Hakafilipi 3
3
Ghuhunga ghoghushemwa
1Karo, mwayendhange, mu shamberere mwaFumu! Pakumutjangera yinu yofotji. Kukwange ne mbadiko ghukukutu. Ene kukwenu yina kumupa ghushemwa.
2Mu koneke ku mbwa dho,
mu koneke kwawanu hokutenda ghuyi,
mu koneke kumaken̂eno ghombango!
3Atwe twa kara nomaken̂eno ghoshemwa, atwe twa karera Nyambi paMupepo wendi, atwe twa fumanena paKristus Jesusi no mbadi twa kurupera kuyinu yokumona nomeho. 4Ene ngambi kemo, ame na kurupera yinu yokumona nomeho. Ngeshi ghumweya ha ghayara eshi, aye ne gha kurupera yinu yothishwaghameho, ame ne na mu piterera. 5Ame ne ha ni ken̂ine mudiyuwa dyoghukwoko noghuhatu, mudiko dyaIsragheli, mudina dyaBenyamini. Gho ha ni shamurukera murudhi rwaWaheburayi. Mu muragho na karire me no Mufarasayi. 6Ame na toghoropire mukukutha‐kutha ngirishe. Ene mukukutha muragho mughuhunga, mbadiko thi na tendire thothiyi.
7Ene yi yakarire kukwange mudyo thikuma, na yi monine yira yinu vene pamurandu waKristusi. 8Kemo yashemwa. Keho yimweya po karo ne yino: Yoyiheya, kumona na kuyimona yira yapira mudyo. Yoyishi mukudimuka Kristus Jesusi ghoHekudyange, ya piterera yinu yoyiheya. Pamurandu wendi po na thigherera yoyihe. Na yimono eshi yapira mudyo eshi, ni kone kutorora Kristusi ghoshemwa pithendi, 9no ni kone kukara pofotji nendi. Mughuhunga ene mbadi mughuhungami wange ene mukukoneka muragho. Karo mughuhungami ghomatawero mwaKristusi. Oghu ne ghoghuhungami ghu gha tapa Nyambi pamatawero. 10Ethi na kurura me, ni dimuke Kristusi mungcamu dhomuvumbukero wendi no ni yerane kukunyanda kwendi, pakukupitura pofotji kukufa kwendi. 11No makurupero eshi, name mbo na vumbuka mwawafu.
Naro dhokuthitambo
12Mbadi na kuningashi, na yiwana endi na yiyaritha, ene na kuyikutha‐kutha. Yoyi name napwa kukwata kwaKristusi. 13Mwayendhange, ame mbadi na kughayara eshi na yi wana kare nothinda. Ene thinu thofotji thi na tenda me ne thino: Eshi ame na thigha yokare‐kare, ho na kushana yokughutho. 14Ame na tjira ni tambe kuthitambo thokughutho eshi, mbo ni kawane ndjambi dhomudiwiru, edhi gha nithera Nyambi mwaKristusi.
15Hopapetu wa ha kura mumudhimu, ha kone kukara noyighayara yi. No ngeshi ha mu ghayara mwe yinu yimweya mwamonamo Nyambi mbo ghana mupa karo mapathwerero ghomahunga. 16Thothikuru po ne tu kuthe mundhira edhi twa yenda kate pano pashadyarero.
17Mwayendhange, mu kuthe thitamenedhi thange no mu koneke kwawanu wa hana kupara pathitamenedhi ethi twa mupa. 18Yoyishi, rwingi ngani mu tongweranga no kate kuyitokota yange, na kona karo kuyihukuruka eshi: Hengi wa hana kupara yira hakan̂ore dhothikurushe thaKristusi. 19Ghuhunga wawo ne mahanyaghukero. Dira ne yonyambi wawo, honyi ne manyamweno ghawo. Awo ne yinu yopamuve ha ghayara keho. 20Ene twandambo homudiwiru, omu twa taterera karo Fumu Jesus Kristusi ghoMukomononi wetu. 21Pangcamu dhendi edhi gha kutapire thinda muyoyihe. Aye mbo ghana thitununa yirama yokwora yikare yirama yokurwedhima.
Currently Selected:
Hakafilipi 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
