1 कुरिन्थियां 11

1 # 1 कुरि 4:16; फिलि 3:17 जिंवे करती मैं मसीह जिसड़ी चाल चले, तम्ही वी माये जिसड़ी चाल चला।

ठोङ ढकणे चे बारे मां आदेश

2मैं तम्ची तारीफ करे कि तम्ही सब बाता मां मनु याद राखा ते वां शिक्षा नु मजबूती लारे पालन करा, जिसड़ी मैं तम्हानु सोंपली हुती। 3मैं चाहवें कि तम्ही ये बाते नु समझती गिहा कि हर-हेक मर्दा चे ठोङ मसीह छै ते असतरी चे ठोङ मर्द छै ते मसीह चे ठोङ नरीकार छै।

4जको मर्दा चे प्राथना जा भविष्यवाणी करते बेले आपणे ठोङ ढकली राखणे आपणे मसीह चा अपमान करने छै। 5जको असतरी चे प्राथना जा भविष्यवाणी करते बेले आपणे ठोङ उघाड़े राखणे आपणे ठोङा चा अपमान करे वा रोङी हुवणे चे बराबर छै। 6अगर कुई असतरी ओढ़ण ना ओढ़ो तां वा आपणे माल वी कतरवाती गिहो। अगर माल कतरवाणे जा रोङी हुवणे लाज़ ची बात छै तां ओढ़ण ओढ़ो।

7मर्दा वास्ते ठोङ ढकणे वाजिब कोनी कांकि ओ नरीकारा चा रुप ते महिमा छै। यूं करती असतरी मर्दा ची महिमा छै। 8कांकि मर्द असतरी कनु कोनी बणला, पर असतरी मर्दा कनु बणली। 9मर्दा नु असतरी वास्ते कोनी बणाले गेले, पर असतरी नु मर्दा वास्ते बणाले गेले। 10ऐवास्ते स्वर्ग़दूता ची मोजुदगी चा ध्यान राखते हुले असतरीया वास्ते वाजिब छै कि वे आपणी अधीनता चा प्रतीक आपणे ठोङा नु ढकती कर राखो।

11तां वी प्रभु मां ना तां असतरी मर्दा कनु ते ना मर्द असतरी कनु दूर हो सग़े। 12जिंवे असतरी ची उत्पत्ति मर्दा कनु हुली। यूं करती हमा मर्दा चा जनम असतरी कनु हुवे, पर सारी सृष्टि ची उत्पत्ति नरीकारा कनु छै।

13तम्ही खौद्द विचार करा। का बिना ठोङ ढकले असतरी नु नरीकारा कनु प्राथना करने शोभा ङिये? 14का सुभाविक रीति लारे तम्ही ना जाणा, कि अगर मर्द लम्बे माल राखो तां ओचे वास्ते अपमान ची बात छै? 15पर अगर असतरी लम्बे माल राखो तां विचे वास्ते शोभा छै कांकि माल विनु ओढ़णे वास्ते ङिले गेले। 16पर अगर कुई विवाद करना चाहवे, तां ईं जाणो कि ना अम्चे तरफु ते ना नरीकारा ची कलीसिया ची इसड़ी रीत छै।

प्रभु भोज़ चे बारे मां

(मत्ती 26:26–29; मरकुस 14:22–25; लूका 22:14–20)

17पर हा आज्ञा ङिते हुले, मैं तम्ची कुई बढ़ाई कोनी करे पला ऐवास्ते कि तम्चे भेले हुवणे लारे भलाई ना हुवी पर बुराई हुवे। 18सबकनु पेहले तां ईं छै, कि जिसे बेले कलीसिया मां भेले हुवा, तां तम्चे मां फूट पड़ली रिहे। मैं कोच्छ-कोच्छ विश्‍वास वी करे। 19हां, ईं सच्‍च छै कि तम्चे बीच फूट पड़नी जरुरी वी छै, कि वे लौक जको तम्चे मां खरे निकलो प्रकट हुती जाओ। 20जिसे बेले तम्ही खाणे वास्ते भेले हुवा, ओनु प्रभु भोज़ ना केहले जा सग़ी। 21कांकि खाणे चे बेले हेके ङुजे कनु पेहले आपणे खाणे खाती गिही तब कुई भुक्‍के रेहती जाये ते कुई पीती कर मतवाले हुती जाये। 22का खाणे-पीणे वास्ते तम्चे घर कोनी? जा नरीकारा ची कलीसिया नु तोच्छ जाणा, ते जाये कनु कोनी वानु शर्मसार करा? मैं तम्हानु का किहे? का ये बाते मां मैं तम्ची तारीफ करे? ना, मैं तारीफ ना करी।

23कांकि हा बात मनु प्रभु कनु पुज़ली ते मैं तम्हानु वी पुचाती ङिली, कि प्रभु ईशु ने जिसी रात ओ पकड़वाला गेला, रोटी चली, 24ते धन्यवाद करती विनु भांली ते केहले, “हा माई देह छै, जको तम्चे वास्ते छै। माई याद मां यूंही करले करा।”

25यूं करती खाणे चे बाद मुंगर वी चला ते केहले, “हा मुंगर माये लुहींया मां नवीं वाचा छै, जिसे बेले कङी पीया, तां माई यादगिरी वास्ते ईं ही करले करा।” 26कांकि जिसे बेले कङी तम्ही हा रोटी खावा ते ऐ मुंगरा महु पीया, तां प्रभु चे आगमन तक ओची मौत चा प्रचार करा।

27ऐवास्ते जको कुई बेढंगी रीत लारे प्रभु ची रोटी खाये जा ओचे मुंगरा महु पीयो ऊं प्रभु चे शरीर ते लुहींया चा दोषी बणी। 28ऐवास्ते इन्सान आपणे आप नु परखती गिहो तां बल्ति ये रोटी महु खाओ ते ऐ मुंगरा महु पीयो। 29कांकि जको ऐनू खाते-पीते बेले प्रभु चे शरीरा नु पिछाणले बिना खाये ते पीयें आपणे ही उपर ङण्ड वास्ते खाये-पीये। 30हाओ वजह छै कि तम्चे महु ब़ोहत सारे कमजोर ते बिमार छी ते ब़ोहत सारे मौत ची नीङे मां सदा-मदा वास्ते नूहती रेहले। 31पर अगर अम्ही आपणे आप नु परखती गिहुवां तां ङण्ड ना मिलीहा। 32पर प्रभु ङण्ड ङिती कर अम्हानु सुधारे ऐवास्ते कि अम्ही संसारा लारे दोषी ना ठहराले जऊं।

33ऐवास्ते, हे माई ब़ेहण भऊ, जिसे बेले तम्ही प्रभु भोज़ वास्ते भेले हुवा तां सारा नु मिड़ले चे बाद खाले करा। 34अगर कुई भुक्‍के हो तां आपणे घरे खाती गिहो कि तम्चे भेले हुवणे ङण्ड ची वजह ना बणो। ते बाकि बाता नु मैं आती कर ठीक करती ङी।

Currently Selected:

1 कुरिन्थियां 11: ODR

Highlight

Copy

Compare