गलातियां 6

हेके ङुजे ची सहायता करा

1हे माये भऊ, तम्चे कुई बन्दे अगर कुई पापा मां पकड़ीती वी जाये तां, तम्ही जको आत्मिक छिवा ओनु नरमाई लारे सम्भाला ते जाये कनु बल्ति ओ विश्‍वास मां आती जाओ, ते आपणी वी चौकसी राखा ताकि तम्ही परीक्षा मां ना पड़ा। 2ङुखा बेले हेके ङुजे ची सहायता करा तां मसीह चे व्यवस्था नु पुरे करा। 3कांकि अगर कुई आपणे आप नु कहीं समझे, ते ऊं कहीं वी कोनी छै, तु ऊं आपणे आप नु धोक्‍का ङिये 4हर हेक बन्दे आपणे कामा नु खौद्द जांचती गिहो, इसड़ा करने उपर ओनु आपणे खौद्द उपर बिना किसी लारे मिले गर्व करने चा मौका मिली। 5कांकि हर हेक बन्दे आपणा ही बोझ आप चवी।

6जानु नरीकारा चा वचन सुणाला गेला ओनु चाही छै कि, जको उत्तम चीज ओकनु छै, ओचे मां आपणे वचन सुणावणे आले साथी नु आपणा हेंस्सेदार बणाती गिहो।

7आपणे नु धोक्‍का ना ङिया, नरीकारा नु कुई वी मूर्ख ना बणा सग़ी जको जिसड़ा राहवी उसड़ा बाढी 8जको आपणे पापी शरीरा चे सुभाव लारे राहवे, ओ आपणे शरीरा लारे विनाश ची रहड़ बाढी, पर जको पवित्र आत्मा चे खेता मां बीज राहवी, ओह पवित्र आत्मा कनु अनन्त जीवन ची रहड़ बाढी। 9ऐवास्ते आवा भलाई करते बेले कङी वी कोनी थाकु, कांकि अगर अम्ही भलाई करते रिहुं, तां आच्छा ब़ेहला आणे उपर अम्हानु ओचा फल मिली। 10ऐवास्ते जिठे तक मौका मिले अम्ही सारा लारे भलाई करु इठे तक कि खास करती आपणे विश्‍वास करने आला भावां लारे।

आखरी चितावनी

11ङेखा हमा मैं केङे बङे-बङे अक्षरा मां तम्हानु आपणे हाथा लारे लिखले, 12वे सेर्फ ङुजे यहूदिया नु ब़ाहर चा ङिखावा करना चाहवी, इसड़े लौक तम्चा खतना करवाणे वास्ते तम्चे उपर दब़ाव नाखी, ब़स ऐवास्ते कि वे मसीह चे क्रूसा चे सुसमाचार कि वजह कनु सताले ना जाओ। 13कांकि खतना कराणे आले आप तां मूसा ची व्यवस्था चा पालन ना करी, पर तम्चा खतना ऐवास्ते करवाणा चाहवी कि तम्ची शरीरिक दशा उपर घमण्ड करो कि वांचे केहणे चे उपर तम्ही खतना करवाला। 14पर यूं ना हो कि मैं नेरी कुई बाते चा घमण्ड करे, सेर्फ अम्चे प्रभु ईशु मसीह चे क्रूसा चा, जाये जरिये संसार माई नजरी मां ते मैं संसारा ची नजरी मां क्रूसा उपर चढ़ाला गेला 15कांकि ना खतना ते ना बिना खतना कोच्छ छै, पर नवीं सृष्टि। 16ते जितने ये रीति उपर चले वांचे उपर, ते नरीकारा चे इस्राएल चे लौका उपर शान्ति ते दया हुती रिहो,

17चिठ्ठी नु लिखती कर बन्द करते बेले मैं तम्हा कनु बिनती करे पला कि उग़ते वास्ते कुई मनु ङोख ना ङियो, कांकि मैं ईशु चे दाग़ा नु आपणी देह मां गेहली फिरे। 18हे माये भऊ, अम्चे प्रभु ईशु मसीह चा अनुग्रह तम्ची आत्मा चे लारे सदा रिहो। आमीन।

Currently Selected:

गलातियां 6: ODR

Highlight

Copy

Compare