Luka 21

Memàmèò vlu

Mak. 12:41-44

1Yesuí dvjaqò ke, mvgàmrìí àngmaq gønpaqrì vlu shvdik taq zá:ngò we sv̀ng yà:ngòe. 2Dvshà we memà tiqmèí kàmø gv̀msùngshicè vnígø̀m#21:2 Heleni kà taq “lepta” nø 25 byá dv́ngte íe. zá:ngò we sv̀ng gø yà:ngòe. 3Wekvt À:ngí, “Ngàí jø̀ngjǿng vla:tnìni, dvshà we memà yamèí shvngbe mvdv̀m té zv́ng bǿà. 4Kadø íe wani, dvgárì shvngbeí nø àngmaqí lv́ng vchéò rì taqkèní zíò we wa íe. Yamèí nø dvshà nìgø, àng dvkúmshìlv́m v́laò dv́ngte zv́ng bǿà,” a:lòe. #21:4 2Kr. 8:12

Noqngø̀m Tø̀ngnø vcat long we

Mat. 24:1-21; Mak. 13:1-19

5Noqngø̀m Tø̀ngnø nø vnvp we lóngrì nv̀ng shvrúng gønpaqrìí kadøwa shvnvp yà:ngà dang coqcv́nrì tiqmaq vrùnge. Íwe Yesuí, 6“Yayv́ng vl rì shvngbe èyv̀ngnø̀ng. Yayv́ng tiqchv̀ng mvdv̀m tiqchv̀ng vrvngshaq lóngrì nø, màrǿlshaq tiqchv̀ng gø màdvng we àngni tuq rae,” a:lòe.

7Wekvt àngmaqí, “Svrapèá, yadv́ng pv̀n nø kadvgvp í long má? Yadv́ng pv̀n vhømlv́m rvtø̀ mvshv́lpvrá nø kadø í we bung long má?” wa rø:tnòe.

8Yesuí, “Nàmaq sv̀ng vsa:ngí màshvmànlv́m nàyáshìnø̀ng. ‘Ngà nø Kristu ǿngàe,’ wa dvpéshì vsv̀ng mvme bung long nø̀, ‘Rvtø̀ níshì ráì,’ wa dvshvng lú:ngòe. Íwe, àngmaq mèpvng mècv̀nnø̀ngni. 9Cìl vshvt we nv̀ng vhaq vjángshì we shv̀ngkà àngpv̀npv̀n ètá lóngnø̀ng dvgvp, mèsèrenø̀ngni. Yadv́ng pv̀n nø vzv̀ng kaq vhøm rà rì íe. Íwe lv̀ngdø̀m rvtø̀ nø tiqdvshaqí mvhøqò,” a:lòe.

10Vrá À:ngí, “Vsv̀ng tiqdvcì nv̀ng tiqdvcì, tiqmóngdàn nv̀ng tiqmóngdàn cìl vshvt longe. 11Tiqyv́ng nø tiqyv́ng, nv̀mnǿmè vshvl we, dvkø we, shíwù zø̀nlì vkǿn we bung longe. Muqlàng ramø svrelv́mrì nv̀ng mvshv́lpvrámèrì dvtánshì daqe.

Dvshà mvhøtlv́m vhǿm rà long we

Mat. 10:16-25; Mak. 13:9-13

12Íwe yadv́ng pv̀n shvngbe shini màhøm ra dvgvp, vsa:ngí nàmaq sv̀ng ètvpnø̀ng nø̀, dvki nàrèvtnø̀nge. Ngà bø̀ng rvtnø̀, júrøt chø̀mrì nv̀ng tung chø̀mrì sv̀ng tèle bǿnø̀ng nø̀, koqkv́mrì nv̀ng øpshú gàmzø̀rì mv́rdv̀ng sv̀ng èshøl bǿnø̀nge. 13Welòng nø Ngà dvpvt shvkse washìlv́m rvtø̀ èía lóngnø̀nge. 14Wedvgvp àngmaq sv̀ng kadøwa vtv́nshìlv́m dvpvt góng mvgilv́m vzv̀ng kèní nøt èrvtshìnø̀ng. 15Pàwá wani nàmaq ngv̀nshàrìí vgám mvdá:ngò, vtv́n mvngu:tnò høq, shø̀nlv́m kà nv̀ng zitnøt Ngàí nàmaq sv̀ng zí daqìe. #Mat. 10:19; Luk. 12:11-12; Dzr. 6:10 16Nvpè nvmè, nvnvm nvchvngrì, nvrì nvrvprì nv̀ng rv̀mnvngrìí gø nàmaq sv̀ng ènvmv́m bǿnø̀nge. Vrá, tiqmaq sv̀ng nø dùgàmzø̀rìí èshvtnvtnø̀nge. 17Ngà rvtnø̀ vsv̀ng shvngbeí shèngovtnø̀nge. #Mat. 10:21-22; Mak. 13:12-13 18Íwe, nàmaq vgoni tiqhǿng gø màmvngvm. 19Ètønshìnø̀ng, wekvt gø̀nshaq èlún lóngnø̀nge.

