Afisa 2
2
Nyatǝm Kʊlɨ A Daa Kiristi Woi
1Galɨgǝn, jǝ́ bʌlʌntɨn a kɛl dul bwɨlantɨn jenɔ jǝbɔ bwɨlangkɛltɨn jenɔ. 2Wʊnɨ galɨgǝn jǝ́ yǝm a mʊgɔ gǝnɨ, jǝ́ bwangtǝn kanjǝl yooli nɨ lɛɨ, jǝ́ bwangtǝn Mamm, nǝ maatǝm fɔlɔn yʊwa, yʊwa nɨ dʊwa nǝl nǝb nɨ lɛ nǝn bǝngɨ lɔl kǝngkɨɨ. 3Pʌd bǝnɔ galɨgǝn bǝ yɨ a kʊm jin. Bǝ bwangtǝn wɛl kanjǝl bʊtɔ. Bǝ bwangtǝn kanjǝl nɨ bʊtɔgɔ jǝbɔ nǝlɔ swɨ lɛɨ. Bɨlǝngǝn a yɨm bʊtɔ nabwɨl Kwaamaɨ gǝla gǝla a dul bǝn na a tangǝn nǝfitʌmi.
4Kwaama n nǝ jitǝm bʊnǝn, swɨ bǝn nɛ dangǝn. 5A kwama nɨ bǝ bʌlʌntɨn a mʊgɔ bwɨlangkɛl bǝnɔ gǝmɨ, nǝn gɔ a nǝ bǝn kʊlɨ jǝbɔ Kiristii. (N gola lǝma Kwaamaɨ a bʊʊ nǝn bǝnɨ!) 6A gung bǝn a bwaa dakini jǝbɔ Kiristi. A nǝ bǝn daa yɨm jǝbɔ gɔ a dʌbʌl kwama, a mʊgɔ Kiristi Yesui. 7Kwaama a maa jʊ nɨ sǝ joltɨn nɨ bɛ lɛ a kǝgaɨ sǝ a nʊng shilo lǝma gǝnɔ nɨ mɨ dɨtǝm woi jǝbɔ jǝ nya a daa bǝn woi, a mʊgɔ Kiristi Yesui.
8N gola lǝma Kwaamaɨ a bʊʊ nǝn jen a nǝtǝm bɨlǝngkɛlɨ. N ke bɔ kwaan dul jen. N nǝtǝm lǝma a daagɔ Kwaama woi. 9Ke bɔ a kɛl maatǝm maajɨ nyantɨn nɨ jǝ́ maaɨ, kage kaa nǝl a maa lɨyal. 10Bǝn bǝ kanjǝl maajɨ Kwaamaɨ. A fwal bǝn a mʊgɔ Kiristi Yesui, sǝ bǝ maa maajɨ nyantɨn nɨ Kwaama a fɛka nǝn tɨkǝga gɔ bǝ maaɨ.
Bǝ Yǝlam Win A Mʊgɔ Kiristii
11Bɛ jǝ́ bʊʊla, galɨgǝn jǝ́ Bʌtʌb a mʊgɔ bʌlʌng. Nǝb nɨ a biyo mwɛnɨ (wʊnɨ nǝfitʌmɔ gǝ maa lɛ nǝn kangɨ), jǝ jo jen gɔ, “nǝb nɨ a biyo bɔ mwɛnɨ.” 12Bɛ jǝ́ bʊʊla galɨgǝn jǝ́ nyǝm bɔ Kiristi. Jǝ́ Bʌtʌb a daagɔ nǝbɔ Israilaɨ. Jǝ́ faabǝm a swatǝm yaa nɨ Kwaama a maa jimi. Jǝ́ yǝm a yooli nɨ mɨ jen nǝn yatǝm nǝl. Mɨ jen nǝn Kwaama. 13A kǝngkǝnɨ a mʊgɔ Kiristi Yesui, jen nɨ galɨgǝn jǝ́ kʊtaɨ, a gʊ jen nǝn dɔɔm a gola tʊʊm Kiristii.
14Jʊ a bwɨɨ, Kiristi nǝn gɔ yɨm kwamɨgǝn bǝnɨ, nʊ nɨ a mʊr Yahudawagɔ jǝbɔ Bʌtʌbɔ wini, a kʌbʌm kwalɨ kii nɨ a wʊlaka jii. 15A kalǝm diil Musaɨ jǝbɔ borang gǝnɔ a gola nǝtǝm bʊtɔ gǝn. A maa nyɔ sǝ a mʊr dʊʊm nɨ yoi, Yahudawagɔ jǝbɔ Bʌtʌbɔ a daa gǝ woi ja yǝlam win. A maa nyɔ sǝ a bɛ nǝn yɨm kwamɨgǝn a kʊm jin. 16A dɔ kʊm dʊʊm nɨ yoi tag. A mʊrka ji jǝbɔ Kwaama. Ja yǝlam bʊtɔgɔ win a gola kʊʊtǝm a tɨya. A gola nɨɨ, a kalǝm kii nɨ a wʊlaka jii. 17A bɛ ba kiyo fulon kɛl yɨm kwamɨgǝn a daa jen woi, jǝ́ nǝb nɨ jǝ́ kʊta a daa Kwaama woi. Nǝn gɔ a kiyo fulon kɛl yɨm kwamɨgǝnɔ tag a nǝb nɨ nǝn dɔɔmɨ. 18N daa gǝ woi gwam bǝnɔ yo bǝ nya bɛtǝm a daagɔ Tɛtɛ woi a gola Yʊwagɔ wini.
19Kǝngkɔ jǝ́ ke bɔ faabǝm. Jǝ́ ke bɔ Bʌtʌb. Jǝ́ nǝb yɨm dul jǝbɔ nǝb sagsagɔ. Jǝ́ nǝbɔ lɔ Kwaamaɨ. 20Jǝ́ nǝb nɨ ja mɔ a dʌbʌl fʌlʌm bɛtɔ twamagɨɨ jǝbɔ a nǝbkuwotǝmkǝgagɨɨ. Kiristi Yesu nǝn dul gǝn nǝn gɔ tɛl fʌlʌm kanɨ. 21N daa gǝ woi mɔtǝmɔ a mʊrka dakinii. Nǝn gɔ gǝ dǝg mɔtǝmɔ lɛ a ja kǝga ya gun nɛɨ, ba yǝlam Kan Kwaaman sagsag a Tɛlalɔɨ. 22N daa gǝ woi tag ja mɔ jen dakini jǝbɔ tangǝnɨ sǝ jǝ́ yǝlam daa yɨm Kwaamaɨ a gola Yʊwa gǝn.
Currently Selected:
Afisa 2: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation