1 कुरिन्थियां 5
5
कलीसिया मां बुराई
1इठे तक सुणने मां आवे पले, कि तम्चे मां व्यभिचार हुवे पला, असल मां इसड़ा व्यभिचार जको नेरीया जातिया मां ना हुवी, कि हेक मर्द आपणी मतरेई आई नु राखती गिहे। 2ते तम्ही अरमान तां ना करा, जाये कनु इसड़े काम करने आला तम्चे महु काढ़ला जईया, पर घमण्ड करा। 3शरीर रूपा मां गैर मोजुदगी हुवणे उपर वी मैं तम्चे लारे आत्मा मां हुती कर ते मैं ओ बुरे काम करने आले चे खिलाप आपणा फैंसला यूं ङिती चुकला मनती गिहा मैं खौद्द ओठे मोजुद छै। 4कि जिसे बेले तम्ही, ते माये मन, अम्चे प्रभु ईशु ची सामर्थ लारे भेले हुं, 5तां इसड़े इन्सान अम्चे प्रभु ईशु मसीह चे नांवा लारे, शरीरा चे नाश वास्ते शैतान नु सोंपला जाओ, कि ओची आत्मा प्रभु चे ङिओ मां उद्धार पाओ।
6 #
गला 5:9
तम्चे घमण्ड करने ठीक कोनी। का तम्ही ना जाणा कि थोड़ा जा खमीर पुरे उसणले आले आट्टे नु खमीर करती ङिये? 7पुराणा खमीर काढ़ती कर आपणे आप नु शोद्ध करा कि नवें उसणले आले आट्टे बणती जावा जिंवे कि तम्ही अखमीरी छिवा। कांकि अम्चा वी फसह जको मसीह छै बलिदान हुला। 8ते ऐवास्ते अम्ही बुराई ते दुष्टता चे पुराणे खमीरा लारे ना, पर सिधाई ते सच्चाई ची अखमीरी रोटी लारे तेंहवारा मां खुशी मनाऊं।
9मैं आपणी चिठ्ठी मां तम्हानु लिखले कि व्यभिचार करने आला लारे संगति ना करजा। 10माया मतलब हा कोनी कि तम्ही संसारा चे व्यभिचारी, जा लोभी, जा ठग़्ग़, जा मूर्तिपूजक, ची संगति ना करा। यूं तां तम्हानु संसारा महु निकलती जाणे पड़ी। 11माये केहणे ईं छै कि तम्चे इसड़े कुई विश्वासीया लारे जको व्यभिचारी, जा लोभी, जा मूर्तिपूजक, जा गाली काढ़णे आले, जा पियक्कड़, जा ठग़्ग़ हो तां ओचे लारे संगति ना करजा, बल्कि इसड़े इन्साना लारे खाणे वी ना खाजा।
12कलीसिया चे ब़ाहर चे लौका चा न्यां करने लारे माये का काम? का तम्ही कलीसिया चे लौका चा न्यां ना करा वा? 13ब़ाहरले लौका चा न्यां नरीकार करी, ऐवास्ते पवित्रशास्त्र मां लिखले पले, “ओ कुकर्मीया नु आपणे भीतरु काढ़ती छोड़ा।”
Currently Selected:
1 कुरिन्थियां 5: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
