MARKUS 10
10
Neajar Yesus tentang Hal Cengrei
(Mat 19:1-12; Luk 16:18)
1Telas ajeh Yesus ru Ipengikot-pengikot naidek pekan Kapernaum ru naiet nu lengrik Yudea ru nu englag Batag arik Jordan. Mai jengoi naibekumpol nij ku kelileg Yesus ru begei biasa Yesus pen Kiajar enai.
2Mong memerip urag mai Farisi naihol naiha-uji Kek. Naitanya, “Amen hijoi Taurat Musa, bulehka tok numom gengsir kicerei ikenah?”
3Yesus Kiberlag, “Ma hukom de biog ya Nabi Musa nu engkek tentang hal cengrei?”
4Naiberlag, “Nabi Musa kibenar numom gengsir kicerei ikenah amen kibeh surat cerei lalu kiog nu ikenah.”#Ul 24:1-4
5Yesus Kiberlag nu enai, “Nabi Musa kicot hukom ajeh kerana sengik engkek jehat. 6Tapi ku imemula mase Jenang Kicipte dunia adeh, ‘Kek Kicipte keral ru kerdor.#Kej 1:27 7Ajehloh isebab numom keral doh kidek iamek-apak ru kibenanek ru ikenah, 8ru ubai rimnar doh baijadi nanek.’ Jadi, ubai pek bainar nij tapi baijadi nanek.#Kej 2:24 9Kerana ajeh, ma de ya bipenanek ya Jenang pek buleh bicerlah ya manusia!”
10Lalu mase enai ku padeg, Ipengikot-pengikot naitanya nu Yesus tentang hal cengrei ajeh. 11Yesus Kiurok nu enai, “Amen numom keral kicerei ikenah lalu kijeg kerdor kilek, kek ya kibezinah tehadap ikenah de petame. 12Begei ajeh juga amen numom kerdor kicerei igengsir lalu kibegengsir ru keral kilek, kek pen kibezinah juga.”
Yesus Kiberkat Sesanget
(Mat 19:13-15; Luk 18:15-17)
13Mong memerip urag sengoi naien sesanget nu Yesus supaye Kidek Iteg ku sesanget ajeh ru Kiberkat enai. Tapi Ipengikot-pengikot nairok sengoi-sengoi ajeh. 14Mase Yesus Kineng hal ajeh, Kek Kirok Ipengikot-pengikot lalu Kiurok, “Agokloh get enai. Biarloh sesanget ajeh naihol nu Eng kerana mai begei enai ajehloh de naijadi sengoi-sengoi de biperintah ya Jenang sebegei Raja. 15Cerngailoh abor! Mai de kiaku Jenang ajeh iRaja begei ha sikap numom sanget, had kek taleh de dapat kijadi sengoi de biperintah ya Jenang sebegei Raja.” 16Telas Yesus Kiurok begei ajeh, Kek Kikawal dikdij sanget ajeh lalu Kidek Iteg ku enai ru Kiberkat enai.
Mai Kaya Susah Naiha-jadi Sengoi-sengoi Jenang
(Mat 19:16-30; Luk 18:18-30)
17Mase Yesus pai Kimula Iceknip, mong numom keral kijerjar nu Kek. Sengoi ajeh kisujod ku ngar Yesus lalu kitanya, “Guru de bor, ma de patot ngbeh supaye ngkep sinui de lei ditehjeh?”
18Yesus Kiberlag, “Yama haurok Eng bor? Pek mong numom pen de bor, had Jenang Kihalei taleh. 19Tentu ya hapanei perintah Jenang: Agok perdat mai, agok bezinah, agok siksij, agok og kesaksian palsu, agok belenglod, ru hormatloh keneng-menek hek.”#Kel 20:12-16; Ul 5:16-20
20Keral ajeh kiurok nu Yesus, “Guru, dikdij hukom ajeh ya ngbeh sejak ngsanget.”
21Yesus Kineng nu sengoi ajeh ya haknok lalu Kiurok, “Mong nanek hal nij de patot habeh. Etloh jual dikdij harta hek ru ogloh duet ajeh nu mai hajap. Amen habeh begei ajeh, hek doh hakep harta ku serga. Telas ajeh beiloh joi Eng.” 22Irenes jadi muram bile kicerngai bengwal Yesus ajeh. Lalu kek kidek ju tempat ajeh ru sengik de sedeh kerana kek ihad kaya.
23Yesus Kineng nu Ipengikot-pengikot ru Kiurok nu enai, “Ihad susah mai kaya naiha-jadi sengoi-sengoi de biperintah ya Jenang sebegei Raja.”
24Ipengikot-pengikot cengang empag enai ha engrok Yesus ajeh. Tapi Yesus Kiurok nij, “Kekenon Eng, ihad susah mai naiha-jadi sengoi-sengoi de biperintah ya Jenang sebegei Raja! 25Lebeh senang nuikor unte kimuj nu lubang jarop daripade mai kaya naijadi sengoi-sengoi de biperintah ya Jenang sebegei Raja.”
26Cengang empag Ipengikot-pengikot bile naicerngai engrok Yesus ajeh, lalu naibetanya ratak liknai, “Amen begei ajeh, bokka de dapat bipeselamat?”
27Yesus Kineng nu enai lalu Kiberlag, “Hal ajeh pek dapat bibeh ya manusia tapi ya Jenang dapat kerana Kek dapat Kibeh ma-ma taleh.”
28Lalu Petrus kiurok, “Jik ya jiwes dikdij ma de mong ku jik jiha-joi Jen.”
