MATIUS 22
22
Perumpamaan tentang Arik Jekneg
(Luk 14:15-24)
1Yesus Kiurok nij Kiguna perumpamaan-perumpamaan nu mai de betanya tentang Ikuasa. 2Kek Kiurok, “Begei perumpamaan adehloh doh de tejadi nu mai de nainyek beterima Jenang Kimemerintah enai sebegei Raja: Mong numom raja kibeh jekneg ha ikenon keral. 3Raja kior ihambe-hambe naicereg mai de ya bijempot supaye naihol nu caknak ajeh tapi mai-mai bijempot ajeh nainyek helhol. 4Telas ajeh raja ajeh kior nij ihambe-hambe de kilek naicereg nukali nij mai de ya bijempot nu caknak ajeh. Kiurok, ‘Pasal nu mai de ngjempot ajeh caknak ya siap. Lembu ibek ru kenon-kenon lembu de bakcok ya bigoj ru dikdij ya bisedia. Holloh nu jekneg adeh!’ 5Tapi mai de bijempot ajeh pek naiirau, naiet naibeh kerjak liknai memaseg. Mong mai de naiet nu selai, mong mai de naiet nu kedei, 6ru mong mai kilek de naicap, naipet, ru naiperdat hambe-hambe raja ajeh. 7Raja ihad kibelal ru kior iaska-aska naiperdat dikdij mai de perdat ihambe-hambe ajeh ru kote enai bitod. 8Lalu raja kicereg ihambe-hambe de kilek ru kiurok, ‘Caknak jekneg ya siap tapi dikdij mai de ya bipelawe pek layak naicak caknak adeh. 9Hunen, etloh nu nong entoi ru pelaweloh bok taleh de engkeburuk nu caknak jekneg adeh.’ 10Jadi, hambe-hambe raja ajeh pen naiet nu nong entoi ru naicatuk ru naipelawe bok taleh de buleh naikep, mai bor ataopen mai de jehat lei tempat caknak ajeh tebeg ya tengloh.
11Bile raja kimuj kaha-terbuk nu itengloh, kek kineng mong numom mai de pek kipakei baju has ha kenurik. 12Raja kiurok nu kek, ‘Hek pek hapakei baju kenurik. Begeiharok hamuj nu madeh?’ Tapi mai ajeh kikerakdik serakngek pek kiberlag ma-ma. 13Lalu raja kior ihambe-hambe naibeg jog ru teg sengoi ajeh, ru kior naipej sengoi ajeh nu luar ku tempat de kelap. Ku pajeh doh mai naijinjap ru naitesiksa.”
14Lalu Yesus Kiperdij Iperumpamaan ajeh ya bengwal adeh: “Jeoi mai de bijempot tapi had gek de bipileh.”
Tenanya tentang Benayar Cukei
(Mrk 12:13-17; Luk 20:20-26)
15Telas ajeh mai Farisi naidek Yesus ru naibepakat naiha-perangkap Yesus ya tenanya. 16Naingeng memerip urag pengikot liknai ru juga memerip urag mai de naisukong ha Raja Herodes Antipas. Mai de enget ajeh naitanya nu Yesus, “Guru, jipanei Jen mai de benar ru jipanei juga Jenajar heknod Jenang ru benar. Enjen pek bipengaroh ya mai kilek kerana pek Jenpeduli ha pangkat mai. 17Pasalloh nu jik ma pendapat Jen. Amen hijoi Hukom Taurat, bulehka tok hibayar cukei nu raja kerajaan Rom?”#22:17 Raja kerajaan Rom: Atao, Kaisar.
18Yesus Kipanei sengik enai de jehat ajeh, lalu Kiurok, “Engkek mai de bepure-pure! Engkek cuba engkeha-perangkap ha Eng! 19Pernengloh duet de engkeguna ha benayar cukei.”
Lalu naiog nukepeg duet perak nu Yesus. 20Yesus Kitanya nu enai, “Wog ru muh bok adeh?”
21Naiberlag, “Raja kerajaan Rom.”
Kerana ajeh, Yesus Kiurok nu enai, “Amen begei ajeh, ogloh nu raja kerajaan Rom ma de patot engkeog nu raja kerajaan Rom, ru ogloh nu Jenang ma de patot engkeog nu Jenang.”
22Bile naicerngai berenglag Yesus ajeh, cengangloh empag enai. Lalu naidek Yesus ru naiet ju kenjeh.
