Ɓalɔma 3

Mombi ata ngbingbii angɔmʉ pɔ mʉngana

1Dada nga eno tanɨ ɨya Ɓayuda ɓanayɔ akɔnagaaka ɓombi ngʉɓa ɓangɔmʉ Ɓayuda? Nɔ kiiso ɨgʉnɨ yanɔ dada nga ino tanɨ? 2Dada ɔngɔ a mʉja, amati ɔ lɨngbaa ta liɓomu. Asɔɓɨɨ a꞉pʉnga-sɨ aninjo yaka ngɨangɔ ta akɔ Ɓayuda. 3Tasugo dɔ tɨa tanɨ? Yɔɓieni ɓɔ nganangana ati eɓo, ɓa꞉kwa amati ɔ báya Asɔɓɨɨ, ɨyɛnɛnɨ ya ndɨ asugo ɓɔ, Asɔɓɨɨ angɔmʉ ɓata adaa ngɨa ɓanapɨa-ɔɔ báya akʉʉ angɔ? 4Pɔ bele! Yɔkwananɔ anɨmbɨanɨa ɓɔ Asɔɓɨɨ asugo ɨyɔ ta yaka yɔ ingono, nɔ mombi muɓomu a ta mombi ɔ mʉjɛɛ, ngbanga ndʉ aka yatɛndanakɨa-ɔɔ amati ɔ Mabii ɓɔ:

«Ɛɛ Asɔɓɨɨ Aba, Yɔkwananɔ ɓɔ yɨmbɨanɨa

ɓɔ wanɔ ingono amati ɔ yaka ngɨyɛ wakɔsugo.

Nɔ, ɓɔnapɨeni nɔ mʉkɔmbʉ

wanagaaka ta nagaakanɨ.»#popoko Mmb 51:6

5Yakamɛngana, yɔɓieni ɓɔ ɨngbaa akɔ ɓʉɓɨɓɨ ngʉɓa isu takɔkɨa, Asɔɓɨɨ ɛnɨanɨɔ mombi ɔ ingono, kʉɓanɨ, tasugo ndɨ sugoni ɓɔ, Asɔɓɨɨ angɔmʉ ngbingbii ngbinga ngɨa a-ɔɔ, nesu akyananaka? (Na-sɨ ayaka ananɨ ta ndʉ ɨyɛ mombi ayaka-ɔɔ.) 6Pɔ bele! Yɔɓieni jɛnɛ ɓɔ, Asɔɓɨɨ angɔmʉ ngbingbii, ɨyɔ, akio dɔ tɨa mʉkɔmbʉ wɔ dɔdɔ tanɨ?

7Yakamɛngana, yɔɓieni ɓɔ ingono ngɨa Asɔɓɨɨ yanɨnɨanɨa nɔgbɛ ɨngbaa akɔ mʉjɛɛ ngʉwɔsɛmɨ, nɔ ɓɔ, ino ngɨangɔ yabɨbanɨa, ɓa dɔ tɨa nɛmɨ akɔchɔngɨa ndʉ mombi ata ɓɨɓɨ dɔtanɨ? 8Ndʉ itungwio ngɨyeso yaɓio ɓanɨ, tapʉnga ndɨ tɨa kɨa ɓʉɓɨɓɨ ambɔ, tɨnɨanɨa nɔ iɗo? Ta ingono, yanɔ ɓombi ngaɓɔmɔ ʉɓa, ɓanesu asingekio mʉjɛɛ ɓɔ isu akɛ, ta꞉sugo pɔngɔ ɓanɨ. Ɓa꞊ɓʉkyananaka sina ɓombi ngʉɓɔnanɨ, ta ndʉ aka yɔsisekio-ɔɔ naɓɔ akyananaka!

