Luka 2

Yesu gà:lò we

Mat. 1:18-25

1Wenila taq, Roma móngdàn køp taq vl we vsv̀ng go rø tǿlv́m rvt Kesar Agustuí vmíng dvka:ngòe. 2Yalòng nø Siria móng taq Kureniuí øpmò dvgvp, vsv̀ng go rø nv̀mlat tǿò poq íe. 3Vsv̀ng shvngbe nø bø̀ng vrushìlv́m vdèdè rvwá sv̀ng vtv́nge. 4Yosep gø Dawi dvgø̀ng rvpcè í rvt, Galili rvgaq Nazaret mvrìng kèní Yuda rvgaq Dawi mvrìng Betlehem sv̀ng dìá:mì. 5Yosep nø bø̀ng vrushìlv́m rvt àng sv̀ng vdv́nshìshaq mè Mari nv̀ng tiqdø die. Wedvgvp Mari nø cv̀mré góng íe. #Luk. 1:27

6Àngní weyv́ngø vl dvgvp, Mari nø cv̀mré gv̀llv́m rvtø̀ í á:mì. 7À:ngí àngcè vlat tiqpè gv̀l daqà nø̀, cvní:ní du:pmò dá:ngí nìnà v́mkung taq dvbǿ:mòe. Pàwá wani àngní dvpvt zaqlè chø̀m taq v́lrà mvchǿng. #Mat. 1:25

Muqlàng dvzv́rrì nv̀ng vyv̀ng roqshúrì

8We shvnvng vdv́m rvyangø, vyv̀ng roqrì nø yaqdø̀:ngí àngmaq vyv̀ngrì roqò nø̀ vle. 9Wekvt Kàngpè muqlàng dvzv́r tiqgǿ àngmaq kaq dvtánshì daqì nø̀, Kàngpè pòngbàng àngmaq gùrhøm shór daqì rvt, àngmaq shérvkaq svreá:mì. 10Íwe muqlàng dvzá:rí, “Mèsèrenø̀ngni. Ètánø̀ng, bashàrì shvngbe dvpvt vtvngshaq dvbùlv́m shv̀ngkà shvlá ngàí dvtá daqshà. 11Dèni Dawi mvrìng taq nàmaq dvpvt Chv́ngshú tiqpè gv̀l bǿà. Àng nø Kàngpè Kristu íe. 12Nàmaq dvpvt mvshv́lpvrá tiqlòng nø, cv̀mrécè sv̀ng cvní:ní du:pmò nø̀, nìnà v́mkung taq dvbǿ:mò we sv̀ng èyv̀ng bǿnø̀nge,” a:lòe.

13Wekvt chàng muqlàng dvzv́r wegǿ nv̀ng tiqdø muqlàng dvzv́r loksok lokga dvtánshì daqì nø̀ Gvray kaq shvringò we nø, 14“ Gvray nø vháng vtvng yv́ng ngø̀rdvgùng laq vl. Rvgaq tø̀mø Àng wv́mshì rìí mòngzø̀l lòng laq lú:nò,” wae. #Luk. 19:38

Vyv̀ng roq rìí Yesu noqò we

15Àngmaq yv́ngkèní muqlàng dvzv́rrì muqlàng kaq vtv́ngá:mì mèpvng, “Betlehem sv̀ng nøngmaq dìì nø̀, Kàngpèí dètá daqshà lòng bø̀ná:mì we sv̀ng yv̀ngá:mì,” wa vyv̀ng roq rì vrùnge. 16Àngmaq cancan dìá:mì nø̀ Mari, Yosep nv̀ng nìnà v́mkung taq dvbǿ:mò we cv̀mrécè sv̀ng lá lún bǿà. 17Àngmaqí yv̀ng bǿà kvt, cv̀mré yagǿ dang àngmaq sv̀ng dvtá daqà kà dvsha:ngòe. #Luk. 2:10-12 18Vyv̀ng roq rìí shø̀:nò kà táò dv́ngte nø dàe. 19Íwe Marií nø, yarì shvngbe àng nøt vdòngø shø:pmò nø̀ dvda:mòe. #Luk. 2:51 20Vyv̀ng roq rìí nø muqlàng dvzá:rí dvtá daqà dø, tá bǿà rì, yv̀ng bǿà rì shvngbe rvt Gvray dvgùng dvsha:ngò nø̀ shvri:ngò sórí vtv́ngá:mì.