Tenanya tentang Arik Kisnos Mai Dat
(Mrk 12:18-27; Luk 20:27-40)
23Ku arik ajeh juga, hol memerip urag mai Saduki naiha-tanya Yesus. Mai Saduki pek naipecaya mai de ya dat doh naikos nij. 24“Guru, entemjeh Nabi Musa kiurok begei adeh: Amen numom keral kidat pek kibekenon, imenang hodloh kijeg balu itenek ajeh supaye itenek de ya dat ajeh kikep kenon-cenok. 25Entemjeh mong tujoh urag tenek-menang de pernah naigei ku padeh. Ilei de sulog kijeg numom kerdor tapi kidat pek baibekenon. Kerana ajeh, imenang de kedue kijeg balu itenek ajeh. 26Imenang kedue ajeh pen kidat pek baibekenon. Hal de sama belaku nu imenang ketige lei nu de ketujoh. 27Ipenyudah kerdor ajeh pen kidat. 28Ku arik kisnos mai dat, kerdor ajeh doh kijadi kenah bok? Kerana, rimdij tujoh urag tenek-menang ajeh pernah naijadi gengsir kerdor de sama.”
29Yesus Kiberlag, “Peniker engkek ajeh sek kerana pek engkereti Alkitab ru kuasa Jenang. 30Bile mai dat biberkos nij, enai doh pek naibekenah-gengsir. Enai doh naisui begei ha malikat-malikat ku serga de pek naijekjeg. 31Tentang hal kisnos mai dat, tentu ya engkebaca ma de biurok ya Jenang. Jenang Kiurok, 32‘Engloh Jenang de bisembah ya Abraham, Ishak, ru Yakub.’#Kel 3:6 Ju bengwal ajeh, hipanei tentang hal adeh: Nik urag de ya dat ajeh sebenarnye lekat sui ru lekat naisembah ha Jenang. Jenang ajeh apeka Jenang nu mai dat tapi nu mai sui.”
33Bile mai jengoi naicerngai ha penasal Yesus, empag enai cengang kerana Ineajar.
Ernor de Paleng Penteng
(Mrk 12:28-34; Luk 10:25-28)
34Mai Farisi pen naibekumpol telas naicerngai ha gah tentang Yesus Kibeh mai Saduki pek dapat naiurok ma-ma. 35Lalu numom ju guru-guru Hukom Taurat kitanya nu Yesus kerana kaha-uji ha Kek, 36“Guru, ernor belokka de paleng penteng ku kateh Hukom Taurat?”
37Yesus Kiberlag, “ ‘Hokloh TUHAN Jenang hek ru segenap sengik hek, ru segenap sengrog hek, ru dikdij peniker hek.’#Ul 6:5 38Ajehloh ernor petame ru de paleng penteng! 39Adehloh ernor de kedue: Hokloh ratak manusia begei hahok diri lihek sendiri.#Im 19:18 Ernor kedue ajeh sama penteng begei ernor de petame. 40Dikdij Hukom Taurat Musa ru neajar nabi-nabi beasal ju rimnar ernor-ernor ajeh.”
Tenanya tentang Peselamat de Bijanji ya Jenang
(Mrk 12:35-37; Luk 2:41-44)
41Mase mai Farisi naibekumpol besama, Yesus Kitanya nu enai, 42“Ma pendapat engkek tentang Peselamat de bijanji ya Jenang? Kek Kenon-cenok bok?”
“Kenon-cenok Raja Daud,” naiberlag.
43Yesus Kitanya, “Amen begei ajeh, mase Raja Daud bikuasa ya Kelog Santen, yama kicereg kenon-cenok ilei sendiri ajeh ‘Tuhan’? Raja Daud kiurok,
44‘TUHAN ya Kiurok nu Tuhan eng begei adeh:
Geiloh ku kedudukan de tehormat ku englag kentop Eng
lei betol-betol Ngpealah musoh-musoh Hek.’#Mzm 110:1
45Jadi, amen Raja Daud kicereg Peselamat ajeh ‘Tuhan,’ Peselamat ajeh mesti enyuk pek kenon-cenok Raja Daud.”
46Numom pen pek dapat naiberlag tenanya Yesus. Sejak arik ajeh, pek mong numom pen de berani naiha-betanya nu Yesus nij.
Currently Selected:
MATIUS 22: AEH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
