Philippiens 3

Gôndéké mônongo gôéenanô na Nzambé ti eembe nôsaba n’oési

1Deo noo ana aTétee n’ami, tsôkéakani gô éne émayanzéa Kumu Jésus anye. Me tseena panda na tsagogo énôomba ébeenda éne émamana me étenda kuka éamapanga. Gôndé anye ényepa gôéomba ébeendu. 2Aaganani n’eendi amabégô mabévani agono na inzua. Wemani omee ane abuta ébeta ôtô betaga. Tsangoongôa éénda mbe, geetaga. 3Gégeetéôge saô kaka géne sapie. Géne sapie te géne sasô n’anyô tôseetsa mitémamie gô ésôgee na gô ésimee éotô. Tôtsôkéa te Jésus‐Christ na tôyanzéa Nzambé gô ngudi yaGédidi sedi. 4Okô mbe môma oongôa édiia monyo gô ngudi yesôga, tambô me nootéa éba na monyo n’ahngô asaba na aangô. Nôéni gangoongôa me eetsa môtéma gô ésôgee éAjuif éne. 5Namageetu te naka pitsi génana. Namabôtu gô éongo éaIsraël. Ebôta éami te Benjamin. Ogie apie agébé gémbéta ômabôtu me te Hébreu. Gôékenea mige na mitôma miAjuif nameengéa gô géômbé sApharisien. 6Namabaka na géviôviô gévôni gô mabégô maNzambé gésingé mangô mabévédu. T’ebandô namakuana asi mbumu éaNzambé. Gôsibé muene gandé me gôédiia monyo gô gékeneo sandongi na mitôma na mige mia Nzambé. 7Ivô metso mane mamayanza me gôédiia monyo, me deo noo namaviia ngima mbe masaba tsoongo. Te gômani me éena mbe Jésus‐Christ to monyoe wami na tsoongone éami. 8Kaka mayanza matévo maka gébé na tsoongo gôndé me, te na metso mamisôba moongôa môma ékôndéga gôndé me. Naviia metso mane ngima gô éne émadenga me éôtéa ényepa na metso mane. Namadenga Kumu ami. Nabuta émenya angô, Jésus‐Christ. Gôndé angô namaviia mane mami metso ngima. Nabono mangô ti eembe te tôbi, buta mbe nadiia mane maChrist metso. 9Nanyôngéô éba môvo n’edi. Tsoongôa éénda mbe gôkenea me mige mia Nzambé me tsaba n’oési va mbene éedi. Tsabômu mbe neenanô na Nzambé ti eembe tsaba n’oési, te gômeetsa me Christ môtémami wetso gémôtsumé paga. Amuene Nzambé amakônza nzéane mbe ôkô môma eetsi Jésus‐Christ môtémedi wetso gémôtsumé paga, me Nzambé nangamôbono ti eembe asaba n’oési. 10Me Paul tsabuta mabégô mayekani. Ena ébuta me, te gôémenya mabégô maChrist metso, na gôémenya ngudi yedi, dine dimakundua angô g’ôwa. Nanyôngéô égésangana gô magugame medi. Nanyôngéô égono n’edi g’ôwee wedi. 11Vane naténdéda mbe nangakunduu dôta g’ôwa gamakunduu angô.

Nakea pita gôébuéa v’ekôdéô

12Me tsaba n’etasa mbe ne namani édiia éne émagényôga me pitsi yetso gôédiia. Me tsaba n’etasa mbe me namani ébôngama. Ivô neenda gandé ane akea pita gô tsaé gôédiia éne éamôsôba éndé gô ékôdéô. Nagémbôga gôéwesea na gôétsôpa éne éamôsôba, mônongovo gamatsôpu me dôta na Jésus‐Christ. 13Ana aTétee n’ami agô mbumu éaNzambé, tsiinda mbe namani édiia. Ivô ébégô évo ésevoi me gôéénda, te mbe naviia mane mava mbeego ngima. Nagényôga gôédiia te mane magô mbene anzéa. 14Te gakea me pita gôébuéa v’ekôdéô buta mbe nadiia g’ôba éne éamôsôba émakônzéô me na Nzambé ône amabambéa me gô ngudi yaJésus‐Christ.

15Wa n’anyô tômadinga gô mabégô mema na tôsaba ana avembo gô mbumu éaNzambé, buedi mbe tôbaké muetso n’etasee gôédiia éne éndé v’ekôdéô. Buéyé gandé avo va gatse anyô na mene matasa, amuene Nzambé anganôtévéda éne éapie. 16Buéyé mbe nane, ôkani tôweséni gô nzéane étôkéani édué.

17Ana aTéta, indani tsingayi geenda me. Namani énôtubéda. Tambô anye dôta émbégéani ane akea gô nzéane émanôtubéda me. 18Namanôbeenda kuka diyekani. Nanôomba énôbeenda yangô nadéa mbe: Gôndéké ayekani andé avingi agésumuge gémawa Christ. 19Ekôdéô éaô te gébunganéô. Saô gémba te aakagane. Anyemôga gôékuméda mabégô mayanzangô matsoyi. Matasa maô metso te gô mane matsengene. 20Géé wa n’anyô tôsaba asi tsenge nedué. Tsengene éasô n’anyô te g’ôba gôtôbono na nzôô gôéena Mooboyi asô n’anyô Kumu Jésus‐Christ aviga. 21Angakoa yôtô yasô n’anyô yava tsina disaba na tsoongo mbe digono na ône wedi ondômba ôndé na tsoongo. Angadikoa gô ényangee éndé n’edi. Enyangee éne te éne émasugédangô éôma yetso na gô tsina amatambé medi.

Currently Selected:

Philippiens 3: TSV

Highlight

Copy