इफिसियां 5

सोज़ले ची ऊलाद्ध बणा

1ऐवास्ते प्यारे ब़ाला आलीकर नरीकारा चे भांसु चला। 2ते प्रेम मां चला, जिंवे मसीह ने वी अम्चे लारे प्रेम करला, ओणे आपणे आप नु सोख ङेणे आली खुश्बु ची तरह नरीकारा नु कुर्बानी ङिली जती।

3जिंवे नरीकारा चे पवित्र लौका चे योग्य छै, यूंही तम्चे मां व्यभिचार ते किसी तरह चे अशुद्ध काम जा लोभ ची चर्चा तक ना हो। 4ते ना बेइज्जती, ना ही मूर्खा ची चर्चा करली हो, ना ही मजाक ची कांकि ये बाता शोभा ना ङिही, सेर्फ नरीकारा नु धन्यवाद ही ङिला जाओ। 5कांकि तम्ही हा जाणा कि इसड़ा कुई वी बन्दे जको व्यभिचारी छै ते अशुद्ध, जा लालच, लालची बन्दे जको मूर्ति पुज़ा करने आले चे बराबर छै, मसीह ते नरीकारा चे राज़ मां ना जा सग़ी,

6कुई तम्हानु फालतु बाता मां धोक्‍का ना ङियो, कांकि जा कामा ची वजह कनु नरीकारा चा गुस्सा आज्ञा ना मनणे आले बन्दा उपर रिहे, 7ऐवास्ते तम्ही वांचे भईवाल ना हुवा।

8कांकि पेहले तम्ही अन्धारे मां हुती पर हमा प्रभु मां आणे चे बाद तम्ही ज्योति मां आती गेली, ज्योति ची ऊलाद्धी आलीकर चला। 9हर तरह ची निर्दोषीता भलाई ते सच्‍चाई मां सोज़ले चे फल छी। 10ते हा परखा कि ङेखा प्रभु नु का आच्छे लाग़े? 11अन्धकार चे कामा मां वांचा भईवाल ना हो बल्कि वानु चिताती ङिया। 12कांकि वांचे लुकले आले कामा ची चर्चा करनी वी बेइज्जती चे लायक छै, 13पर जितने कामा मां चिताले जाये वे सारे काम सोज़ले लारे प्रकट हुती जाये। 14कांकि जको ज्योति छै वा सारा नु सोज़ले ङिये, ऐवास्ते ईं केहले गेले,

“हे नूहले आले जाग़,

ते मुड़दा महु जीता हुती ऊठ,

ते मसीह ची ज्योति तम्चे उपर चमकी।”

15ऐवास्ते ध्याना लारे ङेखा, कि किसड़ी चाल चला पले, बेवकूफ आलीकर ना, पर समझदारी लारे चला। 16#कुलु 4:5मौके नु कीमती समझा, कांकि बुरी ङिहें छी। 17बैवकूफ ना बणा ध्यानारीत रीत समझा कि प्रभु ची मर्जी का छै,

18दारु पीती कर मतवाले ना बणा, कांकि ऐचे लारे लोचपण हुवे, ऐकनु दूर रिहा, ते पवित्र आत्मा लारे भरीते जावा, 19#कुलु 3:16,17ते आपस मां भज़न ते स्तुतिगान ते आत्मिक गीत गाले करा, ते आपणे-आपणे मना मां प्रभु चे सामणे भज़न गाते ते किर्तन करते रिहा। 20ते सदा सारीया बाता चे वास्ते अम्चे प्रभु ईशु मसीह चे नांवा लारे नरीकार ब़ा चा धन्यवाद करते रिहा।

मोणस ते घराआलीया

21ते मसीह चा कद्दर करते समय हेके ङुजे चे अधीन रिहा।

22 # कुलु 3:18; 1 पत 3:1 हे घराआलीया, आपणे-आपणे मुणसा चे यूं अधीन रिहा, जिंवे प्रभु चे। 23कांकि मोणस, घराआली चा ठोङ छै, यूंही ही मसीह कलीसिया चा ठोङ छै, जको खौद्द ची देह ते कलीसिया चा उद्धारकर्ता छै। 24पर जिंवे कलीसिया मसीह चे अधीन छै, यूंही घराआलीया हर हेक बाते मां आपणे मुणसा चे अधीन रिहो।

25 # कुलु 3:19; 1 पत 3:7 हे घराआले, आपणी-आपणी घराआली लारे प्रेम राखा, जिंवे मसीह ने वी कलीसिया लारे प्रेम करती कर आपणे आप नु वांचे वास्ते ङिती ङिले। 26कि वानु वचना चे लारे पाणीया चे इश्नान लारे शोद्ध करती पवित्र बणाओ। 27ते विनु हेक इसड़ी तेजस्वी कलीसिया बणाती कर आपणे गोढु खड़ी करो, जाये मां ना कंलक, ना झुर्री, ना कुई इसड़ी चीज हो, बल्कि पवित्र ते निर्दोष हो। 28मसीह आपणी कलीसिया लारे प्रेम राखे, ऐवास्ते जरुरी छै, घराआले नु आपणी घराआली नु इसड़ा प्रेम करो जिंवे ओ आपणे शरीरा लारे प्रेम करे। जको आपणी घरा आली लारे प्रेम राखे ओ खौद्द लारे प्रेम करे। 29जिंवे बन्दे ने आपणे शरीरा चे लारे बैर कोनी राखला बल्कि ओची परवरीस करे, यूंही मसीह ने कलीसिया ची परवरीस करली। 30ऐवास्ते अम्ही ओचे शरीरा चे अंग छिऊं। 31पवित्रशास्त्र मां इसड़े लिखले आले छै, “ऐवास्ते मर्द आपणे आई-ब़ा नु छोड़ती कर आपणी घराआली लारे मिड़ला रिही, ते वे ङोनी हेको तन हुवे,” 32हा भेद घणा बङा छै मैं तम्हानु बावड़े पला मसीह ते कलीसिया उपर वी लाग़ु रिहे। 33जको घरा आला छै, आपणी घराआली लारे आपणे जिसड़ा प्रेम करो, ते घराआली वी आपणे मुणसा ची इज्जत करो।

Currently Selected:

इफिसियां 5: ODR

Highlight

Copy

Compare