Mombi ata ngbingbii angɔmʉ pɔ mʉngana

9Kʉɓanɨ, tasugo dɔ-sɨ tanɨ? Isu Ɓayuda tɔchanɔ-sɨ mababa kɔ ɓombi nga ɓɔmɔ nɔ ɨmanɨ? Tɔɓʉchanɔmʉ nɔ ɨkyɛmʉ pɔ mɛngana! Na꞉pananiso pɔngɔ ta aɓʉmba ɓɔ, Muyuda, kʉndʉ mombi ngɨa angɔmʉ Muyuda, ɨɓɔ ɓaɓomu, ɓa ta aɨsɨ ɔ ʉpanʉ wɔ ɓʉɓɨɓɨ. 10Ya ngbanga ndʉ aka ya꞉tɛtandanakɨa-ɔɔ amati ɔ Mabii ɓɔ:

«Mombi ɔ ingono angɔmʉ pɔ mʉngana.

11Mombi pɔ mʉngana angɔmʉ nɔ nɨmbɨmbɨanaka,

Mombi pɔ mʉngana angɔmʉ ahata Asɔɓɨɨ.

12Ɓombi ɓaɓomu ɓa꞉sɨa ɨngbaa sɨanɨ, ɨɓɔ ɓaɓomu ɓɔ sɛ, ɓayangaa ta yangaa.

Mombi angɔmʉ pɔ mʉngana, ɨya, akɔkɨa yaka yɛta iɗo.

13Mugongilo ngʉweɓo wa ngbanga ndʉ ɓʉnjaʉ ngʉɓa ɓa ɓwau,

nɔ ʉɗaɗa ngʉweɓo, ɨɓɔ ɓakɔpɛtanaka ɓangɛ,

lɨmbamba lɔ monu ngɨleɓo, lakɔchweiso ta uchongi ngbanga ndʉ sɨɨ.

14Monu ngʉkeɓo, kamahue nɔ mʉgbanga, nɔ ʉɗaɗa wɔta koi.

15Mɨtɨndɨ ngɨyeɓo ya gagaa anɨsa anɨwa mombi.

16Ɓadʉka iɓomu aki ɓaɓio-ɛɛ akɔchana, nɔ ɓɔsɨa ta maɓuu.

17Ɓangɛmbɨamʉ ɓɔ majɨɔ kɛnɨanɨa nɔ ɨngbaa nga yeno tanɨ.

18Ʉɓá wɔ Asɔɓɨɨ, wangɔmʉ amati eɓo pɔ bele»#popoko Mmb 36:1-2; 14:1-3.

19Ɨnadɔ, tanɨmbɨa ɓɔ yaka iɓomu ngɨyɛ mapanʉ kakɔsugo, ya akʉʉ ɔ ɓombi ngʉɓa ɓa ɛsɨ ɔ mapanʉ. Yaɓanɨ dɔ, mombi pɔ mʉngana, atɨɓiomʉ nɔ yaka yɛta isuge, nɔ dɔdɔ muɓomu ɨmbɨa ɓɔ anɔ mʉkɔmbʉ apɛɨ ɔ Asɔɓɨɨ. 20Dɔ, mombi pɔ mʉngana, angɛnɨanɨa sina ngbingbii apɛɨ Asɔɓɨɨ, ɨngbaa akyananakɨa mapanʉ. Dada ngɨa ɔ mapanʉ, ya ta animbiiso mombi ɓɔ amati ɔ ɓʉɓɨɓɨ.

