Be Mochi 20

Bulu a Makidoniya ngge Girka

1Chashin a etkekàn hon tswa ara ju ángá, Bulu è fǝ́ be ya è ba Yeso anga dwa, nè janbon be ekǝ̀n. Kǝnggwa gè dwa be ken nè ken a Makidoniya. 2Atan a gè tkukwa gu ara be efa hon nè du edgon mo fwa mo Ehwya ngge a gè janbon ara be ya ekǝ̀n-etsǝ́m ya è no a zǝn tsuruku ángá, gè bwangga a Girka, 3zǝn a gè no mo fka ta ángá. Adia be ya a Yahuda è té fuchin esera a chu ye abu gè nda anga ga kwa ngga è nyaken a Siriya ángá, gè twafwe tsuruku mbwe nè twabǝ ken chá Makidoniya. 4Be ya è ken anga ngge ge ángá, a be Sufata nwen ndedon mo Paru ya a Beriya, Aristaku ngge Sakundu ya a Tasalonika, Gayu ya Dabe ngge Timoti, èé be Tikiku ngge Tarofimo be ya efa mo Eshiya. 5Be ya ena è kwafya nya ara nè ken nobà je no a Torowa. 6Jè kwa ngga a Filibi atan a bè de fwa ara Esǝ mo Borodi e ben ye yisti ra ángá, tsǝ chwen chashin jè ben be a Torowa, zǝn a jè dwa bwe tsǝ chwen a fà ángá.

Bè bwe Yutiku zǝbwa angǝ a Torowa

7Adi tsǝnò ekwafya mo etú, jè fǝn evǝa je e de modebi mo Etsodwe, Bulu è kwa ara fwa ejanm ngge be nobǝ ngge adia gè dgyan anga ano zǝn ngga ara ga nya ángá, gè jan fwa ngge be nobǝ dgyenfon kengga tswa-tsǝ. 8Bè ton be petila embo éè no nggazǝ anga, nyidwa a tswa àtá a kpe, zǝn a jè fǝnchu anga. 9Ezon-ndedon akan, a bè fǝ́ anga Yutiku, è chuno a embi nè no mbǝgo dan anga, atan a Bulu è chà jan be nobǝ fwa ken anga. Atan a dan hon è tso ara ndedon hon ángá, gè vǝ a zǝn embi mo àtá a kpe adi e ta, a gè chuno ángá nè kposhi a sen. Bè bwa kan ye etkyen nè di jan gè fǝ ara. 10Bulu è shi a sen nè dwa shi a ju ezon-ndedon hon, nè twa bu mbwe ngàhwya ye, nè jan be jan, “Nye e tsen nye tsuruku ra, ge chà no angǝ.” 11Ekǝnggwa Bulu è twabǝ tonvǝ́ kwa a tswa àtá a kpe hon nè bwi borodi ti de. Gè jan fwa ngge be ti kengga ten anofon sangǝ́, gè chà nyagwa be. 12Be nobǝ è ti ezon-ndedon hon ken a mu angǝ, nè fo etkwa àywá.

Bulu dwa be echikǝ̀n mo àtá aduwa a Afisa kèn

13Jè kwafya nya adi ngga a mbǝ ken a Aso, zǝn a jè nyaken a tso Bulu ángá, adia gè pa nó nyi ara jan ga ken a zǝn a kpwafu chá etu ángá. 14Atan a gè ben je a Aso ángá, jè tso ye adi ngga hon, ken a Mitilini. 15Zǝn ngga re mo nó, jè ti kèn ana adi ngga a mbǝ, kengga a zǝn a eten a Kiyo è no re jengǝ̀ mo nó. Zǝn ngga re mo nó efwe, jè nyi ngga vǝ́ jengǝ̀ ti ken a Samo, kǝnggwa zǝn ngga re efwe, jè kengga a Miletu. 16Bulu è panyi ara jan ga kwa ngga twa a kwa Afisa evǝa ge e ti ye ekpengga a tswa efa mo Eshiya ra, adia gè ken san kèn hon anga evǝa ge e ken e ngga a Urishelima nò mo Pentiko ano ge no ebwetim.

