II Thessaloniciens 3
3
Vovoni na Nzambé gôndé we
1Ana aTétee n’ami asi mbumu éaNzambé, vovoni na Nzambé gôndé we gômbe mabégô metso maKumu Jésus mangoomba étsanzabana gésikamé. Na mbe mangaditédu n’akanyô gamapanganye émaditéda v’ebandô. 2Vovoni na Nzambé mbe ayuua we gô mogo moma abévani oopisa. Gôébégô kaka muetso eetsa Nzambé mitéma miaô gémôtsumé paga.
3Kumu Jésus andé na mavôma na asakoga. Anganôodeda na anganôebakanédéa Môbévine. 4Kumu Jésus atôsuméda mitéma gôndé anye mbe nôndé gôégobeda ndongi yasô na mbe nôngoomba édigobeda.
5Tônyôngéô mbe Kumu Jésus aweseda mitéma mianyô gôévamba na vitoo na Nzambé. Na mbe ayuéséda mitéma mianyô n’obibô ôviga gôndé amuene Christ.
Buedi mbe môma ayanzé
6Ana aTétee n’ami asi mbumu éaNzambé, gô ina aKumu Jésus‐Christ tônôbeenda mbe: Nômbiavamba n’asi mbumu éaNzambé andé na gésima sadakadaka na asagobeda meekédume mamatôékéda angô. 7Anyene nôsabômu mbe éndé ti éamôsôba gôédeka mônongoe wami. Vamadigaa we va gatse anyô tôsibaké na gésima sadakadaka. 8We tôsibone miso masô gôndé môma mbe abôngôa we géenza, ivô tômagogo n’eyanza gôédiia éne édôngéda ôtô. Tômayanza na pitsi n’omanda buta mbe tôsaba ga égumba éngadagéô anye. 9Tômeenda nane, kaka mbe we eekédi tôsoongôa ékeneo n’omee wasô, ivô tômeenda te gôénôtubéda mônongovo gadigaa ône eetsa Jésus môtémee. 10Bangôani gamavovo we n’anye mbe: One asanyôngéô éyanzani te ône asanyôngéô éaani.
11We tôvovo n’anye nane gômookô we mbe avo va gatse anyô adigaa na dakadaka gébandé éyanza. Ene ésabômu ahngô te gôéyungéda mane makaô. 12Gôndé ahngô tôvovo ébégô édué. Gô ina aKumu Jésus‐Christ, tônôongô ndongi mbe: Yanzakani pitsi yetso gôédiia mane madôngéda ôtô.
13Géé gôndé anye ana aTéta asi mbumu éaNzambé, nômbiagogo nôndé gôéénda mane manyô mamisôba. 14Okô môvo asagobeda ndongi yagésangô gegé, tendani inee éedi. Kinani évamba n’edi buta mbe eena tsoyi. 15Ombieenda angô mbe môdudeo. Ivô ivédani angô te ivéda, gôndé angô muana aTétee môsi mbumu éaNzambé.
Mate na kômbô
16Te mbe Kumu Jésus amuene môétsi agétabé anôsuméda mitéma gô ndéô yetso na gô minongo mietso. Te mbe abaké gôndé anye muetso.
17Mabégô mema natenda na misavi miami mbe: Oô te me Paul. Nôeni gakôdéda me ésangô éami éetso. Nôeni ôtendédie wami.
18Te mbe mate maKumu asô n’anyô Jésus‐Christ mabaké gôndé anye muetso.
Currently Selected:
II Thessaloniciens 3: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
