2 Korinti 4
4
Shilo A Mʊgɔ Suubʌl Boli
1A kwɛl a yǝlam nǝn nǝn maajɨ nɨ a mʊgɔ bʊnatǝm Kwaamaɨ, mɨsɔ nǝn dem nǝl lɛ. 2Nǝn kɔ kanjǝl gunidul nɨ yǝlam jǝ yʊtǝm lɛɨ, mɨ swagkatǝm wo. Nǝn fʌto bɔ kɛl Kwaamaɨ. Nǝn sʊwa mɛlalɨ bɨlǝngkɛl a talɨ. N daa nɨ nǝbɔ nyǝm lɛ a nǝl jin gɔ nuwo nǝn nǝnɨ. 3Na fulon kɛl lǝmɨ nǝnɔ a sum sumi, ja sumʌm nǝb nɨ a gola bwaaɨ. 4Mammɔ wʊnɨ nǝn gɔ n fɔlɔ yooli nɨɨ, a kul nǝn bʊʊlalɨ nǝb nɨ a nǝ bɔ bɨlǝngkɛlɨ, kage ja kuwo nyalǝm fulon kɛl lǝmɨ dʊʊlǝn Kiristii, gǝ nɨ n jelkalǝng Kwaamaɨ. 5Ke bɔ kiyotǝm kɛl dul nǝn nǝ maa lɛɨ, nǝn kiyo a dul Yesu Kiristii wʊnɨ nǝn gɔ nǝn Tɛlalɔɨ. Nǝn nǝ jwaalɛb jen a kɛl dul Yesui. 6Kwaama nɨ a sʊwa gɔ, “Bɛ nyalǝmɔ a won a kʊm kumtojilii,” nǝn gɔ tag a dǝg nyalǝmɔ won nɛ a mʊgɔ nǝl nǝnɨ, sǝ a won nǝbɔ gǝm gwam sǝ ja nyǝm dʊʊlǝn gǝnɔ a kǝga Kiristii.
7Shilo nɨ nǝn nǝnɨ, gǝ na a mʊgɔ suubʌl boli, sǝ ja nʊng gʌleng kwaan nɨ na a Kwaamaɨ, ke bɔ a nǝn. 8Jǝ nǝ nǝn gaalan nɛ a golantɨnɔ gǝm gwam, a dǝg nǝn bɔ lʊwatǝm nǝn maajɨ nɨ nǝn ya a kǝgaɨ nǝn bǝla maatǝmɔ. Jǝ yǝla nǝm dul lɛ, a dǝg nǝn bɔ nǝn dem nǝl. 9Ja ku naa ja fa nǝm, a dǝg bɔ Kwaama a bǝla nǝn. Jǝ gʊba nǝn nɛ a tǝm, a dǝg nǝn bɔ nǝ bʊla. 10Kwangkwang nǝn na a nyiyo bwaa kanga ja jʌm Yesui, sǝ ja nʊng kʊlɨ Yesui a bʊtɔ nǝn. 11Na nǝn nǝn kʊlɨɨ, nǝn na a nyiyo bwaa a kɛl dul Yesui, sǝ kʊlɨ Yesui a nʊng a bʊtɔ nǝnɔ nɨ na bwaaɨ. 12Nǝn na a nyiyo bwaa, sǝ jen jǝ́ nya kʊlɨ.
13A yǝlam nyɔ nǝn nǝn Yʊwa nǝtǝm bɨlǝngkɛlɔ win jǝbɔ nʊ nɨ a maa mʊlalɨ nɨɨ, “N nǝ bɨlǝngkɛl, n jʊ a bwɨ mǝ sʊwa kɛlɨ.” Nǝn tǝnǝn nǝn nǝ bɨlǝngkɛl, n jʊ a bwɨ nǝn sʊwa kɛl lɛɨ. 14Nǝ nyǝm nyɔ Kwaama nɨ a gung Tɛlalɔ Yesu a bwaaɨ, gǝ tǝgǝn gung nǝn gung a gola Yesui. Bɛ bɛ nǝn nǝn jǝbɔ jen a kǝga gǝn. 15Jʊ nɨ gwam yǝlam jǝ tɨkalɨ jen, sǝ lǝma Kwaamaɨ a bɛ a nǝbɔ gǝm a lada. N gola nɨ bɛ lɛ nǝn buutǝm kang a lada a daagɔ Kwaama woi, sǝ Kwaama a nya dʊʊlǝn.
Yɨm A Gola Nǝtǝm Bɨlǝngkɛl
16Nǝn dem bɔ nǝl. Bʊtɔ nǝnɔ kala lɛ sul, kʊlɨ nǝnɔ kum jǝbɔ kum gǝ yǝlam a fɨ. 17Gaalan nǝnɔ nɨ dǝmɨ, mɨsɔ tɨm dɨtǝm lɛ. Nǝn gɔ fɛka nǝm dʊʊlǝn nɨ lɛ mɨ dɨtǝm woi, wʊnɨ a laa kwaan jǝ nʊngtǝmɨ. 18N ke bɔ kanjǝl nɨ nugɔ kuwo lɛ nǝn dʌng lɛɨ. Nǝn dʌng kanjǝl nɨ mɨ nugɔ kuwo lɛɨ. Kanjǝl nɨ nugɔ kuwo lɛɨ, n kanjǝl nɨ mɨsɔ tɨm shutǝm lɛɨ. Kanjǝl nɨ mɨ nugɔ kuwo lɛɨ, n kanjǝlɔ mɨ dɨtǝm woi.
Currently Selected:
2 Korinti 4: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
