KISAH 23

1Paulus kineng nu anggote-anggote Mahkamah Agame Yahudi ajeh lalu kiurok, “Sesedara! Lei ku arik adeh eng selalo ngsui ya sengik de kijoi ma de betol ku ngar Jenang.” 2Imam Agong Ananias kior sengoi de jinjeg ku beg Paulus ajeh kitampar empag Paulus. 3Paulus kiurok nu kek, “Hek sengoi de bepure-pure. Jenang doh Kitampar lihek! Hek hagei ku pajeh ru hapehakem eng joi Hukom Taurat tapi lihek sendiri halanggar ha Hukom ajeh bile haor sengoi kitampar eng!”

4Memerip urag de mong ku englag Paulus naiurok nu kek, “Hek hahina Imam Agong Jenang!”

5Paulus kiberlag, “Sesedara, eng pek ngpanei kek ajeh Imam Agong. Mimang ku kateh Alkitab mong bicot, ‘Agokloh hina pemimpen engkek.’ ”#Kel 22:28

6Ku engkap anggote mahkamah agame ajeh mong mai Saduki ru mong juga mai Farisi. Paulus kipanei tentang hal ajeh, jadi kiurok ru suara de kuat nu enai, “Sesedara, eng adeh mai Farisi ru apak eng pen mai Farisi juga. Eng bipecare ku padeh kerana ngpecaya mai dat doh biberkos ju danan.”

7Telas Paulus kiurok begei ajeh, mai Farisi ru mai Saduki mula naibekelahi lalu kenumpol enai ajeh kiceraklah jadi nar kumpulan. 8Hal ajeh belaku kerana mai Saduki pek naipecaya ha kisnos ju danan ru pek naipecaya mong malikat ataopen kelog. Tapi mai Farisi naipecaya ku dikdij pekare ajeh. 9Lalu belakuloh kelahi de ihad entoi. Memerip urag guru Hukom Taurat ju kumpulan mai Farisi naijinjeg ru naitentang ru ihad keras, “Sengoi adeh gek pen pek kibesalah! Enggamak mimang mong kelog atao malikat de belwal nu kek!”

10Kelahi ajeh kijadi ihad entoi lei komanden ajeh kisengoh Paulus doh biserbu ya mai jengoi. Kek kior iaska-aska nainyong Paulus ju engkap mai jengoi ru naien kek nu kubu.

11Ku kelem ajeh, Tuhan Kijinjeg ku englag Paulus ru Kiurok, “Pekuatloh sengik hek! Hek ya habesaksi tentang Eng ku kote Yerusalem. Hek hod habeh begei ajeh juga ku kote Rom.”

Penakat ha Perdat Paulus

12Ku ipepegelap, memerip urag mai Yahudi naibekumpol ru naibepakat. Naibesumpah pek naiha-cakcak ru pek naiha-ngekngut lei naiperdat Paulus. 13Ku kateh penakat ajeh mong lebeh ju 40 urag sengoi. 14Naiet nu raknak-raknak imam agame Yahudi ru raknak-raknak mai Yahudi lalu naiurok, “Jik ya jibesumpah pek jiha-cakcak ru pek jiha-ngekngut lei jiperdat Paulus. 15Kerana ajeh, engkek ru anggote-anggote mahkamah agame hodloh engkeperlei bengsat nu komanden aska Rom ru engkesemanj naien Paulus nu ngar engkek. Bepure-pureloh begei engkeha-periksa ha ipekare ajeh ru ihad cerimat nij. Jik doh jibesedia jiha-perdat kek sebelom kilei nu madeh.”

16Tapi kenon keral menang kerdor Paulus kicerngai ha penakat ajeh. Kerana ajeh, kek kimuj nu kubu ru kipasal nu Paulus tentang hal ajeh. 17Lalu Paulus kicereg numom raknak aska ru kiurok nu kek, “Enloh litau adeh nu komanden kerana litau adeh kaha-pasal gah nu kek.” 18Raknak aska ajeh kien litau ajeh nu komanden ru kiurok, “Paulus de bijel ajeh kicereg eng. Kek kisemanj ngen litau adeh nu jen kerana kek kaha-pasal gah nu jen.”

19Komanden kicap teg litau ajeh lalu kien kek nu ienglag ru kitanya, “Ma de haha-pasal nu eng?”

20Litau ajeh kiberlag, “Mai Yahudi ya naibepakat naiha-semanj jenen Paulus nu ngar Mahkamah Agame Yahudi huper doh. Enai doh naibepure-pure naiha-periksa ha ipekare ru ihad cerimat nij. 21Agokloh pecaya nu enai kerana lebeh ju 40 urag sengoi naiha-kerep kek. Enai ya naibesumpah pek naiha-cakcak ru pek naiha-ngekngut lei naiperdat Paulus. Hunen ya naibesedia ru tengah naipoj keputusan ju jen.”

22Komanden ajeh pen kiurok, “Hek hahol haha-pasal hal adeh nu eng. Agokloh hapasal nu mai kilek tentang helnol hek adeh.” Lalu kior litau ajeh et ju kenjeh.

Paulus Bingeng nu Feliks

23Telas ajeh komanden pen kicereg nar mom raknak aska ru kiurok, “Sedialoh 200 urag aska, 70 urag aska de bekuda, ru 200 urag de bepanah. Hodloh naiet nu kote Kaisarea ku pukol sembilan kelem adeh juga. 24Sedialoh memerip ikor kuda ha Paulus ru jagaloh ikeselamatan supaye kilei nu Feliks penguasa lengrik Yudea.” 25Lalu komanden ajeh pen kicot nanek surat begei adeh:

26“Feliks, enjen penguasa de bihormat. Salam ju Klaudius Lisias. 27Mai Yahudi ya naicap sengoi adeh. Bile naiha-perdat kek, eng ngen aska ru jipeselamat kek kerana ngpanei kek ajeh mai Rom. 28Eng ngha-panei yama naitudoh ha kek, jadi ngen kek nu mahkamah agame liknai. 29Ku mahkamah ajeh, eng ngpanei tenudoh enai ajeh bekaet ru Hukom Taurat. Kek adeh pek kibeh ma-ma senalah de patot bihukom dat ataopen bijel. 30Eng ngcerngai gah adeh: Mai Yahudi ya naibepakat naiha-perdat kek. Bile ngcerngai gah ajeh, ngngeng kek nu jen. Eng ya ngor mai de betudoh kek ajeh naien tenudoh enai nu jen.”

31Jadi, aska-aska ajeh naibeh tugas enai ru naien Paulus nu kote Antipatris ku ikelem jijeh juga. 32Ku ihuper aska-aska de naicip jog nailos nij nu kubu tapi aska de bekuda naipeteros ceknip enai besama ru Paulus. 33Bile ya nailei nu kote Kaisarea, naiperlei surat ajeh nu penguasa ru naiserah Paulus nu kek. 34Kek kibaca surat ajeh lalu kitanya nu Paulus ju belok iasal. Telas kipanei Paulus kihol ju lengrik Kilikia, 35kek pen kiurok, “Hoohloh! Eng doh ngperiksa tentang hal hek bile mai de betudoh hek nailei nu madeh.” Lalu penguasa kiog perintah supaye Paulus biterhan ku kateh istane de bibeh ya Raja Herodes Agong entem.

Currently Selected:

KISAH 23: AEH

Highlight

Copy

Compare