Be Mochi 28

Bulu a ebin etù a Malita

1Atan a jè gwa ara jengǝ̀ a tswa adgye ángá, jè chà fo jan, jè no a chu ebin etù a bè fǝ́ anga Malita. 2Be ya eten hon è tú je edgyan e twafǝ̀ chu ángá. Chù è bwa anga ngge vi è no fu anga àywá gaten, enona, bè cha je bu fà nè tso je fǝ̀ evǝa je e ge. 3Bulu è tefǝn be san tumo, abu gè kpu be no nggwa anga a fǝ̀ ángá, efkenm mo fǝ̀ hon è du fkonde gwa a je, nè kpefu ye a kpwabu. 4Atan a be ya a tswa eten hon è di fkonde hon ngga no a bu mo Bulu ángá, bè jan e sojube jan, “Ebi, kenm nobǝ ena no a tén ya nobǝ egum. Bi adia ge tsega ara a sǝn ángá, ebwe mo mofǝ̀ a gè bwe ángá, gwa didi ye ye ge e no angǝ ra.” 5Tea Bulu è sà bu mbwe shi cha fǝ̀, fkonde hon e twashi a fǝ̀, mò akan è bwe ye ye ra. 6Be nobǝ è nobà anga be e di jan ju ye shu ara ngge ge e kposhi a sen ngge efǝ́m kè akan. Tea atan a gè dgyen ara fon, bè di jan mò akan bwe ye ye ra ángá, bè twafwe tsuruku mo be nè jan, ga ehwyá akan.

7Tenten ngge zǝn a jè gwa no etù hon ángá, chu mo ebin etù hon, a bè fǝ́ anga Pubiliyu, è no ngge be àtá a zǝn. Gè cha je ken a mbwe ye nè no je jè de jè ngǝ, mo tsǝ ta. 8Ate mo Pubiliyu è dwano a sen adi modwa edgye tangge dgyén ekonm. Bulu è kwashi a zǝn ye evǝa ge di ye, a gè bgó ara ebgo ángá, gè tu ye bu a chu, nobǝ hon è ben ematswam. 9Atan a mò hon è bwe ángá, binbin mo be ya modwa a eten hon è bwa a zǝn ye, bè ben ematswam. 10A chu mò ena, bè no je edgwa àywá. Atan a jè vǝ kèn mo je anga, bè no je binbin mo be mò a jè nda anga adi kèn mo je ángá.

Bulu è kengga a Roma

11Nò ta chashin mo ngga ebwishanm hon, jè chà vǝ kèn gwa Malita. Jè kwa ngga ekeke efki mo ya a Alezandiriya nwone è de ekpengga mo viejwa hon a ebin etù hon ngge je ángá. Bè fwase be mo evǝ́m mo be ehwyá ngǝfen fà, a bè fǝ́ anga Kasto ngge Polu, no a ju mo ngga a mbǝ hon. 12Jè kwafya ken ndnya a Siraku, zǝn a jè no bwe tsǝ ta. 13Jè vǝ a zǝn kengga, a Rigiyi. Zǝn ngga re, jè gwa zǝn hon, fyo chá mo Kpàn è no kpo bwa anga, tsǝ adi e fà, ngga è ti je kengga a Putiyoli. 14A zǝn, jè ben be ya ekǝ̀n-etsǝ́m ya è bo je jan je e ken e no ngge be mo etú akan. Jè vǝ a zǝn, kengga a Roma. 15Be ya ekǝ̀n-etsǝ́m ya è dwa a zǝn ángá è fo ara jan je nyaken, enona, bè ti kèn bwangga tén a zǝn Jwa mo Afiyu ngge zǝn a bè fǝ́ anga Echi Zǝndwa Ta, evǝa be e cha je. Atan a Bulu è di be ángá, gè ben echakpo nè chwano Ehwya. 16Atan a jè bwangga a Roma anga, bè gwa Bulu ge e no zǝno mbwe ngge yakàn akan e dgon ye.

