Gétsutsuéô 2
2
Ndongi gôndé asi mbumu éaNzambé gô Ephèse
1Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Ephèse.
One asumbéda minanga tsambué g’ôgogo edi ômôgôô te angô aseta va gatse evumbéô tsambué éadambi émakônzu na dodo. Oôkéôni éne évovo angô. 2Angô mbe: Me tsabômu metso mane mameendanye. Tsabômu dôta gamatsogo anye na ngudi gôéyanza na môvinéné ôndé n’anye. Na gô pie, nôsasinga ane abévani aba va gatse anyô. Nômakanéga ane avovo mbe: Me te namatômu na Christ, géé na gô pie, géé kaka na gô pie anye nômeena. Vane nômamenya mbe te asi diboe. 3Anye nôndé n’obibô gôéenea mane mangavigani. Gô mabégô mami nômeena maguga na nômasipa. 4Ivô béyé nane nôndé na ébégô ébévani ésasinga me. Anye nôsanyôngéô medô gamabakanye v’ebandô. 5Tambô bangôani gamanyôngéô anye me v’ebandô. Viiani ngima mabégô manyô mabévani. Nikani na gôndé me gamabaka wa n’anyô v’ebandô. Okô mbe nôsakoga gôétsika mabégô manyô mebévani, me nangaviga gôénôwata gévumbéô sanyô sadambi géndé n’anyô. 6Eébéyée mbe nane, éne ényôngéô me gôndé anye te mbe mane mayanza géômbé sAnicolaîte nôkina mangô ti kinaga, mônongovo gakina me mangô.
7Okô mbe anye nôndé na matô, ôôkôni môma na môma mane mavovo Gédidi SaNzambé n’anye asi mbumu éaNzambé.
Angô mbe: Gôndé ane adiiani gô ébadi égenyuni, me nangeetsa ahngô ôtômu gôéaa miônda miagéétété géétsa monyo géndéké gô gatse atsaga éaNzambé.
Ndongi gôndé asi mbumu éaNzambé gô Smyrne
8Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Smyrne.
One andé v’ebandô ametso te angô andé v’ekôdéô ametso. Na ône amawani te angô amakundugani, andé na monyo ôsakôdéakani anôétsa ndongi yedi. Oôkéôni angô. 9Angô mbe: me tsabômu magugame meenanye. Tsabômu n’osugee ôndé n’anye tambô, nôndé n’okiti. Me tsabômu mane matsuavô anye n’ane eenda mbe: Me te Môjuif. Tambô angô kaka Môjuif. Ahndé aneegedi aSatan. 10Nômbieena gomo gô mane mangeenanye mapanda. Oôkôni édué. Avo va gatse anyô nôngeengédu gô eba atsôgôô gébé n’ebégô. Menyani mbe te yabédé akanéga anye. Gône nôngeena panda gô nzima apitsi. Sindédani na mavôma buéyé mbe na g’ôwa. Na me nanganôétsa môsenda te gépôkôdô sokumaka amonyo ôsakôdéakani.
11Okô mbe anye nôndé na matô, ôôkôni môma na môma mane mavovo Gédidi SaNzambé na anye, asi mbumu éaNzambé.
Angô mbe: Ane adiiani gô ébadi égenyuni asangawa ôwa amôbaé.
Ndongi gôndé asi mbumu éaNzambé gô Pergame
12Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékénéa asi mbumu éedi gô mbôka ééndô mbe Pergame.
Oôkéôni ndongi divovo ône andé n’ebaga amengô. 13Angô mbe: Me tsabômu gôdigaanye. Nôdigaa ti pidi gô mbôka éamuene Satan. Anye nôndéké môvo n’ami. Gô vitoone éndé anye n’ami nôsiagané n’ami buéyé gô ndéône édangi émayôhu môékédine wami eendô mbe Antipas. Amayôhu te gô mbôkane édigaa Satan. 14Béyé mbe nane, nôndé n’ebégô ésanyôngéô me. Va gatse anyô gôndéké avo anyôngéô meekédume maBalaam. Angô Balaam ameekéda dôta Balak gôéengéda asi Israël gô monongoe wedi ôbévani mbe ayeeséda ahngô éambô émadeekedu gô mbumba na gôéyanza gésaahgô. 15Na vane va gatse anyô gôndéké n’avo andé n’evamba na mane mayanza géômbé sAnicolaïte. 16Viiani ngima mabégô manyô mabévani. Nikani na gôndé me. Ti anye nôkina ndongi yami nôngeena gangaviga me na va gatse anyô gôégenya n’omee ane n’ebaga ékusa gô mônyee wami.
