II Pierre 2
2
Eekédi abévani adiboe
(Bono na Jude 4–13)
1Va mbeego va gatse ambumu éaNzambé vamabaka eekédi adiboe. Te mônongovo va gatse anyô vangaba eekédi adiboe. Ahngô ahtsongonéda meekédume mooboe gôébunza mane mapie. N’ahngô ahkina Môékédi môvôni ône amooboo ahngô. Eekédi adiboe ahngakudungana anguene gôébungana tsina na tsina. 2Oma ayekani ahngadeka n’ahngô ésima ébévani. Na gô éne éngeendahngô oma ahngadeta nzéa éamabégô mapie. 3G’ônzôô waô adiiaga ahngavooto anye na meekédu maô mooboe mavakangô, buta mbe ahngô ahtsôbôga vakambi ahngô. Môtsundédi aô andé va magô bandôa va mbeego. Môbunganédi aô andé ti gôévéngéa ahngô.
4Aanakani geenda Nzambé. Buéyé asi g’ôba, ayanzi aNzambé vameendahngô ébégô ébévani Nzambé asiene ahngô ngeba. Ivô amadigunya midikidiki gô mbenge yevitsi gôkeneo angô ngu na nyaa amôtsundu. 5Buéyé ane ahmapanga na tsinane Nzambé asiene ahngô ngeba. Nzambé amavigéda géningô gémootéaka éningôe éetso gôébunga tsengene émayôaka n’ebéva. Nzambé amooboo oma génana, te gévia saNoé môékédine amabégô maNzambé. 6Na buéyé misenge mibaé mivôni, Sodome na Gomorrhe, amamieséda amamiyôéda na soto. Te gémbégéa sene éngabuéa gôndé muetso abévani. 7Nzambé amooboo Lot, môma amamôgobedani. Amabaka na môtéma ôditani gô môdigédi akedi ahsigogeke éyanza mabégô matsoyi gô ndéô nene. 8Lot, môma etsimama amadigaaka va gatse aô. Môtémedi ômabôngamani ôsisuméké te gô metso mameenakangô na mamookôkô angô gô mayanza maô makéé. 9Kumu asabômu éoboo omedi gô éne ékanégu ahngô. Kumu asabômu ékenea oma abévani ngu na gô nyaa amôtsundu. 10Kekee ti gandé ane anyima tsôvé dibévani yotô na ahkeenga ényangee éaNzambé.
Eekédi adiboe ahndé n’obagaa na nyemo. Ahsookô gomo gôédeta asi g’ôba. 11Asi g’ôba ayanzi aNzambé andé na ngudi n’ongaa, na ootéa n’enyanga eekédie adiboe. Béyé nane asi g’ôba ane, asaba gandé eekédie adiboe abuanya ane abévani andé va mbene aKumu. 12Ivô eekédi adiboe ahgono na nyama yagô pindi diinda minongo miaô mimeekaganô n’ahngô. Nyamaye dine dimabôtu te gôétsôpu na gôéyôhu. Eekédi adiboe ahbuanya mabégôme masookô ahngô. Ahngô angabunganédu ga nyama yagô pindi. 13Maguga matubédahngô akaô, anguene ahngavéndu mangô. Eekédi adiboe eena gényônga gôédeekeda yôtô yaô gô tsôvé yetso dibévani n’omanda ôvénza. Te ebégô évôni éatsoyi vadenganô ahngô gô suetiye yanyô. Gô buembe waô ahtsôkéa. 14Ngéngé yaô dindé mitie gôékea gésasô. Ahndé na vinavina gôéénda mabégô mabévani. Eekédi adiboe akubéda ane asoongôa ésipani. Mitéma miekédi adiboe mimeekaganô n’onzôô adiiaga. Ahngô ahndé gô tsina odoku aNzambé. 15Amanôtôga gô nzéa éetsimama. Ahmaanda nzéane émakea Balaam, muana aBosor, ône amanyôngéô ôkiti ôngadiiangô gô mayanza medi mabévani. 16Ivô amasugégu gômatsumangô ndongi yaNzambé paga. Nyama ésavovokoni étetu mbe ânesse, émavovo ga môma gôédékéda Balaam matasa medi masinyôngéô Nzambé.
17Eekédi adiboe ahndé ga mbéyi disaba na meba. Ahndé ga dibôngé ditsuaô n’opunga. Nzambé amakônzéa ahngô tungu éevitsi éabangata. 18Ahvaka mitangôtangô mianyemo. Ahngô ahbuta ékubéda oma ahkogi n’atsatsee, dipo pagô yeesima ébévani. Ahbuta éakubéda gô manyima mabévani mamôtéma gamabôtu angô. 19Eekédi adiboe ahbeenda oma mbe: Nônganzeegedu. Tambô, anguene andé g’ôvéga esima ébévani éebunganani. Gôébégô môma na môma andé môvéga ene étôma g’ôtô edi. 20Te vane ôkô oma ahmani éaagana na mabégô mabévani matsengene gôvambangô na Kumu na Mooboyi asô n’anyô Jésus‐Christ, na ahngô anikéa éadeekeda anguene gô mabégô mabévani na yôtô yaô divoo pepe. Ebévee éaô éamôbaé éôtéa ébévee éamapanga. 21Mbe ahsimenyeke nzéane éetsimama mbe teamôsôba. Géé ti vamamenyahngô yangô na mitômamie na migemie mietsimama mimakitséô ahngô, na gôéoma émitsika te édagani. 22Ene éndé gôndé ahngô, te éne égunyu gô tsava mbe: Ene éogi inzua anika éaa éangô. Na, ngudu éôvôuni émanika gôépatsaméa gô gétékétéké.
Currently Selected:
II Pierre 2: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
