Be Mochi 12

Bè gu Yakubo nè twa Bitru a àtá ehwyatu

1Gè no adi ekpengga ena, a Tì Hiridu è fu be ya è ba Yeso anga nggwa a àtá ehwyatu, evǝa ge e tswa be fí. 2Gè du bè e gu Yakubo nwenjin Yohana ngge hwen efǝ. 3Abu gè di jan mò a gè bwe ángá è dgyan be ya a Yahuda anga, gè fu Bitru gaten. Mò hon ena è bwe atan a bè de Esǝ mo Borodi e ben ye yisti ra (Esǝ mo Epenyim) ángá. 4Atan a gè fu ara ye ángá, gè ti ye twa a àtá ehwyatu, nè ti ye du abu mo be yakàn etso ndwe, egwa egwa mo etso hon è no ngge be yakàn ndwe, be e dgon ye. Hiridu è nda anga ga kpèn Bitru kǝ́n a fǝzǝn mo be ya a Yahuda atan a bè de fwa ara Esǝ mo Epenyim ángá.

5Enona, bè ti Bitru twano a àtá ehwyatu, tea be ya ekǝ̀n-etsǝ́m è no chifǝ anga adi ebgo ebgom a zǝn Ehwya a chu ye.

Abu Bitru è tsega a àtá ehwyatu anga

6Etsǝ mo nò a Hiridu è ka anga jan zǝn ngga ara, ba ti Bitru a gwa a je, be e sen ye kǝ́n. Bitru è dwa dan no a engga mo be yakàn fà, bè hwyafu be bu mbwe fà no ngge be awya fà. Bu chá akan bè hwyafu nó no ngge bu mo yakàn akan, chá akan bè hwyafu nó no ngge bu mo yakàn efki. Be yakàn efki è ywano dgon tafǝmo anga. 7Kè akan, maleka akan mo Etsodwe è mbwibwa re, zǝn è nggasan a tswa àtá zǝn a gè no ángá. Gè chì Bitru a buetkwa evǝa ge e fǝ́ e zǝ ye, nè jan, “Myan myan, nyi etkyen.” Kǝnggwa be awya hon è no a bu mo Bitru ángá è fken nggwa a sen.

8Kǝnggwa maleka hon jan ye jan, “Nggwa be mokàn mbo, we du kpumo a tkyafù mbo” Bitru è bwe enò. Maleka hon è jan efwe, “Ti mobwi a ju mbo, bwi a ju o, we ba m.” 9Bitru è ba ye vǝ́ a je mo àtá ehwyatu hon, tea gè yi ye jan mò a maleka hon è bwe anga no eshwen ra. Gè ka anga jan enggwà è kan ye a fǝzǝn anga a ge. 10Bè bwa twafǝ̀ be edgonzǝn ekwafya ngge adi e fà nè bwa a zǝn mo fǝtsǝmo mo motse, mo eshim a tswa eten. Fǝtsǝmo mo motse hon è fkigwa e chu ye, bè vǝ́ a je mo nó. Atan a bè kenkèn kpo efǝku akan shi ken ekǝn-etkyen mo nó ángá, kè akan, maleka hon è mbwida ara.

11Kǝnggwa Bitru è twabǝ bwa a tswa engà mbwe, nè jan, “Asuswana, m yi jan mò ena no eshwen. Etsodwe tson maleka mbwe ge e bwa e ti e vǝ́ m a bu mo Hiridu ngge binbin mo be mò a be ya a Yahuda, è ka a chu m anga.”

12Abu Bitru è hwayi ara nó ángá, gè ken a mu Meri, ayi Yohana a bè fǝ́ ye anga Marku, zǝn a be nobǝ embo è fǝnno nè no bgó ebgo anga. 13Bitru è fǝ́dwa chá je mo tafǝmo. Nwen ndegwa ya mochi akan, a bè fǝ́ ye anga Roda è bwa a zǝn tafǝmo hon evǝa ge e di ende è no a zǝn ángá. 14Atan a gè foyi ara aken mo Bitru ángá, gè shánju tea ge fki ye tafǝmo hon ra, gè tse twabǝ shi jan be jan, “Bitru ywano a tafǝmo.”

15Bè jan ye jan, “A bo, mò chi o anga a ge.” Gè chungǝ́shi jan, a Bitru, bè jan, “Kenm, a maleka mbwe.”

16Tea Bitru è no tén adi bu ekǝnm a tafǝmo, atan a bè fkigwa tafǝmo hon nè di ye ángá, mò hon è zǝ̀ be ju àywá. 17Bitru è bwe be bu, be e kpo nya. Gè jantu gu be abu Etsodwe è ti ye gwa a je a àtá ehwyatu ángá. Kǝnggwa gè jan, “Nye jan Yakubo ngge be nwenjwa je efki hon fwa a m jan nye na.” Kǝnggwa ge nya mbwe chá efki.

18A zǝngga ara ángá, efyan etwam echakpokpo è nyi etkyen a engga mo be yakàn hon jan, chú mò e bwe ngge Bitru na a ano. 19Chashin a Hiridu è du ara jan be e tku e nda tén Bitru a chá engǝ ra, nè di be ye ra ángá, gè ká be yakàn a bè ti Bitru du be no a bu ángá eka nè du bè gu be akan akan.

Chashin mo nó, Hiridu è gwa Yahudiya nè ken no a Kesariya mo ekpengga nwofyan.

Fǝ̀ mo Hiridu

20È ti ara ekpengga àywá be ya Taya ngge be ya a Sidon è fwa be a tswa adgye ngge Hiridu ra. Enona, bè fǝn sojube nè bwa a zǝn Blatu, ende a tì hon è chadwa no ngge ge àywá ángá, bè jan ye jan ge e bwe e jwa be, be e di tì. Bè bwa a zǝn tì nè bgó ye jan be e kpèn e tswa fwa éè no a engga mo be ngge ge ángá. Mò ena è no enò, adia echafǝju mo mode mo be è gwa anga a je a tswa sǝnsen mo tì hon ángá.

21Nò hon a bè nyi ángá è bwa ara, Tì Hiridu è nggwa mokàntì mbwe. Gè chu a chu botì mbwe nè jan be nobǝ fwa. 22Be nobǝ è tandwa jan, “Ena a aken mo ehwyá akan, fwa ye ḿ mo nobǝ ra.” 23Adia Hiridu è ti egǝ̀n no ye Ehwya ra, maleka mo Etsodwe è bu ye kpo a sen, kè akan be kpǝkpǝmo è de ye, ti kengga adi fǝ mbwe.

24Tea be nobǝ embo embo è no fo fwa mo Ehwya hon anga, nè no tsǝ́ekǝ̀n anga a chu Ehwya.

25Atan a be Banaba ngge Shawulu è bwe gu ara mochi a bè tson be vǝ́ a je mo Urishelima ángá, bè twabǝ ken a Antakiya ngge Yohana a bè fǝ́ anga Marku ángá.

Currently Selected:

Be Mochi 12: ICH

Highlight

Copy

Compare