Bulu è du edgon a Roma

17Tsǝ ta, a je bwangga ara Roma ángá, Bulu è fǝ fǝn be chu mo ya a Yahuda ya è no a zǝn ángá dwa. Atan a bè fǝn gu ara ángá, gè jan be jan, “Be nwenjwa m ya, bè fu m a Urishelima, ti du a bu be ya a Roma, bi adi a m̀ bwe m mò akan e no esera a zǝn yamuje, eno e ra adi moefì mo be ebǝ ata mo je ra. 18Be ya a Roma è ká m eka nè nda anga be e twa e gwa m, adia bè ben m ngge edan e kengga ara be e gu m ángá ra. 19Tea atan a be ya a Yahuda è se be ángá, gè no m kenm me e jan be e ti kǝ́n mam e bwa a zǝn Tìbin, Kaisa. Fwa ye jan m no ngge mò akan a m bwa evǝa me e dwakǝ́n mo ya mbwe m a chu mo nó ángá ra. 20A chu fwa ena m tson be e fǝ́ nye dwa, me e di nye ngge me e jan fwa ngge nye, adia a chu shwa enyim mo ya a Esǝrela, a m no a tswa awya na.”

21Bè janfwe ye, “Je chà ben je afketa chí a sǝnsen mo Yahudiya a chu o ra, ngge ben ye akan mo be nwenjwa je, ya e vǝ a zǝn bwa, jan fwa esera a chu o ángá ra. 22Tea je dgyan anga je e fo tsuruku mbo adia je yi jan be nobǝ chagwa chagwa cha be dwa ngge etso ena ra.”

23No enona, bè nyi nò evǝa be e ben so ngge Bulu. Nò eni, be nobǝ è bwa embo enó, a zǝn a gè kwa no ángá. Tke anofon ti kengga edgo, gè jan be fwa a chu zǝnotì mo Ehwya, nè tkyan ge vǝ tsuruku mo be e bwa adi ebi a chu Yeso adi efka mo edon mo Mosa ngge mò a be efojan è bá ángá. 24Be ya ehwyà è tsǝ́ekǝ̀n a chu mò a gè jan be ángá tea be ya ehwyà è tsǝ́ be ekǝ̀n ra. 25Chashin a Bulu è jan fwa ara fwa ekǝn-etkyen mbwe ángá, bè twa efyan e sojube nè kwa ara enyam. Bulu è jan, “Engǝ́ mo Ehwya è jan ebi ngge be ebǝ ata mo nye, atan a gè jan chá vǝ efojan Eshaya jan,

26“ ‘Ken a zǝn be nobǝ ena, we jan,

“Eshwen nye no a fo anga,

tea nye hwà a yi nye ra,

eshwen nye no a di anga,

tea nye di a yi nye ra.”

27Adia tsuruku mo be nobǝ ena

cha ara kpo, ngge a be e chu be,

twape ara tón mo be,

a be e chu be,

twape ara fǝzǝn mo be,

eno e ra bà a di a ben ara zǝn,

tón mo be, àa fo ara fwa,

tsuruku mo be,

àa hwà a yi ara fwa,

evǝa bà a twabǝ a bwa ara a zǝn m,

ngge me e ma e tswa be.’

28“Enona, m dgyan nye e yi jan, fwa mo Ehwya a chu etivǝm ena, bè tson nó ken ara a zǝn be ya e fwa be ya a Yahuda ra, ngge ba cha nó.” [ 29Atan a Bulu è jan fwa ara fwa ena ángá, be ya a Yahuda è nyagwa zǝn hon, nè no twa efyan anga echakpokpo e sojube efǝ.]

30Bulu è no a zǝn mo je fà adi àtá a gè cha nè kpwa tse mo nó anga a ge. Gè no cha binbin mo be ya è bwa bandi ye anga ngge vǝtsen. 31Gè du edgon a chu zǝnotì mo Ehwya nè tú mò a chu Yeso Kristi Etsodwe. Gè du edgon hon ngge echakpo, nobǝ akan è dòn ti ye ye ra.

Currently Selected:

Be Mochi 28: ICH

Highlight

Copy

Compare