29Yesus Kiberlag, “Cerngailoh abor, bok imai de kidek ideg, itenek-menang, ikeneng-menek, ikekenon, atao iselai kerana naiha-joi Eng ru kerana naiha-perlei Gah Bor, 30kek doh kikep lebeh jeoi nij. Ku jaman adeh, sengoi ajeh doh kikep 100 kali gande deg, tenek-menang, amek, kekenon, ru selai. Tapi kek juga doh bianiaye. Ku jaman keknit doh, sengoi ajeh doh kikep sinui de lei ditehjeh. 31Tapi jeoi sengoi de canuk doh naijadi keknit, ru sengoi de keknit doh naijadi canuk.”#Mat 20:16; Luk 13:30
Ku Inik Kali Yesus Kipasal tentang Idanan
(Mat 20:17-19; Luk 18:31-34)
32Mase Yesus, Ipengikot-pengikot, ru dikdij mai de naijoi Kek naicip nu kote Yerusalem, Yesus Kicip canuk ku ngar enai. Ipengikot-pengikot nairasa hiran ru mai jengoi naisengoh. Yesus Kiajak nu ibeg 12 urag Ipengikot ju pengikot-pengikot de kilek lalu Kipasal nu enai ma doh de belaku ku Ilei. 33Yesus Kiurok, “Hik hunen hiha-et nu kote Yerusalem. Ku pajeh doh Eng Kenon Manusia biog nu raknak-raknak imam agame Yahudi ru guru-guru Hukom Taurat. Enai doh naipejatoh hukom dat nu Eng. Telas ajeh naiog Eng nu mai pek Yahudi. 34Enai doh nainyeh, naitoh, nairempet, ru naiperdat Eng. Tapi telas nik arik, Eng doh Ngkos nij ju danan LiEng.”
Semmanj Yakobus ru Yohanes
(Mat 20:20-28)
35Telas ajeh Yakobus ru Yohanes baihol nu Yesus. Ubai ajeh kekenon Zebedeus. Ubai baiurok nu Yesus, “Guru, jarhod Jenbeh ma de jarsemanj.”
36Yesus Kitanya, “Ma de jerkek hod Eng Ngbeh ha jerkek?”
37Baiberlag, “Bile Jenmemerintah sebegei Raja de mulie doh, ogloh jargei jarmemerintah ru Jen ku englag kentop ru kengwil Jen.”#10:37 Amen hijoi budaye mai Yahudi, sengoi de kiterima hormat ru kuasa kigei ku englag kentop ru englag kengwil.
38Tapi Yesus Kiurok nu ubai, “Jerkek pek jerkepanei ma de jerkesemanj. Sanggopka jerketempeh seniksa de doh Ngtempeh? Sanggopka jerketerima seniksa de doh Ngterima?”
39“Sanggop,” baiberlag.
Yesus Kiurok nu ubai, “Mimang jerkek doh jerketempeh seniksa de Ngtempeh, ru jerketerima seniksa de Ngterima. 40Tapi Eng pek berhak Ngha-petentu bok imai de doh kigei ku englag kentop ru kengwil Eng kerana Jenang ya Kipetentu bok imai de gigei ku tempat ajeh.”
41Bile 10 urag pengikot Yesus de kilek naipanei ma de Yakobus ru Yohanes baisemanj nu Yesus, naibelal nu ubai ajeh. 42Yesus Kicereg dikdij liknai lalu Kiurok, “Engkek ya engkepanei penguasa-penguasa mai pek Yahudi naitindas ha rakyat liknai sendiri. Mai entoi naipaksa rakyat supaye naitaat nu ernor enai. 43Tapi engkek pek patot engkebeh begei ajeh. Bok imai de kaha-jadi mai entoi ku engkap engkek adeh, kek hodloh kijadi begei ha hambe.#Luk 22:25-26 44Ru bok imai de kaha-jadi sengoi de canuk, kek hodloh kijadi hambe nu dikdij mai#Mrk 9:35; Luk 22:26 45sama begei ha Eng Kenon Manusia de Nghol pek Ngha-jadi tuan tapi Ngha-jadi hambe ru Ngha-og nyawe Eng untok Ngterlas jeoi mai ju dosa liknai.”
Yesus Kiperbor Bartimeus de Buta
(Mat 20:29-34; Luk 18:35-43)
46Yesus ru Ipengikot-pengikot pen nailei ku pekan Yerikho. Mase enai ru mai jengoi naidek kote ajeh, mong numom mai buta kigigei kisemanj duet ku beg nong. Imuh Bartimeus kenon Timeus. 47Bile kicerngai Yesus Mai Nazaret Kilalu ku pajeh, kek kicereg ya suara kuat, “Yesus Kenon-cenok Raja Daud, yayakloh eng!”
48Jeoi mai nailes ha kek ru naior kikerakdik serakngek. Tapi kicereg gulebeh kuat nij, “Kenon-cenok Raja Daud, yayakloh eng!”
49Yesus pen Kibehenti lalu Kiurok, “Cereg kek nu madeh.”
Naicereg mai buta ajeh ru naiurok, “Kerakmikloh! Kos deras, Yesus Kicereg hek.”
50Mai buta ajeh gij-gij kikos, kipej ijubah ru kiet nu Yesus.
51Yesus Kitanya nu kek, “Ma de hahod Eng Ngbeh ha hek?”
Mai buta ajeh kiberlag, “Guru, eng nghod ngha-ngnengneng.”
52Yesus Kiurok, “Etloh, hek ya habor kerana hapecaya nu Eng.”
Ku sarik jijeh juga kek ya dapat kinengneng, lalu kek kijoi Yesus ku Iceknip.
Currently Selected:
MARKUS 10: AEH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
