Be Mochi 22

1“A nye be nwenjwa ngge be àtá ya, nye e buton fo fwa a ma jan ángá, evǝa nye e yi jan m chà dan m ra.”

2Atan a bè fo ge jan be fwa adi hwi Aramaya ángá, bè bu bishi tón. Kǝnggwa Bulu è jan, 3“A me ma ya a Yahuda, bè mbwa m a Tasu a sǝnsen mo Kilikiya, tea bè fyo m a eten efifi ena. M̀ ka edon mo be ebǝ je, a bu Gamaliya. M̀ chifǝ anga me e fen Ehwya abu nye bwe anga nòmo na. 4M̀ tswa be ya e ba Efwa ena anga fí, è kengga adi egum mo be. M̀ fu be ndedon èé ndegwa kpu nggwa a tswa àtá ehwyatu, 5Abu Chu mo ekǝ́n ngge binbin mo be Atkwentì mo ya a Yahuda jan a yi ḿ mo be a chu m. M̀ cha afketa chí a zǝn be ti nyaken be ekǝ́n a Damasku. M̀ nyaken a efǝ evǝa me e ken e fu be ya ekǝ̀n-etsǝ́m a chu Yeso e bwa abu ya e no àtá ehwyatu a Urishelima evǝa be kǝn be ten.

Bulu jan abu gè nga ya ekǝ̀n-etsǝ́m ángá

(Be Mochi 9:1-19; 26:12-18)

6“Abu m̀ no a efǝ bwa tén ara a Damasku ángá, atan enò nò è sen ara kpe, enggasansan echakpokpo chá kpe kè akan, è shwa bwipe m. 7Kǝnggwa m̀ kposhi a sen, m̀ fo aken no jan m anga jan, ‘Shawulu, Shawulu, ano bwe a ge o tswa m fí anga?’

8“M̀ ká ye eka jan, ‘A bo wa ara, Etsodwe?’

“Gè jan m jan, ‘A me ma Yeso ya a Nazarati, a o tswa ye fí anga.’ 9Be ya è no ngge me ángá è di enggasansan hon tea bè fo be aken mo ende hon é jan fwa anga ngge me ángá ra.

10“Enona, m̀ ká eka jan, ‘Mò hon e no kenm ma bwe ángá, a ano Etsodwe?’

“Etsodwe hon è jan m jan, ‘Nyi etkyen, we kwa e shi a tswa eten a Damasku, a zǝn, ba jan a gu o mò a bè pa ara jan wa bwe ángá.’ 11Adia m̀ diben m zǝn ra, a chu echakpo mo enggasansan è shwa m a fǝzǝn ángá, be ya m̀ no ngge be ángá è vǝ m evǝ́m kwashi a Damasku.

12“Nobǝ akan, a bè fǝ́ ye anga Ananiya è bwa evǝa ge e di m. Gè ba se edon mo Mosa anga àywá, be ya a Yahuda ya è no a zǝn binbin ángá, è no ye edgwa anga àywá. 13Gè bwa ywa a buetkwa mam nè jan m jan, ‘Nwenjwa Shawulu, we ben zǝn edim mbo.’ Kè akan, atan enò m̀ di zǝn vǝ́ etkyen, m̀ diben ye.

14“Kǝnggwa gè jan, ‘Ehwya hon, mo be ebǝ ata mo je swavǝ ara o, we yi be moedgyan mbwe, we di Ebitete Akan hon, ngge we fo fwa a kpevǝ mbwe. 15Adia wa no eyifwa mbwe, o no a jan be nobǝ binbin mò a ò di ara ngge mò a ò fo ara ángá. 16Asuswana, o nobà anga ano? Nyi etkyen be e bwe o batisǝma, be e na e nggwa o be ebgen mbo abu o fǝ́ ti mo Etsodwe anga.’

