Pilemon 1

Shvwé kà

1Kristu Yesu rvt tung rung pè Polo ngà nv̀ng vnvmpè Timotií, shóngshàì pè bv̀nlì mvngú rv̀mnvng Pilemon, 2vnvmmè Apia, cìl wá lamboqpè Arkipu, nv̀ng nà chø̀m taq ngø̀m we shvngø̀mré sv̀ng shvrikàru vruvtshòe. #Kol. 4:17 3Nøngmaq Vpè Gvray nv̀ng Kàngpè Yesu Kristu taqkèní jejú nv̀ng mòngzø̀l lòng leq lúnnø̀ng. #Rom. 1:7

Pilemon rvt oqà wa we nv̀ng vjúrøt we

4Pilemoná, nà dvpvt ngàí vjúrøtnò dvgvp, ngà Gvray kaq nv̀nnv̀n oqà wvnge. 5Kadø íe wani Gvrayò shànshér we bashàrì shvngbe sv̀ng nà èshóngshì we nv̀ng Kàngpè Yesu sv̀ng nà èkv́m we tvrà tá lún bǿngà. 6Kv́m vsv̀ngrì nv̀ng té nàzø̀m yv́ngkèní, Gvrayí zi we gønpaq shvlá rì shvngbe sv̀ng nàí té cíngràllv́m dvpvt ngàí vjúrøtnange. Yadø vjúrø:tnò we nø Kristu ngø̀rdvgùng bunglv́m dvpvt íe. 7Vnvmpèá, nà shóngnøt rvtnø̀ ngàí dvbùlv́m nv̀ng nònggùn gvzà lún bǿngà. Pàwá wani nà rvt Gvrayò shànshér we bashàrì gø nøt shàbaná:mì. #2Kr. 7:4,13

Onesimu sv̀ng vtolv́m rvt nì:mò we

8Wedø í rvt, Kristu vmíng kèní nvrø̀m dvténgshø̀ng nø̀ nàí wá vdu lòng wàlv́m ngàí nà sv̀ng dvkv́mkà zí lúnò we íe. 9Ínìgø, Kristu Yesu rvt tung rung we shaqrépè Polo ngà nø shóngnøt kèní lè nà sv̀ng tiqpv̀n røtnímshì mvyǿnge. 10Mvngbǿ:ngí vdóngshaq ǿngà dvgvp kv́mnøt taq ngàcè íá:mì pè Onesimu dvpvt nà sv̀ng røtnìmvtne. #1Kr. 4:14; Kol. 4:9 11Vzv̀ng àng nø nà dvpvt vjú màvl we ínìgø, akvt nø nà dvpvt gø, ngà dvpvt gø, vjú vl we tiqgǿ íá:mì.

12Ngàí àng sv̀ng gvzà shòngò nø̀nggø, nà yv́ngsv̀ng àng kaq dvtv̀ngvtnòe. 13Dvbùshv̀ngkà rvtnø̀ mvngbǿ:ngí vdóngshaq ǿngà dvgvp, ngà sv̀ng dvbv̀nglv́m nà tvle àng sv̀ng ngà nv̀ng tiqdø v́l dvzv́r mvyǿng we íe. 14Ínìgø nà nøt màrá dø, tiqpv̀n gø wá màmvyǿng. Nàí shvla we bv̀nlì èwàò lòng nø mvdø̀ng mvdaq mø̀í dø, nà nø:tní èwà lú:ngò we lè í dvzv́r mvyǿnge.#2Kr. 9:7; 1Pt. 5:2 15Àng nø nà nv̀ng dvciqlvpat v̀llv́m dvpvt lè, nà yv́ngkèní tiqchàmcè vsará:mì we í má, màshá! 16Àng nø vshuq dø wa mø̀í, vshuq mvdv̀m vpǿ nø̀ shóngshì ra we nvnvmpè íá:mì. Onesimu sv̀ng ngà gvzà shóngshø̀nge. Nà gø àng sv̀ng téwa shóngshì vdue. Pàwá wani àng nø nà dvpvt shvla we vshuqpè í we wa mvtaq, Kàngpè vdòng taq nvnvmpè gø íe. #1Tm. 6:2

17Wedø í rvtnø̀, nàí ngà sv̀ng bv̀nlì mvngú rv̀mnvng dèdutna kvt kèní nø, ngà sv̀ng nàtòngà døni, àng sv̀ng gø nàtoò. 18À:ngí nà sv̀ng nàlé we, mø̀íni vjø we tiqpv̀npv̀n la vl nìnø, werì nø ngà shìpan taq mèsø:ngò. 19Shvrv́n welòng nø Polo ngàí ni waqlv́m íe, wvng nø̀ ngà vdè wu:rí vrongò we íe. (Íwe, nà vdè mv̀ng ngà sv̀ng nàjøe, wa nø̀ nà kaq shǿn da mvràni). #Gal. 6:11; 2Te. 3:17 20Íe, vnvmpèá, Kàngpè vdòng taq àngnøngnvm íshà rvt, nà sv̀ng wedø wá dvzv́r mvyǿnge. Kristu vdòng taq ngà nøt sv̀ng shàban dèzv́rà. 21Nàí ètángang daknge wvng jø̀ngjǿng kv́m rvtnø̀, nà sv̀ng yadø vrongò we íe. Ngà røt mvdv̀m, mvzv́n gø nàí èwà lú:ngò we sv̀ng ngàí shángòe.

22Vrá, ngà dvpvt v́lrà dègǿngang dángà. Kadø íe wani nàmaqí jú èrøtnashà dø, túng kèní shèlàng dak kvt nàmaq yv́ng tok rang we sv̀ng vlǿmshø̀nge. #Pil. 1:25; 2:24-25

Lv̀ngdø̀m Kà

23Kristu Yesu dvpvt ngà nv̀ng tiqdø tung rung we rv̀mnvngpè Epapra gø nà sv̀ng pàmvrà wae. #Kol. 1:7; 4:12 24Ngà nv̀ng tiqdø bv̀nlì mvngú rv̀mnvngpèla Marko, Aristarku, Dema nv̀ng Luka maq gø pàmvrà wae. #Kol. 4:10,14 25Kàngpè Yesu Kristu jejú nø nàmaq nv̀ng tiqdø laq vl dvr.

Currently Selected:

Pilemon 1: GSM

Highlight

Copy

Compare