1 Korinti 3
3
Fatǝm Maajɨ Kwaamaɨ
1Kambɔ, mɨsɔ maa lɛ n sʊwa jen kɛl na nǝb nɨ a mʊgɔ Yʊwaɨ. Mǝ sʊwa jen na nǝb nɨ nǝn bʊʊlalɨ nǝfitʌmi, na bɛtɔ fetʌn a bwangtǝm Kiristii. 2N yʊl mǝ nɔɔ nǝn jeni, ke bɔ jǝjalǝn nɨ a kwam kwamɨ mǝ nǝ jeni, jʊ a bwɨɨ jǝ́ la bɔ jatǝm jǝjalǝn. A bɛ nǝn a kǝngkɨɨ, jǝ́ la bɔ dɨn. 3A bɛ nǝn a kǝngkɨɨ, jǝ́ na a bʊʊlalɨ nǝfitʌmi. Na nungon wo jǝbɔ gʊbkatǝm a kʊm jeni, jǝ́ ke bɔ a yooli ka? Ke bɔ maajɨ bʊtɔ jǝ́ maa lɛɨ ka? 4Na kaa nǝl a sʊwa gɔ, “Mǝ na a Bulusi,” kaa gɔ, “Mǝ na a Afolosi.” N ke bɔ bʊʊlalɨ nǝfitʌmi jǝ́ maa lɛɨ ka?
5Nuwo nyɨ nǝn Afolosi? Nuwo nyɨ nǝn Bulus tagɨ? Jǝ ke bɔ jwaalɛb Kwaamaɨ ka? N nǝb nɨ jǝ́ nǝ bɨlǝngkɛl a gola jini, pʌd jinɔ jǝ nǝngǝn nǝn maajɨ nɨ Tɛlalɔ a nǝ ji dǝngdǝngɨ. 6Nǝmǝ mǝ kwal dʊʊmɨ. Afolos nǝn gɔ a tal mwɛmɨ. Nǝn Kwaama a dʊʊl nǝnɨ. 7Nǝ kwalagɔ jǝbɔ nǝ taltǝm mwɛmɔ mɨ ji a nyiyo jǝl. Nǝn Kwaama a laa jǝlɨ. Nǝn gɔ a dʊʊl nǝn dʊʊmɨ. 8Nǝ kwalagɔ jǝbɔ nǝ taltǝm mwɛmɔ jǝ win. Gwam jinɔ jǝ nya nya ywatǝm kemʌn maajɨ jinɔ dǝngdǝng a dul maajɨ jinɔ gǝm. 9Nǝn nǝ fatǝm maajɨ Kwaamaɨ. Jen jǝ́ tɔtwam Kwaamaɨ, mɔtǝm Kwaamaɨ tag.
10A dul lǝma nɨ Kwaama a nɨ ɨɨ, n swa fʌlʌm mɔtǝmɔ maa na nʊ nɨ a nyǝm mɔtǝmɨ. Kaa a sʊtǝn mɔtǝmɔ a dul gǝn. Bɛ nǝl a nyǝm mɔtǝm nɨ gǝ sʊtǝn nɛ a dul gǝnɨ. 11Fʌlʌm nɨ mɨ nʊ nɨ wo dwal lɛ a swa kaaɨ, na ke bɔ nʊ nɨ ja kwɛl ja swa swaɨ, Yesu Kiristi nǝn gɔ n fʌlʌm nɨɨ. 12Kaam nǝbɔ a sʊtǝn mɔtǝmɔ nǝn kemʌn mʊn, jǝbɔ maalʊ, jǝbɔ tatǝn bʊmɨ a dul fʌlʌm nɨɨ. Kaamɨ n tɨya, jǝbɔ yǝla, jǝbɔ mɛlang ja mɔ nǝnɨ. 13Maajɨ nǝbɨɨ gwam nʊng nʊng, jʊ a bwɨɨ nǝn kɔkɔ borangɔ, wumo wumo. Jǝ nʊng gǝn nǝn kǝla. Kǝla nɨ tɛl tɛl maajɨ nǝbɨɨ pʌd ja maaɨ, na ja maa a nya jǝbɔ a bwɨlaɨ. 14Na maajɨ nɨ nʊ a maaɨ a twɨm bɨɨ, yo yo lǝmagɔ. 15Na maajɨ nǝlɨ a twɨmɨ, mɨsɔ nya kaa jǝl lɛ. Nʊ gɔ bʊʊ bʊʊ, maamɔ nʊ nɨ a bʊʊ a ben kǝlaɨ.
16Jǝ́ nyǝm bɔ, jǝ́ Kan Kwaaman Kwaamaɨ ka? Jǝ́ nyǝm bɔ Yʊwa Kwaamaɨ yǝm a mʊgɔ nǝl jen tagɨ ka? 17Na kaa nǝl a kal Kan Kwaaman Kwaamaɨ, Kwaama kal gǝn kal, jʊ a bwɨɨ Kan Kwaaman Kwaamaɨ sagsag. Jen nǝn dul jen jǝ́ Kan Kwaaman gǝn.
18Bɛ ka ń swag lɛ dul mʊnɔ. Na kaa nǝl a kʊm jen kuwo lɛ gɔ gǝ nǝ yʊlanɨ, kanga yooligɔ a do yʊlanɨ, bɛ ga do dul gǝnɔ gǝ nǝ fʌmʌn, sǝ ga yǝlam nǝ yʊlan. 19Yʊlan yooligɔ n fʌmʌn a daagɔ Kwaama woi. A mʊla mʊlaɨ gɔ, “Gǝ ta ta nǝb yʊlanɔ nǝn shil jinɔ.” 20A mʊla mʊlaɨ tag gɔ, “Tɛlalɔ a nyǝm bʊʊlalɨ nǝb yʊlanɨ, n jǝl nǝn kwan.” 21A dul kɛl nɨ, bɛ ka bǝ maa lɛ lɨyal nǝn nǝfitʌmɔ, jʊ a bwɨɨ kanjǝlɔ gwam na a jen. 22Bulus, jǝbɔ Afolos, jǝbɔ Kefas, jǝbɔ yooligɔ, jǝbɔ kʊlɨgɔ, jǝbɔ bwaagɔ, jǝbɔ kanjǝl nɨ kǝngkɨɨ, jǝbɔ a kǝgagɔ, pʌd na a jen. 23Jen jǝ́ na a Kiristii. Kiristi na a Kwaamaɨ.
Currently Selected:
1 Korinti 3: DBD
Highlight
Copy
Compare
Share
Want to have your highlights saved across all your devices? Sign up or sign in
©️2024 Luke Initiative for Scripture Translation