Ehwya è fǝ́ Bulu dwa jan ge e du edgon a zǝn be ya e fwa be ya a Esǝrela ra

17“Atan a m̀ twabǝ ken ara a Urishelima ngge m̀ no bgó ebgo anga a Àtá mo Ehwya ángá, enggwà è kwa ara m ekam a fǝzǝn, 18m̀ di Etsodwe no jan m anga jan, ‘Sanshi, nyi etkyen we vǝ́ a je mo Urishelima, adia ba cha be dwa mo fwa a wa jan be a chu m ángá ra.’

19“M̀ janfwe ye jan, ‘Etsodwe a be e chu be, yi abu m̀ tkukwa be àtá chuefǝnm mo be akan akan, evǝa me e bu ngge me e fu be ya ekǝ̀n-etsǝ́m a chu o kpu nggwa anga a àtá ehwyatu ángá. 20Ngge atan a bè gu Estifano eyifwa mbo ángá, a me e chu m m̀ ywano tenten a zǝn, m̀ chadwa ngge be, ngge m̀ dgon mokàn mo ya è gu ye ángá.’

21“Kǝnggwa Etsodwe è jan m jan, ‘Nya, ma tson o a ken zǝn adabonbon a zǝn be ya fwa be ya a Esǝrela ra.’ ”

Bulu è fijan ga ya a Roma

22Be nobǝ hon è fǝnno a zǝn ángá è no buton fo Bulu anga tea atan a gè jan ge nya ken a zǝn ya e fwa be ya a Yahuda ra ángá, bè tandwa nè jan, “Nye du nobǝ ena ge e gwa zǝnchaje. Ge se ye ge e no angǝ ra.”

23Abu be nobǝ embo hon è no tandwa nè kpu mokàn echuvǝ mo be kpu no nggwavǝ́ anga etkyen, nè no nggwa abubwi vǝ́ anga etkyen, 24ekpondgyen mo yakàn hon è du be e ti Bulu e kwa e shi a tswa echieno mo be. Gè du jan be e bu ye akpan, be e ká ye eka evǝa be e yi mò e bwe bè nobǝ hon è no tàn ye dwa anga a chu enò ángá. 25Atan a bè twà ye a sen be e bu ye akpan hon ángá, Bulu è jan yakàn edgwadgwa akan è ywano tenten ngge ge ángá jan, “Chú ge no esese adi edon a we bu nobǝ a sǝnsen mo Roma akpan, a be chà ká be ye eka ne ben ara ye ngge ebgen ra?”

26Atan a yakàn edgwadgwa akan hon è fo enò ángá, gè ken a zǝn ekpondgyen mo yakàn hon, nè ká ye eka jan, “Ano a o nda anga wa bwe? Nobǝ ena a ya a sǝnsen mo Roma.”

27Enona, ekpondgyen hon è bwa bi Bulu jan, “Jan m, a bo wa nobǝ a sǝnsen mo Roma?”

Gè janfwe ye, “Ee.”

28Kǝnggwa ekpondgyen hon jan, “M̀ ben zǝno enom abu ya a sǝnsen mo ya Roma adi tse ekpwam àywá.”

Bulu è jan ye jan, “Tea mam, ma ya sǝnsen mo Roma adi embwam.”

29Be ya è nda anga be e ká ye eka ángá è twagwa ye kè akan. Ekpondgyen hon è tsen etsentsen atan a gè yi ara jan Bulu nè no ya a sǝnsen mo Roma ángá, adia gè du bè tè ara ye awya ángá.

Bulu chafya mo be Atkwentì mo ya a Yahuda

30Zǝn ngga re, adia ekpondgyen mo yakàn hon è nda ángá ge e yi ebi mo mò è bwe be ya a Yahuda è tso Bulu efya anga, gè du be e fken e gwa ye, nè du be Ekǝ́n echa ngge binbin mo be Atkwentì bè chufǝn a sen. Kǝnggwa gè du bè ti Bulu bwa ywa chafya mo be.

Currently Selected:

Be Mochi 22: ICH

Highlight

Copy

Compare