Yesu bø̀ng tǿò we

21Vshvt ni wa ni taq cv̀mrépè sv̀ng rvmølalv́m àngni gø̀ ráì kvt, àngmè góng taq shini màvl dvgvp kèní muqlàng dvzá:rí bø̀ng vtǿshaq dø, Àng sv̀ng Yesu wa tǿòe. #Lew. 12:3 22Moshi Dvrá taq vl dø dvshàn dvshérshìlv́m àngni gø̀ ráì dvgvp, àngní nø cv̀mrépè sv̀ng Kàngpè dvpvt shvgaqalv́m Yerusalem sv̀ng baq bǿà. #Bng. 13:2,12-15; Lew. 12:1-8 23Kadø íe wani, Kàngpè Dvrá taq, “Lvngàré vlatpè vrv̀m nø Kàngpè dvpvt shvgaqa ràe,” wa vru yà:ngà. #Bng. 13:2,12-15 24Kàngpè Dvrá taq dvkv́mshaq dø, “kuqcøl mø̀íni kaøcè vnígo” àngníí Gvray kaq shvrúngaòe. #Lew. 12:8

Simeoní Yesu yà:ngò we

25Wedvgvp Yerusalem taq, Simeon tǿò we døngman nø̀ Gvray kaq vpǿ svre we tiqpè vle. À:ngí nø Israel dvcì kaq nøt shvlø̀m daqò lòng sv̀ng caòe. Shànshér Pvlàcè gø àng nv̀ng vle. #Esa. 40:1 26“Kàngpèò Kristu sv̀ng màyv́ngshaq nø mèshì long,” wa Shànshér Pvlàcèí àng sv̀ng dvtáshaq íe. 27Shànshér Pvlàcèí shø:lò we taq, àng nø Noqngø̀m Tø̀ngnø sv̀ng gòng ráì. Wekvt Dvrá vtóng vl dø cv̀nlv́m rvt, àngpè àngmèníí cv̀mrépè Yesu dvgònga:tnà ke, 28Simeoní cv̀mrépè sv̀ng àng wur taq vbu:nò sórí, Gvray kaq shvringò nø̀,

29“Øpgømshú Kàngpèá, Nà èshø̀n dø tiqdvchá,

Nà dvzømshúpè sv̀ng akvt mòngzø̀l dø shèlongà.

30-31Kadø íe wani Nàí vsv̀ng dvcì shvngbe mv́rdv̀ngø dègø̀ yà:ngà we,

Nàò chutchv́ng lòng sv̀ng ngàí yv̀ng bǿngà. #Esa. 40:5; 52:10

32Àng nø wv́ngzàrì sv̀ng Gvray nøt dvtanalv́m gálòng í nø̀,

Nà bashà Israel dvcìò ngø̀rdvgùng gø íe,” wae. #Esa. 42:6; 49:6

33Yesu dang shø̀:nò kàrì rvtnø̀, àngpè àngmèní nø dàá:mì. 34Simeoní àngmaq sv̀ng shvmánò nø̀ Àngmè Mari sv̀ng, “Èyà:ngò, cv̀mré yapè nø Israel dvcìcèrì taq, mvme gǿ vtúnglv́m nv̀ng, mvme gǿ kungshìlv́m dvpvt rvhiqshaq pè íe. Vrá, vsv̀ng zershìlv́m mvshv́lpvrá gø íe. #Esa. 8:14; Mat. 21:42-44; 1Kr. 1:23; 1Pt. 2:7-8 35Yalòng nø, mvme gǿ nøt taq dvda:mò rì dvtanalv́m dvpvt íe. Yapè rvtnø̀ nà dòngnøt sv̀ng gø shv̀msǿ:rí yaqò dø èyaqvtne,” a:lòe.