17A gè no a Miletu ángá, Bulu è tson jan be e fǝ́ be echikǝ̀n mo be ya ekǝ̀n-etsǝ́m a Afisa dwa, be e bwa. 18Adi ebwanggam mo be, gè jan be jan, “A nye e chu nye, nye yi abu m̀ no zǝno mam anga binbin mo ekpengga a m̀ no anga ngge nye ángá, tke nò a m kwafya ti bafu mam cha adi efa mo Eshiya ángá, 19m̀ no bwe mochi mo Etsodwe anga ngge chu engǝm a sen àywá, ngge engǝ a fǝzǝn, bi adi embwadi ngge be ekan àywá a chu engà engàm mo be ya a Yahuda. 20Nye yi jan m̀ kpo didi m nya a me e jan nye mò nwone e bwe a jwa nye ángá ra. M̀ tú ara nye mò a engga mo be nobǝ ngge ken a mu a mu. 21M̀ twa ara be ya a Yahuda ngge be ya a Girka echa, jan ge no kenm be e twa etwa, be e twabǝ e bwa a zǝn Ehwya, ngge be e no ya chaebi a chu Yeso Etsodwe je.

22“Asuswana Engǝ́ mo Ehwya fa m anga me e ken a Urishelima, bi adia m yi m mò a bwe ngge me a zǝn ángá ra. 23Mò akan a m yi ángá, Engǝ́ mo Ehwya hon twa m echa anga jan a tswa egwa egwa mo eten a ma ken, etwam a àtá ehwyatu ngge ekan engǝ, nobà m anga. 24Tea nya mam fwa ye mò akan a zǝn m ra, binbin mo mò a m nda anga, a me e tse e gu fǝton-ese ngge me e bwe e kǝ̀n mochi hon nwone a Yeso Etsodwe è ti no m ángá mochi mo Fwa Esese ejanm a zǝn nobǝ, a chu esese mo Ehwya e bwe anga.

25“Asuswana m yi jan ben ye ende akan a engga mo nye, ya m̀ tkukwa ken jan ara be fwa a chu zǝnotì mo Ehwya ángá, a di m efwe ángá ra. 26No enona, m jan nye anga nòmo jan, fù èé bu mam dwa a je a chu ngǝ mo egwa egwa. 27Adia m cha tsen di m tsuruku me e jan nye binbin mo be mò a Ehwya dgyan anga ra. 28Nye e bgeshi fǝzǝn a chu nye ngge binbin be nobǝ a Engǝ́ mo Ehwya kpu du nye no a bu ángá. Nye e no be nobǝ ya e dgon be nobǝ mo Ehwya, a gè jwa ngge ngǝ mo Nwen ye ángá. 29M yi jan atan a m nya ara ángá, be nobǝ ya ehwyà ya e no abu be kwàkpan ebgen àywá, a bwa a tswa engga mo nye na dwa be fǝ mo be ya ekǝ̀n-etsǝ́m ra. 30Èé a tswa engga mo nye, be ya ehwyà a nyi etkyen na twanga fwa ebi hon evǝa be e vǝ ya ehwyà a engga mo nye e ken e ba be. 31No enona, nye e no ezǝngga! Nye e ka e ben jan m̀ ti je ta, ènò ngge etsǝ, m̀ chà kpo didi m nya me e twa egwa egwa mo nye echa ngge engǝ a fǝzǝn ra.

32“Asuswana, m kpu nye du ara a bu mo Ehwya ngge fwa mbwe. Fwa mbwe hon nwone e fu a ti nye na bwe nye, nye tu a bi, na no nye fǝ́n edem hon a engga mo binbin mo be ya a be tsǝ̀pe nyi ara mo chu ye ángá. 33M chà dgyan didi m me e ti azufa, zinariya, eno e ra mokàn mo ende akan ra. 34A nye e chu nye, nye yi jan m̀ bwe mochi ngge be bu mam ena evǝa me e ben mò a m nda anga ngge mò a be ya emmeken mam e nda anga. 35A chu be mò binbin a m̀ bwe ángá, m̀ tú nye jan adi ebwem mo be mò ngge echafǝju yishwa ena, ge no kenm je e bwe a jwa be ya ekan. Nye e ka e ben fwa mo Yeso Etsodwe e chu ye è jan, ‘Esese a nobǝ a ben a chu edwe a ge dwe anga twafǝ̀ a chu edwe a ge cha anga.’ ”

36Atan a gè jan fwa ara fwa ena ángá, Bulu è nggwa ekpanvǝ mbwe a sen nè bgó ebgo ngge be binbin. 37Kǝnggwa binbin mo be è kpedwa àywá ngge engǝ a fǝzǝn, bè kanfu ye nè dwa ye kèn esese. 38Mò éè dwa ti ara be ángá, a fwa a gè jan be jan ne, ba di be fǝzǝn embǝgya mbwe efwe ra ángá. Ekǝnggwa bè du ye shi a zǝn a gè kwa ngga a mbǝ ángá.

Currently Selected:

Be Mochi 20: ICH

Highlight

Copy

Compare