Mombi ɛka ngbingbii amati ɔ báya Yeso Klisito

21Yakamɛngana, ɨtakɨtakɨ ngɨyɛ, Asɔɓɨɨ a꞉tɨpana ɨngbaa tɨa pananɨ, ɨyɛ mombi akwanana-ɔɔ anɨka ngbingbii apɛɨ angɔ, sɔkɔmʉ ɨngbaa akɔ mapanʉ. Mapanʉ kɔ Musa nɔ magbɛ ka꞉pana jɛnɛ yaka ngɨyɛnɛnɨ, ta aɓʉmba. 22Asɔɓɨɨ asɨka mombi ndʉ a ngbingbii apɛɨ angɔ ta ɨngbaa akɔ báya Yeso Klisito. Akɔkɨa ɓanɨ akɔ mombi muɓomu ngɨa anɔ báya, dɔ ɨyɔ, angɔnapiokomʉ ɓombi nɔ mababa, nɔ, ɓombi ɓaɓomu ɓa ta ngbanga apɛɨ angɔ. 23Ɓombi ɓaɓomu ɓa꞉kɨa ɓʉɓɨɓɨ, nɔ, ʉbɨba ngʉwɔ Asɔɓɨɨ, wangɔmʉ ɓata akʉʉ eɓo pɔ bele. 24Yakamɛngana, ya ɨngbaa akɔ ɨjɨɔ, nɔ, iɗo iɗo ngɨa Asɔɓɨɨ, ɨyɛ, ɓombi ɓa-ɔɔ anɨnɨanɨa ndʉ ɓa ngbingbii, amatɨ ɔ Yeso Klisito ngɨa aɓʉkayakɨa. 25-26Asɔɓɨɨ e꞉njo Yeso ndʉ mutebii, dɔ, ɨngbaa akɔ ingwo ngɨangɔ, ɓombi ngʉɓa ɓa꞉mʉbaya Asɔɓɨɨ, ɓɨɓɨpaakɨa ɓʉɓɨɓɨ ngʉɓeɓo. Asɔɓɨɨ a꞉kɨa ɓanɨ, apananiso ɓʉngbingbii ngʉɓangɔ. Kʉɓanɨ, a꞉ɓio jɛnɛ mʉtɨma ʉta akɔ ɓʉɓɨɓɨ ngʉɓa ɓombi ɓa꞉kɨa pɛɨ, sɔkɔmʉ ikio mʉkɔmbʉ wɔngɔ. Yakamɛngana, ɨtakɨtakɨ ngɨyɛ, akɔpananiso ɓungbingbii ngʉɓangɔ, ɓɔ dɔ iɓio ta ngbingbii nɔ, ɨsɨka mombi muɓomu ngɨa abaya Yeso, ndʉ mombi ata ngbingbii. 27Ɓombi ɓɔkwananɔ ndɨ aniwo aɗia? Sɔkɔmʉ pɔ bele! Dɔtanɨ? Dɔ, yaka ngɨyɛ yanɔ dada nɔgbɛ, yangɔmʉ ɓata akyananakɨa mapanʉ, Yakamɛngana, ya tɨta ɓio nɔ báya akɔ Yeso. 28Isu, takɔpemiso ɓɔ mombi akwanana anɨnɨanɨa ndʉ a ngbingbii apɛɨ ɔ Asɔɓɨɨ ta ɨngbaa akɔ báya, sɔkɔmʉ ɨngbaa akɔkyananakɨa mapanʉ. 29Asɔɓɨɨ a ndɨ ta Asɔɓɨɨ ɔ Ɓayuda? Angɔmʉ ndɨ kʉ Asɔɓɨɨ ɔ ɓombi ngʉɓa ɓangɔmʉ Ɓayuda? Ii, a kʉ Asɔɓɨɨ ɔ ɓombi ngʉɓa ɓangɔmʉ Ɓayuda, 30dɔ, ɨyɔ, Asɔɓɨɨ a ta mʉngana. Kʉɓanɨ, a꞊necho Ɓayuda anɨka ngbingbii apɛɨ angɔ, ɨngbaa akɔ báya, nɔ ɓombi ngʉɓa ɓangɔmʉ Ɓayuda, kʉ ɨngbaa akɔ báya,. 31Ɨyɛnɛnɨ ya ndɨ asugo ɓɔ tɨyapakiso mapanʉ tɨta ɓɔ dɔ tanɔ báya? Pɔ bele! Yakamɛngana, tɔkwananɔ atʉmba mapanʉ ta nɛkʉʉ.

Currently Selected:

Ɓalɔma 3: buuN

Highlight

Copy

Compare