Yitenda ya Wapostoli 26
26
Paghulusi ghana kukughamwena kwaAgripa
1Agripa gha ningire kwaPaghulusi eshi: “Wa kona keho kupaka po n̂ando dhoye.”
No thineghedthitho thodyoko dyendi, ko kutanga Paghulusi kukughamwena eshi: 2“Fumu Agripa, dyarero na fumaneka fiyaghudhi dhange thiwana. Pakukona kukughamwena nothinda kuyoyihe eyi ha ni rundera Hajuda. 3Thikuma ne yoyishi, owe ne wa dimuka yoyikara yaWajuda no yoman̂anani ghawo. Yo na kukukumbera eshi, ghu ni tegherere noghudhughutjima.
4“Hajuda wahe ha dimuka yomashimurukero ghange, kutunda kuwanuke wange. Kutunda pakutanga, na tungire mukatji kodiko dyange muJerusalema. 5Ha ni dimuka kare‐kare no kukona kuni nongonona ngeshi ku hana himi. Eshi mumoyo wange ghoghuhe na karire name ghumweya ghopaWafarasayi. Mbongo dhodhinyete thikuma muyikarera yetu yokwaNyambi. 6Pan̂anyi‐n̂anyi, nemana me mundhango. Yoyishi makurupero ghange, na gha tanaritha, mumaturekero agha gha tendire Nyambi nawakerekandongo wetu. 7Mako ghetu dikumi nomawadi, ha karera Nyambi no ha taterera mutenya noghuthiku, yoyi ha karire nomakurupero shemwa eshi, mbo ghana tendi eyi gha turekire. Kumakurupero ghano, owe Fumu po hana ni runderera Hajuda. 8Yinye yina kukarera ghukukutu kukwenu mwe kutawa eshi, Nyambi ne kutumuna hafu?
9“Ame nothinda na ghayarire eshi muyitwama yange yoyihe ni tendere kuDina dyaJesusi ghoMukanasareti. 10Eyi ne na yi tendire karo oku nidi muJerusalema. Nomangcamu ghawapristeri hohakuru, na pakire hatawi hohengi mumatorongo. Karo ngeshi ha wa pangwera kukufa, name na tawire ko. 11Rwingi na wa humbithire mumasinagoge ghomahe, mu kuwathineneka ha shwene matawero ghawo. Na wa dhimbire thikuma no na wa kuthakuthire nothinda, mumambara ghamweya.
Paghulusi ghana kuthimwetwedha yomapirukero ghendi
(Yitenda 9:1–19; 22:6–16)
12“Apa na fungurukire muruyendo rokuDamaskusi, nongcamu dhodhikuru mumarawero ghawapristeri hohakuru, 13gho na monine we murena, mutenyamwiru thishe thomudiwiru pepi nondhira. Tha kenaghanine yira diyuwa, no tha sheghenyenine papange nawanatanyi dhange. 14Gho twa wire twaheya pamuve. Ame gho na yuvire diywi muThiheburayi dina kunitongwera eshi: ‘Saghulusi, Saghulusi, nye ghuna kunikutha‐kuthera? Ghothinda ghuna kukutjitjupitha vene pakukudjengura.’ 15‘Yowe dye ne Fumu?’ dyo nepurire. Fumu gha ningire eshi: ‘Yame Jesusi. Oyu ne yame yu ghuna kukutha‐kutha. 16Ene wimane, no ghororoke thiwana. Yame na kuhokokera, ni kupake ghomukareri wange. No wa kukare kanonga ko yi ghuna mono kukwange, no yi mbo ni kumonitha. 17Mbo na kukungu kudiko dyaIsragheli no kumarudhi ghawahayidena oku mbo ni kutuma. 18Mbo ka yandhurure meho ghawo eshi mbo ha kone kutunda mumakokore ha kume kuthishe. Nawa ha kara mungcamu dhashatani, mbo ha piruke kwaNyambi. Pakutawa mumwange, mbo hana pu kuthigherera maharwero ghawo, no mbo hana yerana kwawakadiko dyaNyambi.’
Ghunongononi waPaghulusi kwaWajuda nokwawahayidena
19“Kutunda po, owe fumu Agripa, mbadi na karire karo ghuthururu kurupara ru rwa shurukire mudiwiru. 20Ndani ho na tangire kuyaghura kwawanu homuDamaskusi, no muJerusalema nomuJudeya yomuhe munyima kwawahayidena eshi, ha neghedhe yitenda yawo eyi ya roghera kumapirukero. 21Payinu yi po ha ni kwaterire Hajuda mutembeli eshi ha ni paghe. 22Ene yoyishi Nyambi gha ni ghamwena kate nodyarero. Yo nemanena pano yira nomushupi wendi, kughutho wamwanuke namukuru. Ame na kuyuvitha vene eyi ha ghambire haporofeta, naMosesi eshi: 23Kristusi mbo ghana nyanda, no yo mbo gha tanga kuvumbuka mwawafu. Payinu yino po mbo gha reta thishe kwaWajuda nokwawahayidena.”
Mahuthero gha waFestusi naAgripa
24Shime nga karera kengeyo Paghulusi mu kukughamwena thinda, ko kwanduka Festusi eshi: “Ghuna ghundumuka, Paghulusi! Ghodigho maghano ghoye ghomakuru, gho ghana kughundumukitha!”
25Ene Paghulusi gha huthire eshi: “Mbadi na ghundumuka me, Mukadikuto. Eyi na kughamba ne yaghushemwa, ho nidi pamaghano ghange ghokuyara. 26Fumu gha dimuka yoyinu yino, yo na kughambera nendi nomutjima ghoghuhe. Na dimuka shemwa eshi mbadipo thi tha mwirwa po. Yoyishi mbadi ya hokokire mughudhindo. 27Fumu Agripa, wa tawa we haporofeta ndi? Na yi dimuka eshi, wa tawa.”
28Ko kuninga Agripa kwaPaghulusi eshi: “Owe ne kughayara ghuna kughaya eshi, kunitenda mukriste me pawangu‐wangu.”
29Paghulusi ko kuhutha eshi: “Ngambi popano pawanguwangu, ngambi ha yi kara rure. Na kurapera kwaNyambi eshi, kadi pithoye keho, ngo nawahe wa hana kunitegherera dyarero, ngo ha kare yira yame, shemwa shimengwa kupira ko ghano menge.”
30Fumu ghemanine no gha yendire nendi, karo kokuwakutha muraghuri naBerinise. 31Eyi hana kushwagha, ko kukuvureka kwawo eshi: “Murume no ne mbadiko thi gha tenda thokumupaghitha, ngambi thokumutwarera mudorongo.”
32Ha ningi Agripa kwaFestusi eshi: “Murume no kukona kumushutura, ngo mbadi ghana toyo kwafumu shokuru.”
Currently Selected:
Yitenda ya Wapostoli 26: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
