कुलुस्सियां 3

1तां जिसे बेले तम्ही मसीह चे लारे जिवाले गेले, तां स्वर्ग़ीय चीजा ची खोज मां रिहा, जिठे मसीह मोजुद छै, ते नरीकारा चे सज़्ज़े पासु ब़ेहला। 2धरती चीया चीजा उपर ना पर स्वर्ग़ीय चीजा उपर ध्यान लावा। 3कांकि तम्चा पुराणा सुभाव तां मरती गेला, ते अम्ची तां जीन्दगी मसीह चे लारे नरीकारा मैं लुकली आली छै। 4मसीह अम्ची जीन्दगी छै, जिसे बेले प्रकट हुवी, ओह बेले तम्ही वी ओचे लारे महिमा लारे प्रकट करले जावा।

पुराणा जीवन ते नवां जीवन

5ऐवास्ते आपणे-आपणे अंगा नु मारती नाखा, जको धरती उपर छी, यानि गन्दे काम अपवित्र, बुरी इच्छा, गन्दी आदत, लोभ जको मूर्ति चे बराबर छै। 6यांचे ही वजह नरीकारा चा करोप आज्ञा ना मनले आले उपर पडे़। 7ते तम्ही वी, जब यां बुराईया मां जीन्दगी गुजारते, ते यांचे अनुसार चलते।

8पर हमा तम्ही वी यां सब नु, यानि क्रोध, ते रोष, बैरभाव, ते निन्दा, ते मुँहा कनु गालीया बकणीया ये सारीया बाता छोड़ती ङिया। 9#इफि 4:22हेके ङुजे नु कूड़ ना मारा, कांकि तम्ही पुराणे सुभाव नु ओचे कर्मा समेत उतारती नाखले। 10#इफि 4:24ते नवें सुभाव नु घाले जती, जको आपणे सृजनहार चे सुभाव चे अनुसार ज्ञान प्राप्त करने वास्ते नवें बणते जाये। 11मतलब हा छै कि मसीह मां हमा ना तां कुई यूनानी रेहला, ना यहूदी, ना खतना, ते ना ही खतनारहित, ना जंगली, ना असभ्य, ना दास ते ना आजादी, मसीह यां सारा मां छै, ये सारी मसीह मां छी।

12 # इफि 4:2 ऐवास्ते नरीकारा ने चुणले आला ची तरह जको पवित्र ते प्यारे छी, बङी दया, ते भलाई, ते दीनता, ते नरमाई, ते सहनशीलता धारण करा, 13#इफि 4:32ते अगर कानु काये उपर दोष लावणे ची कुई वजह हो, तां हेक ङुजे ची सेहती गिहा ते हेक ङुजे चे अपराध माफ करा, जिंवे प्रभु ने तम्चे अपराध माफ करले, यूंही ही तम्ही करा। 14यां सारा चे उपर जको प्रेम नु धारण करती गिहा जको प्रेम सारा नु एकता मां ब़ांधे। 15ते मसीह ची शान्ति जिसे वास्ते तम्ही हेक शरीर मां हकारले गेले तम्चे दिला मां राज़ करो, ते तम्ही शुक्रगुजारी बणले रिहा। 16#इफि 5:19,20मसीह चे वचन नु आपणे दिला मां गहराई लारे बसु ङिया ते सेद्ध ज्ञान समेत हेके ङुजे नु सिखावा ते चितावा, ते आपणे-आपणे मना मां अनुग्रह चे लारे नरीकारा चे वास्ते भज़न ते स्तुतिगान ते आत्मिक गीत गावा। 17वचना मां जा कामा मां जको कोच्छ वी करा सब प्रभु ईशु चे नांवा लारे करा, ते ओचे जरिये नरीकार ब़ा चा धन्यवाद करा।

नवें जीवन चे परिवारिक नियम

18 # इफि 5:22; 1 पत 3:1 हे घराआलीया, जिंवे प्रभु मां वाजिब छै, यूंही आपणे-आपणे मुणसा चे अधीन रिहा।

19 # इफि 5:25; 1 पत 3:7 हे घराआले, आपणी-आपणी घराआली लारे प्रेम राखा, ते वांचे लारे कठोरता ना करा।

20 # इफि 6:1 हे ब़ाले, सारीया बाता मां आपणे-आपणे आई-ब़ा चे आज्ञाकारी बणा। कांकि प्रभु ऐचे कनु खौश हुवे।

21 # इफि 6:4 हे ब़ाला-ब़च्‍चा आले, आपणे ब़ाला नु तंग ना करा, इसड़े ना हो कि वांचा होंसला तरुटती जाओ।

22 # इफि 6:5–8 हे सेवक, जको शरीरा चे अनुसार तम्चे मालिक छी, सारीया बाता मां वांची आज्ञा चा पालन करा, तम्ही बन्दा नु खौश करने आला चे समान ङिखाणने वास्ते ना, पर मना ची खराई ते नरीकारा चे ङरा कनु। 23ते जको कहीं तम्ही करा, तन मन लारे करा, ईं समझती कर कि बन्दा वास्ते कोनी पर प्रभु वास्ते करा वी। 24कांकि तम्हानु पता छै कि ऐ बदले मां तम्हानु प्रतिफल मां इनाम मिली, प्रभु जको मसीह छै तम्ही ओची सेवा करा वी। 25#इफि 6:9कांकि जको बुरे करी, ओनु आपणी बुराई ची सजा मिली, उठे काया वी पक्षपात कोनी।

Currently Selected:

कुलुस्सियां 3: ODR

Highlight

Copy

Compare