इफिसियां 2

मौत कनु जीवन ची तरफ

1 # कुलु 2:13 ओणे तम्हानु जिवाले, जको आपणे अपराधा ते पापा ची वजह कनु मरले आले हुते, 2जाये मां तम्ही पेहले ऐ संसारा ची रीति उपर, ते आसमाना चे अधिकार चे हाकिम यानि वे आत्मा चे अनुसार चलते, जको हमा वी आज्ञा ना मनणे आला मां काम करे। 3यांचे मां अम्ही वी सब चे सब पेहले आपणे शरीरा ची लालसा मां ङिहें गुजारते, ते शरीर ते मना ची इच्छा पुरी करते, ते नेरे लौका आलीकर सुभाव ही कनु क्रोध ची ऊलाद्ध हुते।

4पर नरीकारा ने जको दया करने आला छै, आपणे ओ बङे प्रेम ची वजह जाये कनु ओणे अम्चे लारे प्रेम करला, 5जब अम्ही अपराधा ची वजह मरले आले हुते तां अम्हानु मसीह चे लारे जीते करले, ते अनुग्रह लारे ही तम्चा उद्धार हुला। 6ते अम्ही मसीह ईशु मां छिऊं ऐवास्ते नरीकारा ने अम्हानु मसीह मां जीते करले ते मसीह ईशु लारे स्वर्ग़ा मां ब़िसाणले, 7कि ओ आपणी वे कृपा लारे जको मसीह ईशु मां अम्चे उपर छै, आणे आले समय मां आपणे अनुग्रह चा आसीम धन ङिखाणो। 8कांकि तम्ही विश्‍वास करला ते नरीकारा ची दया लारे तम्चा उद्धार हुला। हा तम्चे तरफु कोनी, बल्कि नरीकारा चा दान छै। 9ते ऐवास्ते तम्ही आपणे कर्मा ची वजह कनु कुई घमण्ड ना करो। 10कांकि अम्ही ओचे बणाले आले छिऊं, ईशु मसीह मां भले कामा वास्ते बणाले गेले छिऊं। नरीकारा ने अम्हानु पेहले कनु तियार करले। के अम्ही ऊं करते हुले आपणी जीन्दगी बिताऊं।

मसीह मां हेक

11ऐवास्ते याद राखा कि तम्ही शरीरा ची रीति लारे नेरीया जातिया छिवा ते जको लौक शरीरा मां हाथा चे करले हुले खतने लारे खतने आले किहवावी, वे तम्हानु बिना खतने ची किही। 12तम्हानु याद छै कि तम्ही पेहले मसीह कनु अलग़, इस्राएल ची प्रजा चे पद्द कनु अलग़ करले हुले, नरीकारा ने आपणे पवित्र लौका लारे जको वायदा करला हुता ओचे मां हेंस्सेदार कोनी हुते, ते दुनिया मां सच्‍चे नरीकारा चे बिना आसा चा जीवन जीते। 13पर नरीकारा मां तम्ही जको पेहले दूर हुते, ईशु मसीह चे लुहींया चे जरिये साफ हुती कर हमा नरीकारा चे गोढु आती गेले। 14प्रभु ईशु मसीह ही छै जको अम्चा मेल-मिलाप कराणे आला छै, ओणे यहूदी ते नेरीया जातिया ची नफरत ची कन्धे नु आपणी कुर्बानी लारे ढाती ङुंहु नु हेक करती ङिले। 15#कुलु 2:14ते आपणे शरीरा मां बैर यानि वा व्यवस्था जाया आज्ञा विधिया ची रीतिया उपर हुतीया, मिटाती ङिले कि ङुंहु लारे आपणे मां हेक नवें इन्सान पैदा करती कर मेल कराती ङियो। 16#कुलु 1:20ते क्रूसा उपर बैर नु नाश करती कर ऐचे जरिये ङुंहु नु हेक देह बणाती कर नरीकारा लारे मिलाओ। 17ऐवास्ते आती कर ओणे तम्ही जको नरीकारा कनु दूर हुते ते जको गोढु हुते वानु ङुंहु नु मेल-मिलाप चा सुसमाचार सुणाला। 18कांकि मसीह चे वजह हेको ही पवित्र आत्मा मां अम्ही ङोनी यहूदी, नेरीया जातिया ची पोंहच ब़ा नरीकारा तक हुवे।

19नतीजा हा छै कि ना तम्ही विदेशी रेहले ते ना ही मुसाफिर, पर हमा तां तम्ही नरीकारा चे पवित्र लौका चे साथी ते नरीकारा चे कुणम्बे चे हुती गेले। 20तम्ही हेक इसड़े घर छिवा, जको प्रेरित ते भविष्यवक्‍ता ची नीम उपर बणले आले छिवा जाया कूणे चा पत्थर खौद्द ईशु मसीह ही छै। 21मसीह मां सारी रचना हेक लारे मिलती कर प्रभु मां हेक पवित्र मन्दर बणता जाये। 22मसीह मां तम्ही वी हेक प्राथनाघर बणती जावा जाये मां नरीकार वी पवित्र आत्मा चे जरिये रिहुं लाग़ो।

Currently Selected:

इफिसियां 2: ODR

Highlight

Copy

Compare