KEJADIAN 37

Yusuf ru Itetenek

1Yakub kigei ku tik Kanaan. Entem Ishak iapak kigei ku tik ajeh sebegei mai aseg.

2Adehloh kisah peringak Yakub.

Mase Yusuf kenon Yakub iumur 17 tahut, kek kijaga kambeg ru dombe besama ru itetenek. Itetenek ajeh kekenon Bilha ru Zilpa gundek iapak. Yusuf kiog panei nu iapak ha bahneh jehat de bibeh ya itetenek.

3Yakub lebeh kihok ha Yusuf daripade dikdij ikekenon de kilek kerana Yusuf biperyos ku mase Yakub ya ihad kiengrak. Ku nanek arik kek kibeh nuhenglei jubah de ihad bor ha Yusuf. 4Bile tetenek Yusuf naineng Yusuf ajeh ihad bihok ya apak enai, enai naigetek ha Yusuf lei pek naibelwal bor nu kek.

5Ku nanek kelem Yusuf kiberakpok. Bile kek kicerite iempok nu itetenek, enai naigetek ha kek lebeh nij. 6Adehloh ma de Yusuf kiurok nu enai: “Cerngailoh empok eng. 7Dikdij lihik mong ku padag tengah hibeg gandom. Aleh-aleh bekneg gandom eng kikos tegak. Lalu bekneg gandom engkek naikelileg bekneg gandom eng ru naisujod nu bekneg gandom eng ajeh.”

8Lalu tetenek Yusuf naiurok nu kek, “Hapiker hek buleh hajadi raja ru habekuasa ku kemil jikka?” Enai naigetek ha Yusuf lagi lebeh nij kerana ha iempok ru ha ma de kiurok ajeh.

9Telas ajeh Yusuf kiberakpok nij. Kek kipasal nu itetenek, “Eng ngberakpok nij. Ngbakek mat arik, gecek, ru 11 perloi naisujod nu eng.”

10Iempok ajeh kicerite nu iapak juga. Lalu iapak kitegor kek, “Empok ma mei de hek ajeh? Hapiker eng, amek hek, ru tenek-menang hek doh jiterbuk ru jisujod jisembah ha hekka?” 11Tetenek Yusuf naiiri sengik nu kek tapi iapak lekat kibepiker tentang empok ajeh.

Yusuf Bijual ru Bien nu Lengrik Mesir

12Ku nanek arik tetenek Yusuf naiet nu Sikhem naiha-wag binatag daknek apak enai. 13Lalu Yakub kiurok nu Yusuf, “Etloh nu Sikhem ku belok tetenek hek naiwag binatag daknek hik.”

Yusuf kiberlag, “Hoohloh, pak.”

14Iapak kiurok, “Nengloh begeiharok keadaan tetenek hek ru binatag daknek ajeh. Telas ajeh hajog ru hapasal nu eng.” Begei ajehloh Yakub kior Yusuf et ju Lembah Hebron nu Sikhem.

15Yusuf pen kilei ku Sikhem. Mase kek kicip diteh madeh ku padag, mong numom keral kiburuk kek lalu kitanya, “Ma de hakek?”

16Yusuf kiberlag, “Eng ngkek ha tetenek eng de tengah naiwag binatag daknek enai. Jenpaneika enai mong ku belok?”

17Sengoi ajeh kiurok, “Enai ya naiet ju kendeh. Eng ngcerngai naiurok naiha-et nu Dotan.”

Jadi, Yusuf kiet kidalag itetenek lalu kek kiburuk enai ku Dotan.

18Ju kennyak itetenek ya naibakek Yusuf. Tapi sebelom kek kilei, enai ya naibepakat naiha-perdat kek.

19Naibelwal ratak liknai, “Ajeh tukang empok ya kilei. 20Beiloh hunen hiperdat kek ru imayat hipej nu kateh perigi sod. Doh hiurok kek bijerop ya marak. Telas ajeh doh hineng same ade iempok ajeh kitejadika tok!”

21Tapi bile Ruben kicerngai ha nerancang enai ajeh, kek kibeusehe kaha-peselamat Yusuf ju teg enai. Kiurok, “Agok perdat kek. 22Pejloh kek nu kateh perigi sod ku padag guron adeh, tapi agok peluka kek.” Ruben kiurok begei ajeh kerana kaha-peselamat ru kaha-en Yusuf jog nu apak enai.

23Jadi, bile Yusuf kilei nu itetenek, ru kasar naiteg jubah Yusuf de ihad bor ajeh. 24Lalu naisaher Yusuf ru naipej kek nu kateh perigi sod.

25Telas ajeh naigigei ru naicakcak. Aleh-aleh naibakek rombongan pedagang-pedagang mai Ismael ju Gilead, ku kateh ceknip enai nu lengrik Mesir. Naien rempah-rempah, balsam, ru mur ku unte-unte enai.

26Yehuda kiurok nu itenek-menang, “Ma ineuntong hiperdat menang hik ru hikerdik idanan ajeh? 27Bei hijual kek nu mai Ismael ajeh. Wes agok pernyik kek. Kek ajeh menang hik, sej behip lihik juga.” Itenek-menang pen naisetuju.

28Bile pedagang-pedagang mai Ismael ajeh nailalu, Yusuf biperhol ya itetenek ju perigi de sod ajeh. Telas ajeh kek bijual nu pedagang-pedagang ajeh, iregak 20 kepeg duet perak. Lalu Yusuf bien nu lengrik Mesir.

29Bile Ruben kilos nu perigi de sod ajeh ru pek kibakek Yusuf ku pajeh, kek kiceg ipenakei kerana ihad kisedeh. 30Kek kijog nu imemenang ru kiurok, “Sanget ajeh nek ya walah ku pajeh! Maka de patot ngbeh hunen?”

31Telas ajeh naigoj nuikor kambeg ru nairendam jubah Yusuf nu kateh behip kambeg ajeh. 32Lalu naien jubah ajeh nu apak liknai ru naiurok, “Jiburuk jubah adeh. Jubah adeh hak kenon jenka?”

33Yakub kikenal jubah ajeh lalu kiurok, “Betol, adeh jubah kenon eng! Kek ya bijerop ya marak. Abekloh, kenon eng Yusuf ya dat bipas ya marak!”

34Yakub kiceg ipenakei kerana ihad kisedeh lalu kilog guni. Kek kijap ha ikenon ajeh bearik-arik iluniu. 35Dikdij kekenon Yakub, keral hodpen kerdor naibeusehe naiha-hibor kek tapi kek kinyek bihibor. Yakub kiurok, “Eng pek akan ngbehenti bekabong ha kenon eng lei ngdat.” Begei ajehloh kek terus kibekabong ha Yusuf ikenon ajeh.

36Sementare ajeh ku lengrik Mesir, pedagang-pedagang mai Ismael ya naijual Yusuf nu Potifar numom pegawei raja. Potifar ajeh ketue pengawal istane.

Currently Selected:

KEJADIAN 37: AEH

Highlight

Compare

Copy