II Timothée 1
1
Mikudéga na kômbô
1Oô te me Paul namatômu na Jésus‐Christ gamanyôngéô Nzambé. Namasevou gôénigôa gamavangana Nzambé na wa n’anyô monyoe ôtôdiia vatôvamba évambevo na Jésus‐Christ.
2Nagôtendéa, Timothée éwe muanami amôtéma agô mbumu éaNzambé. Nanyôngéô mbe Tétasô n’oo Nzambé, na Kumu asô n’oo Jésus‐Christ agôétsa mate na agôsingéa kokoo na agôétsa gétabé sedi.
Paul akuméda Nzambé na oongô Timothée ndongi
3Nakuméda Nzambé gôseetsô me ôési na muangee amôtémami ôtsundéda me, vayanzéa me Nzambé gamayanzéaka peeye yami. Namôkuméda gô ndéôye dindé me gôévovo na Nzambé gôndé éwe na pitsi n’omanda gédundé. 4Me tseeba kebaye dimadéa éwe. Nandé ti na tsôvé gôégôena buta mbe môtémami éyôa na gényônga. 5Natanganéda gameetsewe Nzambé môtémee woo wetso gémôtsumé paga. Mônongovo gamadeekeda yoo Eunice na yeene ayoo Loïs, mitéma miaô na mbeego. Tsabômu mbe anye n’ahngô, mabégô maNzambé mandéké gô mitéma mianyô te mônongovo. 6T’ebandô nagôbangôéda mbe, môgôô ômeetsô éwe na Nzambé vamatsakéga me éwe mogome, kidéa angô gakidéô soto mbe kabaga géema. 7Menya mbe Gédidi gémeetsa Nzambé wa n’anyô gétôkoa gôéba gébé na gomo. Gédidi sedi gétôétsa ngudi yedi na étondo éedi, na ékena éedi.
8Nigôa na bôkédé ômbanza aKumu Jésus, gébé na tsoyi. Ombieena tsoyi, tsangô mbe me Paul nandé gô tsôgôô gô inedi. Ene éôtéa ényepani te mbe n’ewe muetso ôsinga magugame matubédu éwe gô Tsangô Eamôsôba éaJésus‐Christ. Amuene Nzambé angagôétsa ngudi gôésipa. 9One amooboo we na amabambéa we gôékoga omedi amatsimamani te Amuene Nzambé. Asatôoboo gô ngudi yamayanza masô n’anyô mamisôba. Atôoboo te gamatasa amuene mbe: Neendé te nane. Amatôoboo te ti gô ngeba yedi. V’ebandô na kaa, amatôena ngeba gô ina aJésus‐Christ. 10Ivô ngebaye yedi dine amatôtsutsuéda yangô te pitsi yedi gômaviga Mooboyi asô n’anyô Jésus‐Christ na gôndé wa n’anyô. Menya mbe Jésus‐Christ amatseda ôtômue owa. Na, gô ngudi yaTsangô éedi Eamôsôba Jésus amatsigéda na v’ekanga ébégô éamonyo ôsakôdéakani.
11Nzambé amasevoa me gôénigôa Tsangô nene Eamôsôba gôndé ane asavamba na Nzambé. Ameetsa me ényangee éamôékédi, na éamôma atômuku na Jésus. 12Maguga matubédu me, te gô éne. Buéyé nane, me tsatsuma paga ta na pesu. Me tsabômu ône ameetsa me môtémami. Namenya na gô pie mbe angô andé na ngudi yekenea éyanzee na ényangee émadeekedangô me, ngu na nyoo ôvôni. 13Ewe Timothée, bangôa mavovia mami mapie mbe te mônongoe ôngadeka éwe gôéékéda. Sipa na bôkédé gô nzéa éaJésus étôkeani édué na gô étondo éedi étôdiia gô vitoone éndé wa n’anyô na Jésus‐Christ. 14Kenea meekédume mamisôba mamadeekedu éwe. Okenea mangô te go ngudi yaGédidi SaNzambé géndéké gô mitéma miasô n’oo.
15Omuene ôsabômu gamatsikô me n’asi mbumu éaNzambé adigaa gô Asie. Amatsika me gameenda akaô abaé Phygèle na Hermôgène. 16Naduka Kumu Nzambé mbe eetsa mate medi gôndé géômbé saOnésiphore gôébégô akasôgéda me kuka yetso. Buéyé gandé me gô eba atsôgôô, asiôkô tsoyi gôévamba na me. 17Oeni gameendangô. Vamatsigangô gô Rome, amabuta me na môvinéné ngu na vamatsutsuangô ebee atsôgôô ôdigaa me. 18Nanyôngéô mbe Kumu Jésus amôsingéa gôédiia ôkitie aKumu ôngakabô gô nyoo ône ôvôni. Ewe Timothée, ôsabômu metso mamisôba mameendéangô me gô Ephèse.
Currently Selected:
II Timothée 1: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