Yerusalem vcat long we

20Yerusalem sv̀ng cìlcè loksu:kngí wanga:tnò we èyv̀ng bǿnø̀ng dvgvp, wamà vcatlv́m rvtø̀ níshì ráì we èshánø̀ng. 21Wedvgvp, Yuda móng taq vl rì nø shigùng sv̀ng laq vtshì. Wamà vdòngø vl rì gø laq léshì. Mvrìng rvgaq vl rì gø wamà sv̀ng laq mvgòng. 22Kadø íe wani yalòng nø kàru taq vrushaq rì shvngbe vhømlv́m dvpvt, mvrà zíò we àngni íe. #Yer. 5:29; Hos. 9:7 23Wenila taq, cv̀mré góng í rì nv̀ng nong dvcøqshì rì nø mvhøt longe. Kadø íe wani móng yalòng taq vtvngshaq dvshàlv́m vl longe. Bashà yarì mvdv̀m taq Gvray høpnøt kàngélv́m lòng tuq daqe. 24Àngmaq nø shv̀mshvnaqí vtungvme. Àngmaq sv̀ng ta:pmò nø̀ wv́ngzà móng í dv́ngte kaq shølv́m bǿòe. Wv́ngzà àngni màdvgø:mò dv́ngte, Yerusalem nø wv́ngzàrìí zeqzeq lvm lú:ngòe. #Drd. 28:64; Shz. 79:1; Dtn. 11:2

Yesu vtv́ng daq we

Mat. 24:29-30; Mak. 13:24-26

25Wedvgvp nv̀m, shvlá nv̀ng kurniprì taq mvshv́lpvrá dvtánshì daqe. Rvgaq tø̀m taq nø, nvmukdvra nv̀ng tìmarì vhoshì we shaq rvt, vsv̀ngrì nø góng dvgishì nø̀ nøt shok longe. 26Vsv̀ngrì nø rvgaqtø̀m taq bø̀nlv́m dv́nshì rì sv̀ng shø̀ngra:nò nø̀ svre weí nøt vmaq longe. Pàwá wani muqlàng ramò jórnònggùnrì gø vnanshì longe. 27Wekvt Vsv̀ng Àngcèpè nø rvmøt tiqpù taq zúnshì sórí, jórnònggùn nv̀ng ngø̀rdvgùng vtvng taq di daq we sv̀ng àngmaqí yv̀ng lú:ngòe. #Dan. 7:13-14 28Yadv́ng pv̀n vhøm pv́ngshì long dvgvp nø, nònggùn èlushìnø̀ng nø̀ nvrø̀m dètéshìnø̀ng. Pàwá wani nàmaq sv̀ng chv́nglv́m àngni níshì ráì,” a:lòe.

Nv̀mgwè tø̀ng kàshvbóng

Mat. 24:32-35; Mak. 13:28-31

29Vrá, À:ngí kàshvbóng tiqlòng àngmaq sv̀ng yadø shø̀:nòe. “Nv̀mgwè tø̀ng nv̀ng dvga shǿngtø̀ngrì shvngbe sv̀ng dèdvmnø̀ng. 30Werì àngcvp mør long kvtnø, lǿmnè níshì ráì we sv̀ng nàmaqí chàng èshánø̀nge. 31Wedø tiqdvchá, yadv́ng pv̀n bø̀n ra we sv̀ng èyv̀ng bǿnø̀ng dvgvp, Gvray móngdàn níshì ráì we sv̀ng nàmaqí shá ràe. 32Ngàí jø̀ngjǿng vla:tnìni, yadv́ng pv̀n shvngbe nø yabàncèrì shini màle dvgvp ni bø̀n rae. 33Muqlàng nv̀ng rvgaq vlevm nìgø, Ngà kàrì nø kadvgvp gø màlevm. #Luk. 16:17

Pán vshat ca rà we

34Nàmaq vdèdè nàyáshìnø̀ng. V́mlv́m mvlá we, nø̀wú we nv̀ng yabàn dvpvt góng dègishìnø̀ng weí, nàmaq nøt èbánø̀ng dvgvp, àngni welòng nø hǿng vpvt padø, nàmaq mvdv̀m chvnvnv́n tuq daqe. #Mat. 24:49; Luk. 17:27 35Kadø íe wani àngni welòng nø mònggàng vsv̀ng shvngbe mvdv̀m tuq daqe. #Esa. 24:17; 1Te. 5:3 36Íwe nàmaq mv̀ng nø, vhømlv́m dv́nshì we yadv́ng pv̀n shvngbe taqkèní lutshìlv́m dvpvt nv̀ng Vsv̀ng Àngcèpè mv́rdv̀ngø rip ngutlv́m dvpvt, nv̀nnv̀n pán nàshatnø̀ng nø̀ vjú èrøtshìnø̀ng,” a:lòe. #Mak. 13:33; Dtn. 6:17

37Yesuí Noqngø̀m Tø̀ngnø taq ni vrv̀m shvngø:tnòe. Vrá, ni vrv̀m dørø̀:mí Àng búng nø̀ Zanlún Pung tǿò we mvrùl yv́ng yøpme. #Luk. 19:47; Yoh. 8:1-2 38Vsv̀ng shvngbe nø Àng mòngkà tashìlv́m Noqngø̀m Tø̀ngnø taq mvgágá dvkǿmshìe.

Currently Selected:

Luka 21: GSM

Highlight

Copy

Compare