Be ya a Roma 11

Ehwya chà segwa ye be ya a Esǝrela ra

1Echukǝnggwa, m̀ ká eka jan, chú Ehwya è twanga chashin mbwe no ara be nobǝ mbwe? É yé. Ge fwa didi ye enò ra. A me e chu m, ma ya a Esǝrela, ebi mo Ebrayi, adi efi mo Beyami. 2Ehwya è twanga chashin mbwe no ye be nobǝ mbwe a gè swa ara sangǝ́ gè chà mmò zǝnchaje ángá ra. Nye yi nye mò a fwa mo Ehwya è jan a chu Eliya abu gè bgó Ehwya mò esera a chu be ya a Esǝrela ra? Eliya è kpedwa jan, 3“Ehwya Etsodwe, be gu gu ara be efojan mbo n kǝnbwi ara be ten-ebgo mbo, kpwà shi a me tete e danno ángá ngge be tkyan anga be e gu m.” 4Tea mò a Ehwya è janfwe ye ángá a ano? “M kpu be nobǝ echo chwen a fà nyino a buetkwa mo chu m, be ya e chà hò a sen fen be sen a be fǝ́ Baal anga ra.” 5Eni abu ge no nòmo ángá, be ya ehwyà e chà danno a Ehwya è swa ara adi esese mbwe. 6Ano Ehwya è swa be adi esese mbwe, kǝnggwa fwa ye a chu mochi ra. Ano ge è ma swa be a chu mochi esese mo be, kǝnggwa esese hon àa fwa ye esese efwe ra.

7Ekǝnggwa mò a fwa ena tú anga a ano? Be ya a Esǝrela è ben be mò a bè nda ngge engǝ a fǝzǝn ángá ra. Be nobǝ a Ehwya è swa ángá, a ya è ben nó ángá. Tea bè du tsuruku mo be ya e danno ángá no echakpokpo. 8Ge no abu be bá no adi Afketa mo Ehwya jan.

“Ehwya è du be engǝ́ nwone a be

hwà a yi be fwa ra,

fǝzǝn a be di a ben be zǝn ngge no ra,

ngge tón a be fo a yi

be fwa akan ngge nó ra.

Be no kpwà enò ti bwatwa nòmo.”

9Enò gaten, Dawuda è jan,

“Esǝ mo be ge e no

abu moetswam a be tswá be.

Ge e no mò nwone a bwe be,

ba kpo ngge be nobǝ a tswa be ekan.

10Fǝzǝn mo be e twafǝ evǝa be e

di e ben be zǝn ra,

ekan a be ngǝ anga,

e bwe chashin mo be

e no kpwà etohoho.”

Be no ara be ya e fwa be ya a Esǝrela ra, ega

11Me e ká eka, chú atan a be ya a Esǝrela è tswafù nè kpo ángá, bè kpo evǝa be e nyi be etkyen efwe ra? É yé, ge fwa didi ye enò ra. Tea a chu ekpom mo be, Ehwya è tivǝ́ be ya e fwa be ya a Esǝrela ra, evǝa be ya a Esǝrela be e ngǝ engǝbgen a chu be. 12Tea ano ebgen mo be ya a Esǝrela è bwe be nobǝ mo be zǝnchaje nga be ya mobenben, ngge mò hon a be ben be ra ángá, è du be ya e fwa be ya a Esǝrela ra, nga ya mobenben, chú mobenben hon a twa a fǝ̀ ye chu atan a binbin mo be ya a Esǝrela a twabǝ a bwa a zǝn Ehwya ra?

13M jan nye fwa anga, a nye be ya e fwa nye be ya a Esǝrela ra. Adia Ehwya bwe ara m me e no etsonchi a zǝn nye, ma bwe mochi mam adi fǝ́ esem, 14ngge shwa enyim jan ma du be ya mbwe m, ya ehwyà be e ngǝ engǝbgen evǝa ya ehwyà mo be e ben etivǝm. 15Adia ano esegwam a Ehwya è segwa be, è bwe be nobǝ mo zǝnchaje be e no be shushwa ye, echam mo be a Ehwya a cha be ángá, a no engǝ? Ga no abu be nobǝ ya è fǝ ara n twabǝ bwa ara angǝ ángá.

16Ano borodi nwofyan a be bwì ti no Ehwya abu mò ekwafya no echanwenwen, borodi e dan ángá, a no ye echanwenwen gaten ra? Ano kpwà mo tumo akan no echanwenwen, be san mo nó, a no be echanwenwen gaten ra?

