प्रकाशितवाक्य 22

1बल्ति ओ स्वर्ग़दूता ने मनु बिल्‍लौर जिसड़ी शीशे आलीकर झलकती हुली, जीवन चे पाणीया ची नदी ङिखाणली। जको नरीकार ते मैमणे चे सिंहासन कनु निकलती कर ओ शहरा ची सड़के चे आधी मां बेहती। 2ते नदी चे ऐ पासु, ते नदी चे ओ पासु, जीवन चे पेड़ हुते, ओचे मां ब़ारहा तरह चे फल लाग़ते, ते ऊं पेड़ हर मेहने फल ङिते, ते ओ पेड़ चे पता लारे सारी जाति-जाति ची बन्दी ठीक हुती।

3ते ओठे कङी श्राप नी हुवी ते नरीकारा चा ते मैमणे चा सिंहासन ओ पवित्र शहर मां हुवी, ते ओचे दास ओची सेवा करे। 4ते ओचे मुँह आमणे-सामणे ङेखे, ते ओचे नां वांचे मत्थे उपर लिखले आले हुवी। 5ते ओठे कङी वी रात नी हुवी, ते वानु ङीवे ते सूरजा चे सोज़ले ची जरुरत नी हुवी, कांकि प्रभु नरीकार वानु सोज़ले ङिही, ते वे हमेशा राज़ करते रिहे।

ईशु चा पुनरागमन

6ते ओ स्वर्ग़दूता ने मनु केहले, “ये बाता विश्‍वास चे लायक ते सच्‍च छी। ते प्रभु नरीकार जको भविष्यवक्‍ता नु आपणी आत्मा ङिये, आपणे स्वर्ग़दूता नु भेज़ले, कि आपणे दासा नु वे बाता जाये ब़ोहत जल्दी पुरे हुवणे जरुरी छै ङिखाणो।”

7ईशु ने केहले, “ङेखा, मैं ब़ोहत ही जल्दी आणे आला छै, धन्‍न छै ओ, जको ऐ किताबे ची भविष्यवाणी नु मने।”

8मैं ओही यूहन्‍ना छै, जको ये बाता नु सुणता, ते ङेखता, ते जिसे बेले मैं सुणले, ते ङेखले। ते जको स्वर्ग़दूत मनु ये बाता ङिखाणता, मैं ओचे पग़्ग़ा मां ङण्डवत करने चे वास्ते ढेती पला। 9ते ओणे मनु केहले, “ङेख, तु इसड़े ना कर। कांकि मैं दुधा ते दुधे भावां चा ते भविष्यवक्‍ता चा ते ये किताबे चा बाता नु मनणे आला लारे चा दास छै। नरीकारा नु ही ङण्डवत कर।”

10बल्ति ओणे मनु केहले, “ये किताबे ची भविष्यवाणी चा बाता बन्द ना कर, कांकि समय गोढु छै।

11“जको बुरे करते आले, वे बुरे करते रिहो, जको घिनौने बणले आले छी, वे घिनौने ही बणले रिहो। जको धर्मी छै, ओ धर्मी ही बणला रिहो, ते जको पवित्र छै, ओ पवित्र बणला रिहो।”

12ईशु ने केहले, “ङेखा, मैं ब़ोहत जल्दी आणे आला छै, ते हर-हेक नु ओचे कामा चे अनुसार बदला ङेणे चे वास्ते प्रतिफल माये कनु छै। 13#प्र.वा 1:8; प्र.वा 1:17; 2:8मैं अल्फा ते ओमेगा, पेहला ते आखरी, आदि ते अन्त छै।”

14“धन्‍न छी वे जको आपणे ओढ़णा नु धोती गिही, कांकि वानु जीवन चे पेड़ा चे गोढु आणे चा अधिकार मिली, ते वे दरवाजे कनु हुती कर शहरा मां घिरे। 15ये कुत्ती कामे, जादू-टूणे करने आले, ते व्यभिचारी, ते हत्यारे, ते मूर्तिपूजक, ते कूड़ा उपर टुरणे आले, ते कूड़ लारे प्रेम राखणे आले, ब़ाहरु पले रिहे।

16“मैं, खौद्द ईशु, दुधे ते कलीसिया चे वास्ते, यां बाता ची ग़वाही ङेणे चे वास्ते, मैं आपणा स्वर्ग़दूत भेज़े पला। मैं दाऊद चे परिवारा चा वंश छै। ते सवेले चा चमकणे आला तारा छै।”

17ते पवित्र आत्मा, ते बीन्दणी ङोनी किही, “आ!” ते सुणने आला वी किहो कि, “आ!” जको तरसेला आला हो, ओ वी आओ। ते जको कुई चाहवे ऊं वी जीवन चे पाणी नु यूंही गिहो।

18मैं यहून्‍ना हर-हेक नु जको ऐ किताबे ची भविष्यवाणीया चा बाता सुणे। ग़वाही ङिये पला, कि अगर कुई बन्दे यां बाता महु कहीं बढ़ावी, ते नरीकार वा आफता नु जको ऐ किताबे मां लिखलीया आलीया छी, ओचे उपर ढ़ावी। 19ते अगर कुई ऐ भविष्यवाणी ची किताबे चा बाता महु कहीं काढ़ती नाखे, ते नरीकार ओ जीवन चे पेड़ ते पवित्र शहर महु जाई चर्चा ऐ किताबे मां छै, ओचा हेंस्सा काढ़ती नाखी।

20ईशु जको यां बाता ची ग़वाही ङिये, ओ हा किहे, “हव्वे! मैं ब़ोहत ही जल्दी आणे आला छै।”

आमीन। हे प्रभु ईशु आ!

21प्रभु ईशु चा अनुग्रह, पवित्र लौका चे लारे रिहो। आमीन।

Currently Selected:

प्रकाशितवाक्य 22: ODR

Highlight

Copy

Compare