten. Nye e bi shushwa edgyan mam, Abinatu fwa. Ga ende è kwafya cha Kristi adi efa mo Eshiya ángá.

6Nye e bi Meri, nwene è bwe nye mochi àywá ángá, fwa.

7Nye e bi Andaranika ngge Yuniya, be ya a Yahuda è no a àtá ehwyatu ngge me ángá, fwa. Be etsonchi no be edgwa anga àywá ngge bè kwafya cha Kristi a be sangǝ́ m̀ chà cha ye.

8Nye e bi Amfiliya, ende a m dgyan anga àywá adi Kristi ángá, fwa.

9Nye e bi Ubano, ende e no ya emmeken mo je adi mochi mo Kristi ngge shushwa m Estaki a m dgyan áywá, fwa.

10Nye e bi Apele fwa, ende a be nobǝ yi jan ge bwe Ehwya mo mochi anga ngge tsuruku akan. Nye e bi be nobǝ e no a mu Aristabulu ángá, fwa gaten.

11Nye e bi nwenjin m Herodinya ya a Yahuda abu me, fwa. Nye e bi be ya ekǝ̀n-etsǝ́m a chu Yeso Etsodwe, ya e no a mu Nakisu ángá, fwa.

12Nye e bi Tarafina ngge Tarafusa, be ndegwa ya e bwe mochi mo Ehwya anga ngge tsuruku akan ángá, fwa. Nye e bi Basisa shushwa fǝ mam, ndegwa efki è bwe ara Etsodwe mochi àywá ngge tsuruku akan ángá, fwa.

13Nye e bi Rufu ende a Ehwya è fǝ́ ye dwa ngge ayi ye nwene è ti m abu nwen ye ángá, fwa, gaten.

14Nye e bi Asinkrita, Filiguna, Hamisa, Baturoba, Hamisa ngge be ya ekǝ̀n-etsǝ́m e no ngge be ángá, fwa.

15Nye e bi Filogu, Yuliya ngge Niriya ngge nwenjin ye ndegwa, ngge Olimpa tangge be binbin mo be ya ekǝ̀n-etsǝ́m e no ngge be ángá, fwa.

16Nye e bi be nwenjwa nye ya ekǝ̀n-etsǝ́m fwa, a tswa ju ekanfum abu be ya e ba Kristi bwe anga.

Binbin mo be ya aduwa zǝn efki efki, bi nye fwa anga.

Echa etwam ekǝn-etkyen mo Bulu

17Asuswana, m bgó nye mò akan anga efwe, be nwenjwa m ya, nye e bgeshi fǝzǝn a chu be mò ya e vǝ enggakwam na du be ya ehwyà mo nye tswafù ángá, bwa anga. Be tú nye mò e no efki ngge mò a bè tú ara nye ángá. Nye e kwaju ngge be. 18Adia yishwa be nobǝ ena bwe be anga mochi mo Yeso Kristi Etsodwe ra, tea be ka kpwà dgyèn mo be. Ngge be fwa enyònm ngge tsen echìm, be nggade be ya e yi be mò akan ra anga. 19Egwa egwa è fo ara abu nye tse Ehwya anga, enona, m fo etkwa mo nye àywá. M dgyan nye e no ngge enggaton a chu mò esese ebwem ngge nye e fwa nye ngge mò ebwem ngge mofǝ̀ ra.

20A dgyen ye fon ra, Ehwya nwene e du je je no zǝno adgye eso anga, a bwe a tkò echakpo mo Shetan, na du ye ga no a ta fù mo nye.

M bgó ebgo anga jan esese mo Etsodwe je Yeso ge e no ngge nye.

21Timoti ya emmeken mam adi mochi ena, tson fwa ebim mbwe bwa nye anga. Lukiya ngge Yason tangge Susibata, be nwenjwa m ya a Yahuda, bi nye fwa anga gaten.

22A me, Teretiya, ende è bá Bulu afketa chí ena ángá, m bi nye fwa anga gaten, abu nwenjin nye ya ekǝ̀n-etsǝ́m a chu Etsodwe.

23Gayu, ende a m no anga a mbwe ye ngge be ya e ba Kristi anga ana, fǝn bwi anga a mbwe ye ángá, bi nye fwa anga gaten.

Erastu, ende a be nobǝ a tswa eten efifi hon dgon tse mo be anga a zǝn ye ángá, ngge nwenjin je akan adi Kristi, Kawata, bi nye fwa anga. [ 24Esese mo Etsodwe je Yeso Kristi, ge e no ngge nye binbin. Ge eno enò.]

25Asuswana, egǝ̀n ge e no ḿ mo Ehwya nwene e kǝn ara ge e du nye, nye e nyishwa echakpokpo adi efka mo Fwa Esese a chu Yeso Kristi, a m du edgon mo mbwe anga. Ekpe ekpe, bè ngǝ̀ton ara Fwa Esese hon ena, tea asuswana be fijan ara nó. 26Asuswana, be fijan ara nó ngge be bwe be nobǝ yi ara nó adi efka mo be mò a be efojan è bá, nwone a Ehwya e no a fwa efwam, è jan je, evǝa be efi binbin be e tsǝ́ekǝ̀n ne tse ye gaten. 27No a fwa efwam, edgwa ge e no ḿ mo Ehwya nwene a ge tete, no ngge enggaton binbin ángá, adi efka mo Yeso Kristi. Ge e no enò.

Currently Selected:

Be ya a Roma 16: ICH

Highlight

Copy

Compare