2 Korinti 12
12
Dʊgam Nyangnyang Bulusi Jǝbɔ Kanjǝl Nʊngtǝm Gǝnɔ
1Jǝ́ sɨna mɨ gɔ n maa lɨyal. Lɨyal nɨ a sʊ mɨ bɔ kaa jǝl. Mǝ ja ja kǝga nǝn dʊgam nyangnyang jǝbɔ kanjǝlɔ Tɛlalɔ a nʊng ɨɨ. 2N nyǝm kaa nǝl wo n nǝ bwangtǝm Kiristii. Jolɔ kʊb jeli naal a shui, ja do gǝn ja shu nǝn a dʌbʌl kwama na taal, n daagɔ Kwaama woi. Na gǝ na a mʊgɔ bʊtɔɨ, na mɨ a mʊgɔ bʊtɔɨ, mǝ nyǝm bɔ. Nǝn Kwaama n nǝ nyǝmtǝmɨ. 3N nyǝm nʊ gɔ ja do gǝn ja shu nǝn a lɔ Kwaamaɨ. Na gǝ na a mʊgɔ bʊtɔɨ, na mɨ a mʊgɔ bʊtɔɨ, mǝ nyǝm bɔ. Nǝn Kwaama n nǝ nyǝmtǝmɨ.
4A nyʊwa kaam kɛltɨn a lɔ Kwaamaɨ, wʊnɨ nǝfitʌmɔ mɨ ji nǝn kwaan sʊwatǝmɨ, wʊnɨ mɨ gola sʊwatǝm woi. 5Mǝ maa maa lɨyal nǝn nʊ nɨ. Mɨ mǝ maa lɨyal lɛ nǝn dul mɨ, na ke bɔ gɨyatǝm mǝndɨ. 6Na mǝ swɨ swɨ maatǝm lɨyalɨ, mɨsɔ mǝ yǝlam lɛ na nǝ fʌmʌn, jʊ a bwɨɨ mǝ sʊwa sʊwa bɨlǝngkɛl. Mɨsɔ mǝ maa lɨyal lɛ, kage kaa nǝl a do i, a laa kanga ga kuwo jʊ mǝ maa lɛɨ, kanga gǝ nyʊwam kɛl mǝndɨ lɛɨ.
7Ja dǝg mɨ kaa bɔɔla kage ya n gung dul lɛ a daltɔ kanjǝl nʊngtǝm nɨ ja maa mɨɨ. Bɔɔla nɨ a yǝlam mɨ na shola a bʊtɔ, wʊnɨ Mammɔ a twam, dɨsɔ ya nɨ ɨ gaalan nɛɨ, kage ya n gung dul lɛ. 8Naa taal mǝ kela Tɛlalɔ lɛ a dul kɛl nɨɨ, sǝ a bǝla ɨɨ. 9Nǝngɔ a sʊwa ɨ gɔ, “Lǝma mǝndɨ a wʊlam mʊn, jʊ a bwɨɨ daa gɨyatǝm mʊnɔ, n daa yiitǝm kwaan mǝndɨ.” Gǝ na nyɔ mǝ maa maa fulotǝm nǝl dangǝn nǝn lɨyal mǝndɨ a gɨyatǝm mǝndɨ gǝm, dɨsɔ kwaan Kiristi a yɨ dakini jǝbɔ mǝ. 10N jʊ a bwɨ mǝ maa bǝlátǝm lɛ nǝn gɨyatǝmɔ mǝ nǝngǝnɨ, jǝbɔ tuwolɔ jǝ maa mɨ lɛɨ, jǝbɔ nɔɔtǝm gaalan sɨnatǝmɔ, jǝbɔ gaalantɨnɔ a kɛl dul Kiristii, jʊ a bwɨɨ, a kwama nɨ mǝ gɨya gɨyaɨ, n kwama mǝ nǝn kwaanɨ.