Annaí Yesu yà:ngò we

36Vrá, Asher dvcì Panuel àngcèmè Anna tǿò we kàdvtutshú tiqgǿ vle. Àng nø gvzà cvrǿng ráì. Shvzøngshì bǿì mèpvng shvngøt nǿng vl dá:ngí àng chø̀mpè shì nø̀, 37vbat vshvtcé vbìnǿng høqa:tnà we memà tiqmè íe. Àng nø Noqngø̀m Tø̀ngnø sv̀ng kadvgvp gø mvká:ngò dø, vjú røt nø̀ màv́m vnatshì weí vyáng yaqdø̀ng Gvray kaq dvzø:mòe. 38Wervtø̀ taq ni, àng gø gòng lú:ngì nø̀ Gvray kaq oqà wa sórí, Israel dvcì#2:38 Àngké kà taq “Yerusalem” wae. kaq chv́ng daqò we sv̀ng vlǿmshì nø̀ caò rì í dv́ngte kaq cv̀mrépè dang shǿn ma:nòe.#Esa. 52:9

39Yosep nv̀ng Mari nø Kàngpè Dvrá taq vl dø, pv̀n vrv̀m cv́n dvgøm bǿà dá:ngí, Galili rvgaq àngmaq mvrìng Nazaret sv̀ng loá:mì. 40Cv̀mrépè nø té lú:ngì nø̀ nònggùn gø kv́ng lú:ngì. Àng nø zitnøt rálnøt dv̀nzø̀ng nø̀ Gvray jejú gø Àng mvdv̀m vhapme. #Luk. 2:52

Shvle Bóy sv̀ng Yesu di we

41Nǿng vrv̀m Yesu àngpè àngmèní nø Shvle Bóy lúmlv́m Yerusalem sv̀ng die. #Bng. 23:15 42Yesu vbat tiqcé vnínǿng íá:mì ke gø, àngwà dø bóy vtóng cà:nò nø̀, àngmaq nø bóy sv̀ng dìá:mì. 43Bóy wá dv́ng bǿà rvt àngmaq loá:mì ke, lvngàsvrépè Yesu nø Yerusalemø v̀l ráì we àngpè àngmèníí mvdǿ:mò. 44Àng nø dvga dø tvrà di rì nv̀ng tiqdø íe lá:nò nø̀ tiqni tvrà di bǿì ke wa, àngrì àngrvprì nv̀ng rv̀mnvngrì dvhø̀ø láòe. 45Àng sv̀ng lá mvlún bǿà kvt, àngní nø Yerusalem sv̀ng bat vtv́ng nø̀ láá:mà.

46Àng nø Noqngø̀m Tø̀ngnø yv́ng shvngøtshúrì dvhø̀ø rung sórí, àngmaq kà tá ma:nò, røt ma:nò nø̀ vl da we, vshø̀m ni mèpvng wa àngníí lá lún bǿà. 47Àng kà táò rì shvngbe nø, Àngò zitnøt rálnøt nv̀ng À:ngí vtá:nò kàrì rvt dàe. 48Àng sv̀ng yv̀ng bǿà kvt àngní vtiqá:mì. Àngmèí, “Vcèá, pàwálv́m ngàní sv̀ng yadø dvshá èwashàe má? Nvpè ó ngàní nø nøt dvshàshì sórí, Nà sv̀ng lávtshà,” a:lòe.

49À:ngí, “Pàwálv́m Ngà sv̀ng èláshàe má? Ngà nø Vpè chø̀m taq v́l rà we#2:49 Mø̀íni “Ngà Vpè bv̀nlì wá ràng we.” sv̀ng nàníí mèsháshò má?” a:lòe. 50Íwe À:ngí a:lò kà sv̀ng àngníí mvcí:ngò.

51Wekvt Yesu nø àngní nv̀ng tiqdø Nazaret mvrìng sv̀ng loá:mì. Àng nø àngní kà ta nø̀ vle. Àngmèí mv̀ng nø yadv́ngte shvngbe àng nøt vdòngø shø:pmòe. #Luk. 2:19 52Yesu nø shagóng nv̀ng zitnøt rálnøt taq tétǿng mvnshìe. Gvray mv́rdv̀ng nv̀ng vsv̀ng mv́rdv̀ng gø zøa we lún ma:nòe.

Currently Selected:

Luka 2: GSM

Highlight

Copy

Compare