17Okô mbe anye nôndé na matô ôôkôni môma na môma mane mavovo Gédidi SaNzambé na anye asi mbumu éaNzambé.
Angô mbe: Gôndé ane adiiani gô ébadi égenyuni nangeetsa ahngô môyakô ôviga g’ôba ôsamenya muetso. Nangeetsa ahngô dôta étaé éavembo ématendu ina éatsatsee ésamenya muene môma buétsé te kumue éangô.
Ndongi gôndé asi mbumu éaNzambé gô Thyatire
18Ogi ômatôma me Jean mbe: Tendéa ndongi yedi na gôndé môsi g’ôba avigédu na Nzambé gôékenea asi mbumu éedi gô mbôkane ééndô mbe Thyatire.
Oôkôni ndongi divovo Jésus Muana ANzambé, ône andé na miso moobébayi ga soto. Na makôdô medi mandé na ngeengeyi ga kunga émakônzuni. 19Angô mbe: Me tsabômu metso meendanye. Tsabômu vitoone éndé n’anyô. Tsabômu na gasipanye na mavôma na gényônga géôkô anye gôéyanzéa me n’obibô ôndéké n’anyô. Metso mane tsabômu mangô. Mane meendanye mamisôba ndéô yedi mootéa éyeka na mane mav’ebandô. 20Béyé mbe nane, nôndé n’ebégô ésanyôngéô me. Ebégôe te édué. Anye nôsinga gôédigaa na môgeto nône eendô mbe Jézabel, va gatse anyô. Angô apata mbe: Me namatômu na Nzambé gôéékéda. Angô abôméda ayanzi ami nzéane te gô gésasô na gô éambô ékusa gô ésôga. 21Me namamôtsika ndéô éakuanakue mbe aviia ngima mabégô medi mabévani. Ivô angô asangoongôa étsika gésaahgôge sedi. 22T’ebandô nangamôyaméda v’ekoko éamaguga abisa na pievia. Na gôndé ane ahmakea n’edi gésasô ahngaba te mônongovo. Ahngabisa na pievia muetso. Buétsé te akoga, atsika mane mabévani mameendahngô n’edi. 23Va ngongone vane nangayôha anedi. Na vane asi mbumu éaNzambé muetso ahngamenya mbe me navovoni ôdôô, te ône asabômu metso matasa môma na mane manyima môtémedi. Nangeetsanye môma na môma kuanakue n’ene émeendanye, môbévine angabévédu na mônyepine anganyepedu.
24Géé gôndé anye avo asi mbumu éaNzambé gô Thyatire, nôsigésangané gô meekédume mane mabévani. Na anye dôta nôsisingé gôétubédu mane meenda oma mbe: Evétô éviga gôndé Satan. Gôndé anye, me tsanôkôndéga mabégô mayekani, kabaga nôdagéô na mangô ga égumba étsuaôni. 25Ivô simbédani mane mandéké n’anyô ngu na vangaviga me. 26-28Gôndé anye nôdiia gô ébadie égenyuni, n’anye nôénda mane manyôngéô me géniké ngima ngu na vangaviga me, nanganôétsa ényanga. Te éne émeetsô me na Téta Nzambé. Nanganôétsa ényanga gôétôma tsengeye yetso. Nôngaditôma na môtunga amuahnga ôsaba na ngeba. Tsengeye dine dingapanzéga gabuéga mbéka éebôô pingô yatsesee. Nanganôétsa na mônanga ôtanani ava maageô.
29Okô mbe anye nôndé na matô, ôôkôni môma na môma mane mavovo Gédidi SaNzambé na anye asi mbumu éaNzambé.
Currently Selected:
Gétsutsuéô 2: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