Komtǝm Bulusi A Dul Mʊrkalɨ Nǝb Bwangtǝm Kwaamaɨ A Korintii
11N maa jǝ fʌmʌn. Nǝjen jǝ́ sɨna mɨɨ. A yǝlam nyɔ nǝjen na jǝ́ buu mɨ kang lɛɨ, jʊ a bwɨɨ mɨ daa nɨ wo mǝ dwal a kʊm daltɔ bɛtɔ twamagɨɨ, mǝ ke bɔ kaa jǝl sul. 12Kwaama a maa daltɔ jǝ tatǝm kang a nyiyo jǝbɔ jǝ nʊngtǝm a mʊgɔ jen a gola mɨ. Mǝ maa kanjǝl nɨ nǝn bɨtǝm nǝl. Kanjǝl laatǝm kang nɨ a nʊng mǝ bwɛ twama nǝn bɨlǝngǝn. 13N gola won jǝ́ gɨya a kaam mʊrkalɨ nǝb bwangtǝm Kwaamaɨ? N kɛlɔ mǝ ya jem bɔ jǝ tuuloi ka? Jǝ́ kǝlǝm mɨ bwɨlangkɛl nɨ!
14Kǝngkɔ n maa fɛkalɨ yɔtǝm a daa jen woi, yɔtǝm na taal. Mɨsɔ mǝ ya jem tuulo lɛ, jʊ a bwɨɨ n ke bɔ jǝ jen mǝ saa lɛɨ, nǝjen mǝ saa lɛɨ, jʊ a bwɨɨ ke bɔ bɛtɨ gǝ do tuulo tɛtǝlam jinɔ lɛɨ, n tɛb gǝ do tuulo bɛtɨ lɛɨ. 15Mǝ jʌ jʌ jǝ kang mǝndɨ gwam, jǝbɔ kumtɨn mǝndɨ gwam, nǝn fulotǝm nǝl a kɛl dul jen. Na n sʊtǝn swɨtǝm jeni, jǝ́ shig shig swɨtǝm mǝndɨ ka? 16Tangǝn jenɔ a jǝla gɔ mǝ ya jem bɔ tuulo. Kaam jenɔ bʊʊla lɛ gɔ mǝ maa jem yʊlan, mǝ nɔɔ dul jen a gola swagtǝm! 17N bǝm jen a daa kaa nǝl woi, a mʊgɔ nǝb nɨ mǝ twam a daa jen woi ka? 18N kela Titus mǝʊ a yɔ. N twam kaa kɨla bǝn dakini jǝbɔ gɔ. Titus a bǝm jen bǝm ka? Bʊʊlalɨ mɨ mɨ win jǝbɔ a gǝnɔ ka? Ke bɔ golagɔ win nǝn bwangtǝn nɛɨ ka?
19Jǝ́ maa bʊʊlalɨ jengɔ nǝn bɛ nǝn kɛl sǝ nǝn kʌshi dul nǝnɔ ka? Mɨ nyɔ! A kǝga Kwaamaɨ nǝ sʊwa kɛlɔ lɛɨ, nǝn na a Kiristii. Gwam jʊ nɨ nǝ maa sǝ nǝ sʊ jem kwaan, jǝ́ nǝbɔ nǝ swɨ lɛɨ. 20Mǝ nyʊwa taal lɛ mǝʊ kage na n yɔɨ, ya n nya jen ke bɔ kanga mǝ swɨ lɛɨ. Jen tʌjen jǝ́ kuwo i n ke bɔ kanga jǝ́ swɨ lɛɨ. Mǝ nyʊwa taal lɛ kage ya n nya gʊbkatǝm, jǝbɔ nungon, jǝbɔ fitǝm nǝl, jǝbɔ swɨtǝm dul, jǝbɔ kabkatǝm naa, jǝbɔ yʊʊlakatǝm, jǝbɔ gungtǝm dul, jǝbɔ kutʌm. 21Mǝ nyʊwa taal lɛ mǝʊ kage na n yǝla n yɔɨ, Kwaama mǝndɨ shig shig dul mǝndɨ a kǝga jen. N maa fitǝm nǝl a dul kaamɨ a lada, wʊnɨ kwama gɔ ja maa bwɨlangkɛl galɨgǝnɨ, ja yǝla bɔ ja bǝla maatǝm bulonɔ, jǝbɔ kanjǝl bwɨlan jinɔ nɨ ja maaɨ.
Currently Selected:
2 Korinti 12: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