17Asuswana ano bè sen nggwa ara be bu mo tu zetu a mu, n kpu be bu mo tu zetu a tswavǝ́n, bwa teban adi be echi mo be, evǝa be e fo etkwa mo mbǝ mo tu zetu a mu hon, be san tu zetu a tswavǝ́n hon e sé be fǝ́ ra. Nye no abu be bu mo tu zetu a tswavǝ́n. 18Enona, nye e di e pin nye be bu a bè sen nggwa ara ángá ra. Nye e sé nye fǝ́ ra, nya be bu kpwà ara. Fwa ye a nye ya e fu kpwà hon no ángá ra, tea a kpwà hon e fu nye no a ge. 19Kǝnggwa wa jan, “Bè sen nggwa ara be bu hon evǝa me e ben efwa efwe-echi mo be.” 20Ge no eshwen. Bè senggwa be adia bè tsǝ́ be ekǝ̀n ra, nye ti ara echizǝno mo be adia nye tsǝ́ekǝ̀n no ángá. Nye e sé nye fǝ́ ra, tea nye e no a tswa etsentsen. 21Ano Ehwya è gwa ye be san mo tu zetu a mu, a bè shin eshinm ángá ra, ga gwa nye, a nye ya e dwa a tswavǝ́n ángá?

22Enona, we di e seshi abu Ehwya kpèn be nobǝ kǝ́n anga adi engo ngge fǝedwam ángá. Gè kpèn be nobǝ ya e bwe mofǝ̀ anga kǝ́n ngge engo, tea adi ḿ mo nye, ge no a bwe nye esese anga, ano nye twagwa nye efwa mbwe ra. Efki ra, a nye gaten be sen a nggwa nye a ju tumo hon. 23Ano be ya a Esǝrela twanga nyishwa efwe, ba kpu be twabǝ a ken adi echizǝno mo be, adia Ehwya a kpu be teban a ti efwe. 24A nye be ya e fwa be ya a Esǝrela ra, nye no abu be san tu zetu tswavǝ́n, bè kpu nye teban a ju tu zetu a bè shin eshinm. Mò ena chà bwe didi ye ra. Be ya a Esǝrela no abu san mo tu zetu a bè shin eshinm a mu ángá. Ano Ehwya dgyan anga jan ge e twanga e te e ban be san mo tumo a mu hon a zǝn a bè sen nggwa be ángá, eni a fwa ye mo ebwedwadwa a zǝn ye ra.

Ehwya a ti a vǝ́ be ya a Esǝrela binbin

25Be nwenjwa m ya, ya e fwa be ya a Esǝrela ra, m dgyan m jan nye e no nye a tswafǝ mo mò engǝ̀tonton ena ra, evǝa nye e tú nye chu ra. Chu echam mo be ya a Esǝrela, a dgyen ye fon ra. Ge ken a kpwà enò ti ken a ngga atan a efim mo be ya e fwa be be ya a Esǝrela ra, ya a tsǝ́ekǝ̀n a chu Ehwya a de a fǝ sangǝ́. 26Ena a abu binbin mo be ya a Esǝrela a ben etivǝm ángá, abu ge no ebam adi Afketa mo Ehwya jan,

“Ende hon nwene e

ti a vǝ́ be nobǝ

ángá a vǝ a bwa chá Siyona,

eten efifi,

na du be ebi mo

Yakubu be e twa

e gwa ebgen ebwem.

27Ngge ena a no vǝ-esenm

a m̀ sen ngge be,

atan a m gwa a no be,

be ebgen mo be ángá.”

28Adi ḿ mo Fwa Esese hon, be ya a Yahuda è segwa Ehwya, mò ena vǝ ebwejwa bwa nye. Tea adi eswam a Ehwya è swa ángá, ba be ya Ehwya dgyan anga adi efka mo be ebǝ ata mo be. 29Adia edwe a Ehwya dwe be ngge dwa a gè fǝ́ be ángá, fwa be etwafwetim efwe ra. 30Ekpe ekpe nye no be ya è tse be Ehwya ra, asuswana nye cha ara fǝedwam mo Ehwya adi efka mo chu echam mo be ya a Esǝrela. 31Be ya a Esǝrela nga ara be ya chu echam gaten, evǝa a be gaten be e cha fǝedwam mo Ehwya abu gè dwafǝ nye ángá. 32Adia Ehwya è kpu binbin mo be nobǝ bwa nè gwa be no a tswa chu echam, evǝa ge e dwafǝ a chu be binbin.

Be e tàn Ehwya

33Ehwya bwe bwi be nobǝ

esese anga àywá.

Ge no ngge enggaton n yi be mò binbin.

Ben ye ende akan mo je e yi

tsuruku mbwe a

chu be mò ngge

abu ge bwe bwi be

mò hon anga ra.

34Ge no ebam adi Afketa mo Ehwya jan,

“Chú ende e yi be mò e no a

tsuruku mo Etsodwe

ángá a ara,

eno e ra ende pajwa ye pyoro anga, a ara?”

35Ende è dwe di ara Ehwya edwe,

nwone Ehwya chà bwa a kpwa ye

nó nòya ángá, a ara?

36Adia be mò binbin vǝ a zǝn ye n chà bwa anga. Bè mò binbin no angǝ adi efka mbwe, ngge binbin mo be mò twabǝ a ken a zǝn ye. No a fwa efwam, je e no Ehwya edgwa. Ge e no enò.

Currently Selected:

Be ya a Roma 11: ICH

Highlight

Copy

Compare