1 Korinti 6
6
Ka Jǝ́ Yɔ Lɛ Nǝn Katǝm Kɛl A Kǝga Nǝb Nɨ Ke Bɔ Nǝb Bwangtǝmɨ
1Na kaa nǝl a kʊm jen nǝn katǝm kɛl kɨla gɨɨ, maa nyǝn yɔ lɛ nǝn kɨla gɔ a kǝga nǝb maatǝm borang nɨ mɨ sagsagɨ? Bɛ jǝ́ yɔ nǝn a kǝga nǝb sagsagɨ. 2Jǝ́ nyǝm bɔ n nǝb sagsag maa yooli nɨ gǝm borang lɛɨ ka? Na nǝjen jǝ́ maa yooli nɨ gǝm borang lɛɨ, mɨsɔ jǝ́ dwal lɛ jǝ́ maa bɛlɨ kanjǝl nɨ ka? 3Jǝ́ nyǝm bɔ bǝ maa maa bɛtɔ twama Kwaamaɨ gǝm borangɨɨ ka? Na gǝ na nyɨɨ, n wɛ a bwɨ jǝ́ dwal bɔ jǝ́ maa borang kanjǝl nɨ a ke yɨm yooli nɨɨ? 4Na jǝ́ nǝngǝn nǝn katǝm kɛl nyɨɨ, a bwɨ nyǝn tag jǝ́ yɔ lɛ nǝn a kǝga nǝb nɨ mɨ ji nǝn nyiyo a mʊrkalɨ nǝb bwangtǝm Kwaamaɨ? 5Mǝ sʊwa jʊ nɨ sǝ jǝ́ nyʊwa gunidul. Mɨ nʊ nɨ wo win nǝn nyǝmtǝm a kʊm jen dwal dɔ kʊm kambɨɨ lɛɨ ka? 6Kɛ nǝ bwangtǝm gǝ ka ka kɛl kɨla gɨɨ a kan borang. Gǝ yɔ yɔ nǝn a kǝga nǝb nɨ ke bɔ nǝb bwangtǝmɨ!
7Kabkatǝm kɛl, n yalatǝm a daa jen woi. A laa bɔ jǝl jǝ́ kʊ nǝl, ja bǝm jen ka? A laa bɔ jǝl jǝ́ kʊ nǝl tag ja ja jen ka? 8N wɔ jen nǝn dul jen jǝ́ bǝmka lɛ. Jǝ́ jabka lɛ. Jǝ́ maa kɛtǝlam jenɔ gǝm nyɔ tʌji!
9Jǝ́ nyǝm bɔ, nǝb nɨ mɨ sagsagɨɨ mɨsɔ jǝ nya kʊla fɔlɔn lɔ Kwaamaɨ lɛɨ ka? Ka ja swag jen nɛ! Nǝb bulonɔ, jǝbɔ nǝb bwangtǝm shomɔ, jǝbɔ batǝm kalalɨgɔ, jǝbɔ balɨ nɨ daa lɛ nǝn kǝga balɨɨ, 10jǝbɔ nǝbkuumɔ, jǝbɔ nǝb wɛlɔ, jǝbɔ nǝbɔ a nɔɔ bʊgɛ maa ji lɛɨ, jǝbɔ nǝb tuwolatǝm tuwolɔ, jǝbɔ nǝb jatǝm mɨbamɔ, mɨsɔ jǝ nya kʊla fɔlɔn lɔ Kwaamaɨ lɛ. 11Kaam jenɔ jǝ́ na nyɔ galɨgǝn. Ja saal jen, jǝ́ sagsag. Ja dǝg jen jǝ́ yǝlam nǝb dǝngdǝng a dun Tɛlalɔ Yesu Kiristii, jǝbɔ Yʊwa Kwaama bǝnɨ.
Jǝ́ Dʊʊl Kwaama Nǝn Bʊtɔ Jenɔ
12Kaam jenɔ gɔ, “Kanjǝlɔ gwam ja jǝla mɨ maatǝmɔ.” Nǝngɔ mǝ sʊwa mǝʊ, “Ke bɔ kanjǝlɔ gwam n jǝ nyaɨ.” Kaam jenɔ gɔ, “Kanjǝlɔ gwam ja jǝla mɨ maatǝmɔ.” Nǝngɔ mǝ sʊwa mǝʊ, “Mɨsɔ mǝ yǝlam bwɛ jwaalɛ kanjǝl lɛ. 13Jǝjalǝnɔ ja maam fʌl. Fʌlɔ ja maam jǝjalǝn.” Kwaama kal kal gwam jinɔ yo, wʊnɨ jǝbɔ a wuleni. Bʊtɔgɔ n ke bɔ a bulon, na a Tɛlalɔɨ, Tɛlalɔ nǝn gɔ dʌng bʊtɔgɔ lɛɨ. 14Kwaama gung gung bʊtɔ bǝnɔ a bwaa nǝn kwaan gǝnɔ, kanga a gung Tɛlalɔ a bwaaɨ.
15Jǝ́ nyǝm bɔ bʊtɔ jenɔ n jinʌn Kiristii ka? Mǝ do do jinʌn Kiristii n dǝg a yǝlam jinʌn nɔɔlɨ kalalɨ ka? Mɨ nyɔ! 16Jǝ́ nyǝm bɔ nʊ nɨ pʌd a mʊrka bʊtɔ jǝbɔ nɔɔlɨ kalalɨɨ, ja yǝlam bʊtɔgɔ wini ka? A mʊla mʊlaɨ sʊwa lɛ gɔ, “Jǝ yo nɨ ja yǝlam bʊtɔgɔ win.” 17Nʊ nɨ a mʊrka dul gǝnɔ jǝbɔ Tɛlalɔɨ, a yǝlam win jǝbɔ gɔ a yʊwa. 18Jǝ́ mwal bulonɔ. Pʌd tangǝn bwɨlangkɛlɔ nǝl maa lɛɨ, a ke bɔ bʊtɔ gǝnɔ na maatǝm bulonɔ. Nʊ nɨ maa bulon nɛɨ, gǝ maa bwɨlangkɛl nɨ kal bʊtɔ gǝnɔ lɛɨ. 19Jǝ́ nyǝm bɔ bʊtɔ jenɔ n Kan Kwaaman Yʊwa Kwaamaɨ wʊnɨ a nǝl jeni, wʊnɨ jǝ́ nya a daagɔ Kwaama woi ka? Jen jǝ́ ke bɔ a dul jen. 20Kwaama a ten jen teni, a ywa jǝ tentǝm jenɔ a lada. A dul kɛl nɨɨ, bɛ jǝ́ dʊʊl Kwaama nǝn bʊtɔ jenɔ.
Currently Selected:
1 Korinti 6: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
