Afisa 3
3
Bulus A Kiyo Bʌtʌbɔ Gǝm Kɛl Kwaamaɨ
1A dul kɛl nɨ, mǝ Bulus, mǝ bwɛ lɔsomi a kɛl dul Kiristi Yesui, sǝ n tɨka jen jǝ́ Bʌtʌbɔ.
2Mɨ nyǝmatǝm wo jǝ́ nyʊwa fulon kɛlɔ a dǝg ɨ mǝ yǝlam nǝ maajɨ fulon kɛl lǝma nɨ Kwaama a nɨ ɨ a kɛl dul jeni. 3Kwaama a nʊng ɨ a mʊgɔ dʊgam nyangnyang jʊ nɨ ga yʊ yʊɨ. N kwɛl n mʊla mʊlaɨ nǝn dǝm nyɔ. 4Na nǝn kwama jǝ́ kiyo a wʊnɨɨ, jǝ́ dwal dwal jǝ́ nyǝm nyǝmtǝm mǝndɨ a dul jʊ nɨ Kwaama a yʊ yʊɨ a dul Kiristii, 5a wʊnɨ a yooli nɨ galɨgǝn a sʊwa bɔ nǝfitʌm woi, kanga kǝngkɔ a nʊng bɛtɔ twama sagsagɔ jǝbɔ nǝbkuwotǝmkǝgagɔ a gola Yʊwaɨ. 6Jʊ nɨ ja yʊ yʊɨ gǝ nʊng gɔ Bʌtʌbɔ fatǝm jatǝm kʊla jǝbɔ Yahudawagɔ. Jǝ jinʌn bʊtɔgɔ win. Jǝ fatǝm mʊrkalɨ tag a swatǝm yaa nɨ a mʊgɔ Kiristi Yesui a gola fulon kɛl lǝmɨ nɨɨ.
7N yǝlam bwɛ jwaalɛ a maajɨ kiyotǝm fulon kɛl lǝmɨ nɨ, a dul lǝma nɨ Kwaama a nɨ ɨɨ, a gola kwaan gǝnɨ, kwaan gǝnɔ nɨ maa maajɨ lɛ a bʊtɔ mɨɨ. 8N maa dǝm sul a mʊgɔ tangǝn nǝb bwangtǝm Kwaamaɨ, nǝmǝ a nɨ ɨ lǝma nɨɨ, sǝ n kiyo Bʌtʌbɔ gǝm fulon kɛl lǝmɨ a dul Kiristii, wʊnɨ a shu kwaan kiyotǝmɨ. 9Sǝ n nʊng nǝbɔ gwam fɛkalɨ jǝ yʊtǝm nɨ a wʊnɨ jol jǝbɔ jol Kwaama a yʊ yʊɨ, nʊ nɨ a fwal kanjǝlɔ pʌdi. 10Kwaama a maa jʊ nɨ kǝngkɔ sǝ a nʊng yʊlan gǝnɔ nǝn dʌmʌn a daagɔ nʊ nɨ maa fɔlɔn nɛɨ, jǝbɔ nǝblaamɔ a dʌbʌli, a gola mʊrkalɨ nǝb bwangtǝm Kwaamaɨ. 11Kwaama a maa fɛkalɨ nɨ a gola Kiristi Yesui, Tɛlalɔ bǝn, nǝngɔ la a fwal yooligɨɨ.
12N kɛl dul Kiristii jǝbɔ nǝtǝm bɨlǝngkɛl a daa gǝ woi, bǝ mwɨ bǝ bɛ lɛ a daa Kwaama woi, mɨ taal woi. 13A dul kɛl nɨɨ, mǝ kela jen nɛ ka jǝ́ gʊ lɛ nǝn gul a kuwotǝm gaalanɔ mǝ nɔɔ lɛ a kɛl dul jeni. Jʊ nɨ n dʊʊlǝn jen.
Swɨtǝm Kiristii A Daa Bǝn Woi
14N dul kɛl nɨ mǝ jʊng a kǝga Tɛtɛɨ mǝ maa kelii, 15nʊ nɨ a fwal nǝbɔ gwam a dʌbʌl jǝbɔ tǝmɨ. 16N maa keli mǝʊ a mʊgɔ dʊʊlǝn shilo gǝnɔ gǝm bɛ ga sʊ jem kwaan a gola Yʊwa gǝn a nǝl jen, 17sǝ Kiristi a yɨ a mʊgɔ nǝl jen a gola nǝtǝm bɨlǝngkɛl. Mǝ maa keli lɛ tag bɛ swɨkanɔ a yǝlam jʊ nɨ jǝ́ ywɔ jʌng jenɔ woi, n daagɔ jǝ́ swa fʌlʌm jenɔ woi. 18N maa keli mǝʊ jǝ́ nya kwaan nyǝmtǝm swɨtǝm Kiristii jǝbɔ nǝb sagsagɔ pʌd, tɛɛnatǝm gǝnɔ jǝbɔ somʌn gǝnɔ jǝbɔ debatǝm gǝnɔ, jǝbɔ tushitǝm gǝnɔ. 19N maa keli mǝʊ jǝ́ nyǝm swɨtǝm nɨ Kiristi maa bǝm lɛɨ, wʊnɨ a laa laaɨ kwaan nyǝmtǝmɨ, sǝ ja yii jen pʌd nǝn yiitǝm Kwaamaɨ.
20Bɛ bǝlátǝmɔ a ta tʌgo gwanggwang a nʊ nɨ dwal maa jʊ nɨ lɛ a shu shui kwaan jʊ nɨ bǝ kel lɛɨ, jǝbɔ jʊ nɨ bǝ bʊʊla lɛɨ, a mʊgɔ kwaan gǝnɔ gǝm, wʊnɨ maa maajɨ lɛ a mʊgɔ nǝl bǝnɨ. 21Bɛ dʊʊlǝnɔ a ta tʌgo gwanggwang a daa gǝ woi a mʊgɔ mʊrkalɨ nǝb bwangtǝm Kwaamaɨ, a mʊgɔ Kiristi Yesui, a yɔ nǝn a joltɨnɔ gǝm pʌd mɨ dɨtǝm wo. A daa nyɔ.
©️2024 Luke Initiative for Scripture Translation